លោក ត្រាំ ជួបជាមួយនាយករដ្ឋមន្ត្រីថ្មីជប៉ុន ដើម្បីពិភាក្សាអំពីពាណិជ្ជកម្ម និងសន្តិសុខ
ទីក្រុងតូក្យូ ៖ ប្រធានាធិបតីអាមេរិក លោក ដូណាល់ ត្រាំ (Donald Trump ) បានជួបជាមួយនាយករដ្ឋមន្ត្រីថ្មីរបស់ប្រទេសជប៉ុន…
ទីក្រុងតូក្យូ ៖ ប្រធានាធិបតីអាមេរិក លោក ដូណាល់ ត្រាំ (Donald Trump ) បានជួបជាមួយនាយករដ្ឋមន្ត្រីថ្មីរបស់ប្រទេសជប៉ុន លោកស្រី សាណាអេ តាកាអ៊ីឈី (Sanae Takaichi) នៅទីក្រុងតូក្យូ ថ្ងៃទី២៨ ខែតុលា ឆ្នាំ២០២៥ ដើម្បីពិភាក្សាអំពីពាណិជ្ជកម្ម និងសន្តិសុខ។ នេះបើយោងតាមប្រភពពីទីភ្នាក់សារព័ត៌មានរ៉យទ័រ (Reuters) បានចេញផ្សាយ។
ប្រទេសជប៉ុនក៏ត្រូវបានរំពឹងថានឹងផ្តល់កញ្ចប់វិនិយោគទំហំទឹកប្រាក់រហូតដល់ ៥៥០ពាន់លានដុល្លារនៅសហរដ្ឋអាមេរិក ស្ថិតក្រោមកិច្ចព្រមព្រៀងដែលបានព្រមព្រៀងគ្នានៅក្នុងឆ្នាំនេះ រួមទាំងការសាងសង់នាវា និងការសន្យាទិញសណ្តែកសៀង ឧស្ម័ន ព្រមទាំងរថយន្តភីកអាប់ (Pickup) ផលិតផលរបស់អាមេរិកផងដែរ។
ជាមួយគ្នានោះ លោកស្រី តាកាអ៊ីឈី ក៏មានគម្រោងជម្រាបជូនលោក ត្រាំ ថា លោកស្រី កំពុងត្រៀមខ្លួនជ្រើសតាំងលោកសម្រាប់បេក្ខភាពពានរង្វាន់ណូបែលសន្តិភាព (Nobel Peace Prize) បន្ទាប់ពីមេដឹកនាំពិភពលោកមួយចំនួនបានជ្រើសតាំងលោកសម្រាប់ពានរង្វាន់ដែលលោកចង់បានជាយូរមកហើយ។
យោងតាមការបញ្ជាក់សេតវិមានបានឱ្យដឹងថា មេដឹកនាំកំពូលទាំងពីរ ក៏ត្រូវបានរំពឹងថានឹងចុះហត្ថលេខាលើកិច្ចព្រមព្រៀងទាក់ទងនឹងធនធានរ៉ែសំខាន់ៗ និងធនធានរ៉ែដ៏កម្រ ដែលមានសារៈសំខាន់សម្រាប់ផលិតផលជាច្រើនប្រភេទ រាប់ចាប់ពីស្មាតហ្វូនរហូតដល់យន្តហោះចម្បាំង។
បន្ទាប់មក លោក ត្រាំ នឹងជួបជាមួយបណ្តាមេដឹកនាំធុរកិច្ចជប៉ុន នៅក្នុងទីក្រុងតូក្យូ មុនពេលធ្វើដំណើរនៅថ្ងៃទី២៩ ខែតុលា ទៅកាន់ប្រទេសកូរ៉េខាងត្បូង ជាទីដែលលោកនឹងជួបជាមួយប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) ពោល១ថ្ងៃ មុនកិច្ចប្រជុំកំពូលរបស់លោក ត្រាំ ជាមួយប្រធានាធិបតីចិន លោក ស៊ី ជិនភីង (Xi Jinping)។
នៅក្នុងកិច្ចពិភាក្សាជាមួយប្រធានាធិបតីចិននៅទីនោះ លោក ត្រាំ បាននិយាយថា លោកសង្ឃឹមថានឹងបញ្ចប់សង្គ្រាមពាណិជ្ជកម្មរវាងប្រទេសទាំងពីរ ដែលជាមហាយក្សសេដ្ឋកិច្ចពិភពលោក៕
ចែករំលែកព័តមាននេះ