​​ដឹង​បន្ត​ពី​ជីវិត​ពិត«​ម៉ា​ដាម​លន់​»​រស់​ជា​មួយ​​សត្វ​ចិញ្ចឹម​ដូច​កូនបង្កើត​រយៈ​១៥​ឆ្នាំ


រាជធានី​ភ្នំពេញ ៖ ស្ត្រី​ចំណាស់​វ័យ​៦២​ឆ្នាំ​ម្នាក់បាន​ប្រើប្រាស់​ជីវិត​ផ្ទាល់ខ្លួន​ជាង​១៥​ឆ្នាំ សម្រាប់​ការ​រស់នៅ​ជាមួយ​ហ្វូង​សត្វ​ឆ្កែ និង​ឆ្មា​រាប់រយ​ក្បាល ដោយ​បាន​មើល​ថែទាំ​រក្សា​ចិញ្ចឹម​បីបាច់ និង​ផ្តល់​ក្តី​ស្រឡាញ់​យ៉ាង​ខ្លាំង​ទៅ​កាន់​សត្វ​ទាំង​អស់នោះ ជា​សមាជិកគ្រួសារ​ដ៏​ជិត​ស្និទ្ធ ដោយ​លោកស្រី​បាន​ចាត់​ទុក​សត្វ​ឆ្កែ និង​ឆ្មា​ទាំង​អស់នោះ​ដូច​កូន​ៗ​បង្កើត​របស់​លោកស្រី​អ​ញ្ចឹ​ង ។

ស្ត្រី​វ័យ​៦២​ឆ្នាំ​នេះ​មានឈ្មោះ ទេព គី​ម​លន់ ដែល​អ្នក​ភូមិ​នៅ​តំបន់​នោះ​បាន​ស្គាល់​និង​ហៅ​គាត់​ថា «ម៉ា​ដាម​លន់» គាត់​មានកូន​ប្រុស​ស្រី​ចំនួន​៧​នាក់ ដែល​បច្ចុប្បន្ន​ពួក​គេ​ទាំង​៧​នាក់ កំពុង​រស់នៅ​ប្រទេស​បារាំង​និង​អា​មេ​រិ​ក ដោយ​ក្នុង​នោះ​អ្នកខ្លះ​ក៏​មានគ្រួសារ​និង​មានកូន​រួច​ទៅ​ហើយ​ដែរ ។ ចំណែក​ម៉ា​ដាម​លន់​វិញ គឺ​រស់នៅ​ជាមួយ​ស្វាមី​តែ​២​នាក់​ប្តី​ប្រពន្ធ និង​សត្វ​ឆ្កែ​ឆ្មា​រាប់រយ​ក្បាល ក្នុង​លំនៅ​ឋាន​ដ៏​ធំ​របស់​ខ្លួន ស្ថិត​ក្នុងភូមិ​កោះន​រា សង្កាត់​និរោធ ខណ្ឌ​ច្បារ​អំពៅ រាជធានី​ភ្នំពេញ ។

ជួប​ជាមួយ​«​កោះសន្តិភាព​»​លោកស្រី គី​ម លន់ បាន​រៀបរាប់​ទាំង​ទឹកមុខ​ញញឹម​រីករាយ​រាក់ទាក់​ថា បច្ចុប្បន្ន​សត្វ​ឆ្កែ​និង​ឆ្មា ដែល​លោកស្រី​កំពុង​ចិញ្ចឹម គឺ​មាន​ចំនួន​ជិត​២០០​ក្បាល ដែល​សត្វ​ទាំង​អស់នោះ គឺ​បាន​មក​ពី​ការ​រើស​បាន​តាម​ដងផ្លូវ​សាធារណៈ ឬ​ហៅ​ថា​សត្វ​អនាថា និង​បាន​មក​ពី​ម្ចាស់​សត្វ​មួយ​ចំនួន​ដែល​មានចិត្ត​លែង​ចង់​ចិញ្ចឹម​បាន​យក​មក​ប្រគល់​ឱ្យ ឬ​បាន​មក​ពី​ទី​វត្ត​អារាម​ជាដើម ។

