ក្នុងភ្នែកមនុស្សល្ងង់មិនដែលមើលឃើញទង្វើអ្នកដទៃក្នុងផ្លូវល្អឡើយ គេតែងផ្គងចិត្តសម្លឹងទោសកំហុសអ្នកដទៃជានិច្ចដែលជាការងារពិសេសរបស់ខ្លួន ចំណែក បណ្ឌិតអ្នកប្រាជ្ញលោកមិនដែលចាប់ទោសអូសដំណើរអ្នកណាឡើយ ចិត្តរបស់លោកផុតស្រឡះពីផ្លូវអបាយហើយ លោកជាមិត្តដ៏ល្អនៃសព្វសត្វ ។
មិត្តពាលតែដើរពោលទោសមិត្តក្នុងទីកំបាំងមុខ ដោយមិនមានចិត្តអាណិតអាសូរ មិនខ្លាចកម្មពៀរឡើយ គេបានផ្សែផ្សំរឿងនេះបន្តិច រឿងនោះបន្តិច ស្មានខ្លះ ពិតខ្លះ មិនពិតខ្លះធ្វើយ៉ាងណាឱ្យអ្នកស្តាប់នោះគេជឿក្នុងរឿងអាក្រក់ដើម្បីឱ្យមិត្តវិនាសដោយប្រការផ្សេងៗ នេះមិនមែនជាមិត្តល្អឡើយ ។
តាមពិតទៅការនិយាយអំពីទោសកំហុសរបស់អ្នកដទៃក្នុងទីកំបាំងមុខ មិនមែនសុទ្ធតែមិនល្អទាំងអស់ទេ បើយើងនិយាយដោយស្មារតី មិនបៀតបៀនអ្នកដទៃ មិនដើម្បីលើកតម្កើងខ្លួនឯង គឺនិយាយចេញមកដោយកុសលចិត្តពិតៗ ក្នុងន័យដើម្បីឲ្យអ្នកស្តាប់នោះកុំយកជាគំរូ ការនិយាយដោយសន្តានបែបនេះជាការត្រឹមត្រូវទៅវិញទេ ។
ចំណែកការនិយាយអំពីគុណអ្នកដទៃពិតៗ ក៏មិនប្រាកដថាសុទ្ធតែល្អទាំងអស់នោះដែរ វាអាចជាពិសពុលក្នុងចេតនាអាក្រក់ណាមួយ ដោយអំណាចនៃចិត្តអកុសលនាំឲ្យនិយាយចេញមក ។
ទោះជាយ៉ាងណាក៏ដោយ ការវៀរមិត្តបាប ហើយងាកមកសេពគប់មិត្តមានចិត្តជាបុណ្យគឺជារឿងប្រពៃណាស់ បានសុខចម្រើន បានផលប្រយោជន៍ ព្រោះតាមធម្មតាមិត្តល្អនៅពេលគេមានប្រយោជន៍ណា ក៏រមែងអប់រំណែនាំមិត្តឱ្យឋិតក្នុងប្រយោជន៍នោះដែរ ។ (ដោយសាន សារិន)
ចែករំលែកព័តមាននេះ