ពិធីជប់លៀងខួបកំណើត និងចូលនិវត្តន៍ជាមួយបុគ្គលិក៦០.០០០នាក់

ថ្ងៃទី ១១ ខែ កញ្ញា ឆ្នាំ ២០១៩
ម៉ោង ១៦:៥០
សោម វិសាល

លោក Jack Ma ដែលជាមហាសេដ្ឋីមានប្រាក់ច្រើនជាងគេនៅប្រទេសចិន បានលាឈប់ពីតំណែងជាប្រធានក្រុមហ៊ុន Alibaba Group ហើយកាលពីថ្ងៃទី ៣ខែកញ្ញានេះ ។ Alibaba ដែលជាគេហទំព័រពាណិជ្ជកម្មអេឡិចត្រូនិចតូចមួយដែលលោកបានកសាងឡើងជាមួយមនុស្ស ១៧នាក់ផ្សេងទៀតក្នុងឆ្នាំ ១៩៩៩ មកនោះថ្ងៃនេះបានក្លាយជាចក្រភពបច្ចេកវិទ្យាដែលមានទឹកប្រាក់ចំនួន ៤៦០ពាន់លានដុល្លារ ។

ពិធីជប់លៀងលាគ្នាដែលត្រូវនឹងខួបកំណើតគម្រប់ ៥៥ឆ្នាំរបស់សហគ្រិនបច្ចេកវិទ្យារូបនេះ និងខួបលើកទី ២០របស់ Alibaba បានរៀបចំទទួលបុគ្គលិកជាង ៦០.០០០ នាក់នៅឯមជ្ឈមណ្ឌលកីឡដ្ឋានអូឡាំពិកនៅ Hangzhou ដែលជាទីក្រុងកំណើតរបស់ម្ចាស់ក្រុមហ៊ុនក្នុងខេត្ត Zhejiang ប្រទេសចិន ។ ជា មួយនឹងទ្រព្យសម្បត្តិសុទ្ធចំនួន ៣៨,៦ ពាន់លានដុល្លារលោក Ma បានតែចូលនិវត្តន៍នៅវ័យក្មេងក្នុងប្រទេសចិន ដែលជាធម្មតាស្ថាបនិកបានកាន់កាប់ក្រុមហ៊ុនរបស់ពួកគេរហូតដល់អាយុ ៨០ឆ្នាំឯណោះ ។

ទោះយ៉ាងណា មហាសេដ្ឋីជំនួញរូបនេះនឹងនៅតែស្ថិតក្នុងក្រុមប្រឹក្សាភិបាលរបស់ក្រុមហ៊ុន Alibaba រហូតដល់ឆ្នាំ ២០២០ ហើយស្ថិតនៅជាដៃគូពេញមួយជីវិតក្នុងភាពជាដៃគូ Alibaba ដែលជាក្រុមប្រតិបត្តិជាន់ខ្ពស់ដែលតែងតាំងជានាយកលើក្រុមប្រឹក្សាភិបាល នេះបើយោងតាមកាសែត South China Morning Post ដែលគ្រប់គ្រងដោយក្រុមហ៊ុន ។ ចំពោះអ្នកស្នងតំណែងគឺលោក Daniel Zhang ជានាយកប្រតិបត្តិ និងជាគណនេយ្យករខាងពាណិជ្ជកម្មដែលមានចរិតទន់ភ្លន់ផ្ទុយពីរបៀបដឹកនាំរបស់គាត់ ។

យោងតាម Business Insider ឱ្យដឹងថាលោក Ma បាននិយាយកាលពីឆ្នាំ ២០១៨ ថា « Zhang មានតក្កវិជ្ជា និងជំនាញត្រិះរិះពិចារណារបស់ Supercomputer ការប្តេជ្ញាចិត្តចំពោះចក្ខុវិស័យរបស់គាត់ភាពក្លាហានអស់ពីចិត្តក្នុងការយកគំរូអាជីវកម្ម និងឧស្សាហកម្មប្រកបដោយភាពច្នៃប្រឌិតនាពេលអនាគត ។