ម៉ា​ដាម​លន់​បន្ត​ថា គាត់​ចាប់ផ្តើម​ចិញ្ចឹមសត្វ​ទាំង​២​ប្រភេទ​នេះ តាំងពី​ឆ្នាំ​២០០៥​មក​ម្ល៉េះ​ដោយ​កាលនោះ គឺ​គាត់​ចិញ្ចឹម​នៅ​ក្នុងផ្ទះ​ផ្ទាល់ខ្លួន​ធម្មតា​ប៉ុណ្ណោះ ហើយ​ក៏​ពុំ​មាន​សត្វ​ច្រើន​ដូច​បច្ចុប្បន្ន​នេះ​ដែរ លុះ​រហូត​ដល់​ឆ្នាំ​២០១២ គាត់​ក៏​បាន​បង្កើត​ជា​សមាគម​ចិញ្ចឹមសត្វ​តែ​ម្តង ដែល​បច្ចុប្បន្ន​ទីតាំង​ផ្ទះ​របស់​ម៉ា​ដាម​គឺជា​សមាគម ដោយ​បាន​ដាក់​ឈ្មោះ​ថា «​សមាគម​ការពារ​សត្វ​កម្ពុជា​» ។

ម៉ា​ដាម​លន់ បាន​រៀបរាប់​ថា គាត់​រស់នៅ​ក្នុង​ប្រទេស​បារាំង​តាំងពី​ក្មេង​មក​ម្ល៉េះ ពោល​គឺ​គាត់​កើត​នៅ​កម្ពុជា ហើយ​ក៏​ត្រូវ​បាន​បងប្អូន​នាំ​ទៅ​រស់នៅ​ក្រៅប្រទេស​តាំងពី​តូច លុះ​ធំ​ដឹងក្តី​ឡើង គាត់​មាន​ជីវភាព​ធូរធា​យ៉ាង​ខ្លាំង​នៅ​ទីនោះ ដោយ​មាន​របរ​រកស៊ី​យ៉ាងច្រើន ដូច​ជា​ហាង​នំប៉័ង ហាង​ពេជ្រ និង​ហាង​លក់​សម្លៀក​បំពាក់​ជាដើម ។ នៅ​ឆ្នាំ​១៩៩៦ ម៉ា​ដាម​លន់ បាន​ធ្វើ​ដំណើរ​កម្សាន្ត​ត្រឡប់​មក​កាន់​កម្ពុជា​វិញ លុះ​ឆ្នាំ​១៩៩៩ គាត់​ក៏​ត្រឡប់​ទៅ​វិញ ។ នៅ​ឆ្នាំ​២០០៥ លោកស្រី​ក៏​ត្រឡប់​មក​វិញ​ម្តងទៀត ដោយ​ក្នុង​នោះ ការ​ត្រឡប់​មក​វិញ​លើក​ទី​២ បាន​នាំ​ចិត្ត​របស់​ម៉ា​ដាម​ឱ្យ​ស្រឡាញ់​សត្វ​ឆ្កែ​មុនគេ​បង្អស់ ។

ការ​ចាប់ផ្តើម​កើត​ចិត្ត​ស្រលាញ់​នោះ គឺ​កើត​ចេញពី​ក្តី​អាណិតអាសូរ ដោយ​កំឡុង​គ្រានោះ​លោកស្រី​បាន​ធ្វើ​ដំណើរ​តាម​ដងផ្លូវ​សាធារណៈ​ក្នុង​រាជធានី​ភ្នំពេញ ហើយ​ក៏​បាន​ប្រទះ​ឃើញ​សត្វ​ឆ្កែ​ជា​បន្តបន្ទាប់​ជា​ច្រើន ដើរ​តាម​ដងផ្លូវ និង​ឆ្កែ​ខ្លះ​ដើរ​កាយ​សំរាម​នានា ដើម្បី​រក​ចំណីអាហារ​ស៊ី ដោយ​សភាព​រាង​កាយ​របស់​សត្វ​ទាំងនោះ មាន​សភាព​ស្គមស្គាំង ខ្លះ​មាន​សុទ្ធតែ​អង្គែស៊ី​ស្ទើរ​ពេញ​ផ្ទៃ​ខ្លួន​ទាំងមូល ជា​ហេតុ​ធ្វើ​ឱ្យ​លោកស្រី​កើតក្តី​អាណិត រហូត​រក​វិធីសាស្ត្រ​ប្រមែប្រមូល​សត្វ​ទាំង​អស់នោះ យក​ទៅ​ចិញ្ចឹម​ដល់​ក្នុង​លំនៅ​ឋាន​របស់​លោកស្រី​តែ​ម្តង​ទៅ ។

អ្វី​ជា​ការ​កត់សម្គាល់​នោះ ម៉ា​ដាម​លន់ មិន​ត្រឹមតែ​ចិញ្ចឹមសត្វ​ឆ្កែ​និង​ឆ្មា​ជា​ច្រើន​នៅ​ក្នុង​លំនៅ​ឋាន​របស់​ខ្លួន​នោះ​ទេ បច្ចុប្បន្ន​ក៏​បាន​ចិញ្ចឹមសត្វ​ទាំង​២​ប្រភេទ​នេះ នៅ​តាម​ទី​វត្ត​អារាម​ចំនួន​៥​នៅ​ក្នុង​រាជធានី​ភ្នំពេញ​ផង​ដែរ ដោយ​សត្វ​ទាំងនោះ​ទទួល​ការ​ផ្តល់​ចំណីអាហារ​ពី​ម៉ា​ដាម​ជា​បន្តបន្ទាប់ ហើយ​ក្នុង​នោះ​ប្រសិនបើ​សត្វ​ទាំងនោះ​វា​ឈឺ គឺ​ម៉ា​ដាម​ជួល​ម៉ូតូឌុប​ដែល​ជា​ម៉ូតូឌុប​ប្រចាំ​សមាគម ឱ្យទៅ​ដឹក​វាយ​កមក​ដើម្បី​ទទួល​ការ​មើលថែ​ទាំ​និង​ពិនិត្យ​តាមដាន​ជំងឺ​របស់​វា​នៅផ្ទះ​ម៉ា​ដាម ។ ប្រ​សិន​ក្នុង​ករណី​ធ្ងន់ធ្ងរ គឺ​ត្រូវ​ដឹក​ប​ញ្ចូ​ន​ទៅ​កាន់​មន្ទីរពេទ្យ​ជំនាញ​សត្វ​ក្នុង​ក្រុង ដើម្បី​ទទួល​ការ​ព្យាបាល​ផង​ដែរ ។

ជា​រៀងរាល់ថ្ងៃ​សត្វ​ទាំង​២​ប្រភេទ​ខាងលើ​នេះ មាន​សត្វ​ឆ្មា គឺ​ត្រូវ​បាន​ផ្តល់​ចំណីអាហារ​ចំនួន​៣​ពេល​ជា​ប្រចាំ​ដូច​ទៅ​ហ្នឹង​មនុស្ស​ធម្មតា ប៉ុន្តែ​ក្នុង​នោះ​សម្រាប់​សត្វ​ឆ្កែ គឺ​អាច​នឹង​ត្រូវ​បង្អត់​ចំណី​ពេល​ព្រឹក ដោយ​ត្រូវ​ដាក់​ចំណី​ឱ្យ​វា​ស៊ី​នៅ​ម៉ោង​១២​ថ្ងៃត្រង់ និង​ពេល​ល្ងាច​ម៉ោង​៦​ប៉ុណ្ណោះ ។ ក្នុង​ករណី​ខ្លះ​ប្រសិនបើ​មិន​មាន​អាហារ​គ្រប់គ្រាន់​សម្រាប់​ពួក​វា ។ ប៉ុន្តែ​បើ​មាន​វិញ គឺ​ពួក​គេ​ត្រូវ​បាន​ទទួល​ចំណី​៣​ពេល​ដូច​សត្វ​ឆ្មា​ផង​ដែរ ។ ចំពោះ​អាហារ​របស់​សត្វ​ទាំង​២​នេះ ក៏​មានការ​ឧបត្ថម្ភ​ពី​តាម​បណ្តា​ភោជនីយដ្ឋាន​មួយ​ចំនួន​នៅ​ក្នុង​រាជធានី​ភ្នំពេញ​ផង​ដែរ ដោយ​បាន​ផ្តល់​ជា​កាក​សំណល់ ចំណីអាហារ​ដែល​សល់​ពី​ភ្ញៀវ ឱ្យទៅ​កាន់​សមាគម​របស់​លោកស្រី​ដើម្បី​អាច​ផ្គត់​ផ្គត់​បន្ថែម​ដល់​សត្វ​ទាំង​២ ពិសេស​គឺ​ឆ្កែ ។