លោក Zhang ដែលរក្សាតំណែងជានាយកប្រតិបត្តិត្រូវតែរកវិស័យថ្មីៗនៃកំណើននៅពេលឧស្សាហកម្មពាណិជ្ជកម្មតាមប្រព័ន្ធអេឡិចត្រូនិករបស់ចិនឈានមុខគេ ។ អ្នកវិភាគ Liu Yiming បាននិយាយថា «ប្រសិនបើក្រុមហ៊ុន Alibaba ចង់ស្វែងរកគំនិតច្នៃប្រឌិតថ្មី ឬនិន្នាការថ្មីនេះនឹងកាន់តែពិបាកជាងមុន» ។ លោកបន្ថែមថាវានឹងក្លាយជាបញ្ហាប្រឈមដ៏ធំមួយសម្រាប់ Zhang ។

កាលពីឆ្នាំមុនលោក Ma បានប្រកាសជាផ្លូវការនូវផែនការរបស់លោកក្នុងការលាលែងពីតំណែងនៅក្នុងលិខិតមួយទៅអតិថិជននិយោជិក និងម្ចាស់ភាគហ៊ុន ។ ដោយលោកបានសរសេរថា «គ្មានក្រុមហ៊ុនណាអាចពឹងផ្អែកលើស្ថាបនិករបស់ខ្លួនបានទេ» ។ «ដោយសារតែដែនកំណត់រាងកាយលើសមត្ថភាព និងថាមពលរបស់មនុស្សម្នាក់គ្មាននរណាម្នាក់អាចទទួលយកបាននូវទំនួលខុសត្រូវជាប្រធាន និងនាយកប្រតិបត្តិជារៀងរហូត» ។

បច្ចុប្បន្នបុរសវ័យ ៥៥ ឆ្នាំរូបនេះត្រូវបានគេរំពឹងថានឹងលះបង់ពេលវេលាភាគច្រើនរបស់គាត់ដើម្បីមនុស្សធម៌ដោយបានចាប់ផ្តើមមូលនិធិ Jack Ma ក្នុងឆ្នាំ ២០១៤ ដោយគាត់ក៏បានលើកឡើងពីមូលនិធិ Bill និង Melinda Gates ផងដែរ ។ យោងតាម CNN ឱ្យដឹងថាអ្នកនិពន្ធ Duncan Clark បាននិយាយថា «Ma កំពុងបង្ហាញនូវចំណាប់អារម្មណ៍របស់គាត់មួយរយៈនៅក្នុងវិស័យមនុស្សធម៌ បរិស្ថាន ការផ្តល់អំណាចដល់ស្ត្រី ការអប់រំ និងការអភិវឌ្ឍ» ។

លោក Ma ទំនងជានឹងខិតខំប្រឹងប្រែងក្នុងការអប់រំ ព្រោះមុនពេលក្លាយជាអ្នកជំនាញខាងបច្ចេកវិទ្យាគាត់ គឺជាគ្រូបង្រៀនភាសាអង់គ្លេសម្នាក់ដែលរកលុយបាន ១២ដុល្លារក្នុងមួយខែដោយធ្វើការនៅសាកលវិទ្យាល័យក្នុងស្រុកមួយ ។ លោក Ma ធ្លាប់បានប្រាប់ទៅ Bloomberg កាលពីឆ្នាំទៅថា «ខ្ញុំគិតថានៅថ្ងៃណាមួយហើយឆាប់ៗនេះខ្ញុំនឹងត្រលប់ទៅបង្រៀនវិញ ។ នេះគឺជាអ្វីដែលខ្ញុំគិតថាខ្ញុំអាចធ្វើបានប្រសើរជាងការធ្វើជានាយកប្រតិបត្តិរបស់ក្រុមហ៊ុន Alibaba» ។ (សម្រួលដោយ៖ ស្រីណា)
ប្រភព៖ Nextshark