សម្រាប់​ការ​ចិញ្ចឹម​បីបាច់​ថែរក្សា​សត្វ​ទាំង​២​ប្រភេទ​នេះ ម៉ា​ដាម​លន់ បញ្ជាក់​ថា បាន​ត្រូវ​ចំណាយ​ប្រាក់​ចន្លោះ​ពី​៣០០០​ទៅ​៣៥០០​ដុល្លារ​ជា​ប្រចាំខែ ដោយ​គិត​ទៅ​លើ​ការ​ផ្តល់​ចំណីអាហារ ការ​មើលថែ​ទាំ ការ​ព្យាបាល និង​ថ្លៃ​ជួល​មនុស្ស​ឱ្យ​ជួយ​មើលថែ​ទាំ និង​ដាក់​ចំណី​ចំនួន​២​នាក់ ដោយ​ផ្តល់​ប្រាក់ខែ​ឱ្យ​ពួក​គេ​២០០​ដុល្លារ​ក្នុង​ម្នាក់ ។ ម៉ា​ដាម​ថា សម្រាប់​ក្នុង​១​ឆ្នាំ​វិញ គឺ​ត្រូវ​ចំណាយ​ប្រាក់​មិន​ក្រោម​៣​ម៉ឺន​ដុល្លារ​ឡើយ សម្រាប់​ការ​ចិញ្ចឹមសត្វ​ទាំង​២​នេះ ដែល​ជា​ប្រាក់​ផ្ទាល់ខ្លួន ។

ក្នុង​នោះ​ក៏​មាន​ជំនួយ​ឧបត្ថម្ភ​ខ្លះ​ៗ​ពី​សប្បុរសជន​ក្នុង និង​ក្រៅប្រទេស​ផង​ដែរ ប៉ុន្តែ​វា​មិន​បាន​៣០​ភាគរយ នៃ​ប្រាក់​ដែល​ម៉ា​ដាម​ចំណាយ​ជា​ប្រចាំខែ​និង​ឆ្នាំ​ទេ ។ ប៉ុន្តែ​គាត់​បង្ហាញ​ពី​អារម្មណ៍​ពិត​ថា ការ​ចិញ្ចឹមសត្វ​ទាំង​២​ប្រភេទ​នេះ គឺ​កើត​ចេញពី​ចិត្ត និង​ក្តី​ស្រឡាញ់​យ៉ាង​ពិតប្រាកដ​ទៅ​កាន់​សត្វ​ទាំងនោះ ដោយ​មិន​បាន​គិត​និង​ខ្វល់ខ្វាយ​ពី​ប្រាក់​ដែល​បាន​ខាតបង់​នោះ​ឡើយ ហើយ​ម៉ា​ដាម​អះអាង​ថា​ក៏​មិនមែន​ចិញ្ចឹមសត្វ​ទាំងនេះ ដើម្បី​ធ្វើ​ជំនួញ​សម្រាប់​ចំណេញ​ផ្ទាល់ខ្លួន​នោះ​ទេ ។ ម៉ា​ដាម​លន់​បាន​រៀបរាប់​ថា សម្រាប់​ឆ្មា​ឱ្យ​នៅ​ជាន់​ខាងលើ​ដោយ​មាន​របាំង​មិន​ឱ្យ​ចុះ​មក​ក្រោម​ទេ ។ ជាន់​ខាងក្រោម​សម្រាប់​ឆ្កែ ។ ឆ្កែ​ធំ​ឱ្យ​នៅ​ដោយ​ធំ អាណា​តូច​រស់នៅ​ដោយ​តូច​ៗ ព្រោះ​ការពារ​មិន​ឱ្យ​វា​ខាំ​គ្នា សុទ្ធតែ​ដាក់​ឱ្យ​នៅ​ដាច់​ដោយឡែក ។

ឆ្កែ​និង​ឆ្មា​ទាំងនោះ​មាន​សត្វ​ខ្លះ​ត្រូវ​ឈឺ​ធ្ងន់​រហូត​ដល់​ងាប់ លោកស្រី​លន់ បាន​យក​វា​ដុត​បូជា​នៅ​ដី​ខាង​ក្រោយ​ផ្ទះ​របស់​គាត់ ហើយ​ក្នុង​នោះ​បាន​អុជ​ធូប​បួងសួង និង​បាន​យក​ឆ្អឹង​របស់​វា​ដាក់​ក្នុង​កោដ្ឋ ហើយ​យក​ទៅ​រក្សា​ទុក​នៅ​ក្នុង​អាសនៈ​ក្នុងផ្ទះ​របស់​គាត់​ទុក​សម្រាប់​អុជ​ធូប​រំលឹក​ដល់​ដួង​វិញ្ញាណក្ខន្ធ​សត្វ​ទាំងនោះ​ផង​ដែរ ។ គាត់​និយាយ​ថា ឆ្កែ​និង​ឆ្មា​សុទ្ធតែ​មាន​សៀវភៅ​ពេទ្យ​សម្រាប់​ចាក់​ថ្នាំ ។ ឆ្កែ​មួយ​ណា​ឈឺ គាត់​អញ្ជើញ​ពេទ្យសត្វ​មក​ព្យាបាល​ដោយ​មាន​សៀវភៅ​ឈ្មោះ​កត់ត្រា ព្រមទាំង​រក្សា​ទុក​ក្នុង​ទូ ដោយ​មាន​របៀប​រៀបរយ ។ ប៉ុន្តែ​វា​មិនសូវ​មាន​ជំងឺ​ទេ ។ ឆ្កែ​ចាស់ ឆ្កែ​មក​ថ្មី​មាន​ហូរហែ​ដែល​ពេល​ខ្លះ​មាន​គេ​ស្រឡាញ់​មក​សុំ​យក​ទៅ​ចិញ្ចឹម​ក៏​មាន​ដែរ គាត់​ព្រមឱ្យ​ប្រសិនបើ​ស្រឡាញ់​សត្វ​ពិតប្រាកដ​មែន ។ មាន​អ្នកខ្លះ​ឈប់​ចិញ្ចឹម​បាន​យក​មក​ប្រគល់​ឱ្យ​គាត់​ក៏​មាន​ដែរ គឺ​ទទួលយក​ឱ្យមក​រស់នៅ​ដោយ​សុខសាន្ត​មិន​រើសអើង​ទេ ។

ម៉ា​ដាម​លន់ ជា​ស្ត្រី​ស្អាត​មួយ​រូប​ដែល​ធ្លាប់​ស្លៀក​សម្លៀក​បំពាក់​លម្អ​លើ​រាង​កាយ​តម្លៃ​រាប់​ពាន់​ដុល្លារ​គួរ​ឱ្យ​គយគន់​ដោយសារ​តែ​មានទ្រព្យ​សម្បត្តិ​ស្តុកស្តម្ភ ប៉ុន្តែ​បើ​ក្រឡេក​មក​មើល​បច្ចុប្បន្ន​នេះ​វិញ ម៉ា​ដាម​លន់ ស្លៀកពាក់​ខោអាវ​ធម្មតា​មិន​មាន​គ្រឿងអលង្ការ​លម្អ​ខ្លួន​ដូច​ពី​ពេល​មុន​ៗ​ទៀត​ឡើយ ព្រោះតែ​ការ​ធ្វើខ្លួន​ឱ្យ​ធម្មតា ដើម្បី​នៅ​មើលថែ​រក្សា​ឆ្កែ​និង​ឆ្មា គឺជា​សេចក្តីសុខ​របស់​លោកស្រី ។ មួយ​រយៈពេល​ប៉ុន្មាន​ឆ្នាំ​ក្រោយ​ៗ​មកនេះ ម៉ា​ដាម​និយាយ​ថា​មិនសូវ​មាន​វត្តមាន​ទៅ​ចូលរួម​នៅ​តាម​កម្មវិធី​ផ្សេង​ៗ​ជាមួយ​អ្នក​ស្គាល់គ្នា​បាន​ដូច​មុន​ទៀត​ឡើយ ដោយសារ​តែ​មាន​ភាព​មមាញឹក​ខ្លាំង​បំផុត​ជាមួយ​សត្វ​ទាំង​២​ប្រភេទ​របស់​លោកស្រី ដោយ​រកតែ​ពេលវេលា​សម្រាក​ផ្ទាល់ខ្លួន​សឹងតែ​មិន​បាន​គ្រប់គ្រាន់ ។

សូម​បញ្ជាក់​ថា រៀង​រាល់ពេល​ដែល​កូន​ៗ និង​បងប្អូន​របស់​ម៉ា​ដាម​ដែល​មក​ពី​ប្រទេស​ក្រៅ មក​លេង​ម្តង​ៗ គឺ​ពួក​គេ​ពុំដែល​ទៅ​ដល់​ផ្ទះ​របស់​ម៉ា​ដាម​ឡើយ ដោយ​ពួក​គេ​ទៅ​ចាំ​ជួប​គ្នា​នៅ​សណ្ឋាគារ ហើយ​ទំនាក់ទំនង​ឱ្យ​លោកស្រី​ទៅ​កាន់​សណ្ឋាគារ​វិញ ព្រោះ​លំនៅ​ឋាន​របស់​គាត់​គឺ​សុទ្ធតែ​ឆ្កែ​និង​ឆ្មា​រត់​ប្រសាច​មើលទៅ​គួរ​ឱ្យ​រញ៉េរញ៉ៃ​បំផុត ពិសេស​គឺ​ក្លិន​លាមក និង​ទឹកនោម​របស់​វា ជះក្លិន​ស្ទើរតែ​ពាសពេញ​ផ្ទៃ​លំនៅ​ឋាន​ដ៏​ធំ​ទៅ​ហើយ ទោះបី​សម្អាត​បែប​ណា​ក៏​ដោយ ជា​ហេតុ​ធ្វើ​ឱ្យ​បងប្អូន​សាច់ញាតិ និង​កូន​ៗ​លោកស្រី មិន​អាច​ទៅ​លេង​ដល់​ក្នុងផ្ទះ​បាន​ដូច​ធម្មតា​ឡើយ ។

លោកស្រី​និយាយ​ថា កូន​ៗ​ទាំង​៧​នាក់​របស់​លោកស្រី បាន​ស្នើ​ឱ្យ​លោកស្រី​បញ្ឈប់​ការ​ចិញ្ចឹមសត្វ​ទាំង​២​ប្រភេទ​ខាងលើ​នេះ​ទៅ ហើយ​សុំ​ឱ្យ​លោកស្រី​ប្រើ​ជីវិត​ដែល​នៅ​មាន​ដើរ​លេង​ឱ្យ​សប្បាយចិត្ត ព្រោះ​ចាស់​ហើយ ដូច្នេះ​ហើយ​កូន​ៗ​លោកស្រី​មិន​ចង់​ឃើញ​ម្តាយ​នៅ​ហត់នឿយ​ជាមួយ​សត្វ​ទាំងនោះ​ទេ ។ ប៉ុន្តែ​យ៉ាង​ណា​ក្តី​ម៉ា​ដាម​លន់ ពុំ​ទទួលយក​សំណើ​របស់​កូន​ៗ​ឡើយ ហើយ​គាត់​បញ្ជាក់​ថា គាត់​នឹង​មិន​ទៅ​ណា​ចាក​ចោល​សត្វ​ទាំង​២​ប្រភេទ​នេះ​ទេ ពោល​គឺ​គាត់​នឹង​ប្រើ​ជីវិត​ដែល​នៅ​សេសសល់​រស់នៅ​ជាមួយ​ពួក​វា មើលថែ​ទាំ​ពួក​វា​ជា​រៀង​រហូត ព្រោះ​វា​ជា​សេចក្តីសុខ​ដ៏​ធំធេង​របស់​គាត់​នា​ពេល​បច្ចុប្បន្ន​នេះ បើ​ទោះជា​មានការ​ហត់នឿយ​ខ្លាំង​យ៉ាងណា​ក៏​ដោយ​មិន​ព្រម​ឃ្លាតឆ្ងាយ​ពី​ពួក​វា​ឡើយ ៕ (សម្រួលដោយ៖ ស្រីណា​)

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

០៨:៥០ | ក្នុងស្រុក

តើ​នឹង​មាន​អ្វី​កើតឡើង នៅ​ពេល​តារា​សម្តែង​ភាពយន្ត​ដ៏​ល្បី ទេព រិ​ន​ដា​រ៉ូ និង​តារា​ល្បី​ក្នុង​បណ្តាញ​សង្គម ហេង វិសាល ប្រឈម​មុខ​នឹង​សត្វព្រៃ​នៅ​ខេត្តបាត់ដំបង?

ការស្ទង់មតិគេហទំព័រថ្មី




សូម​អរគុណ