រាជធានីភ្នំពេញ ៖ ទីផ្សារធ្វើអាជីវកម្មតាមបណ្តាញនៅកម្ពុជានៅមានកង្វះការអប់រំចំណេះដឹងវិជ្ជាជីវៈ និងផ្លូវច្បាប់ដែលធ្វើឲ្យងាយបង្កហានិភ័យដល់អ្នកប្រើប្រាស់ នេះបើតាមអ្នកជំនាញផ្នែកទីផ្សារបណ្តាញ ។ ការអះអាងនេះស្របពេលដែលទីផ្សារបណ្តាញនៅប្រទេសកម្ពុជាកំពុងមានសកម្មភាពយ៉ាងផុលផុស ហើយអ្នកប្រកបរបរមួយនេះជួបបញ្ហាប្រឈមច្រើននៅចំពោះមុខពោល គឺសមាជិកអ្នកធ្វើអាជីវកម្មបណ្តាញមានចំនួនជាង៧ពាន់នាក់ ។
ពាក់ព័ន្ធទៅនឹងទីផ្សារបណ្តាញកម្ពុជា នាពេលបច្ចុប្បន្ននេះដែរ លោកបណ្ឌិត ឡី សុភាព ប្រធាន សមាគម អ្នកទីផ្សារបណ្តាញកម្ពុជា និងជានាយកវិទ្យាស្ថានអាជីវកម្មអន្តរជាតិបានបញ្ជាក់ឲ្យដឹងនៅថ្ងៃ ទី១១ កញ្ញាថា លោកបានកត់សម្គាល់ឃើញថា អាជីវករដែលកំពុងប្រត្តិបត្តិការអាជីវកម្មបណ្តាញ បច្ចុ ប្បន្ននៅមានកង្វះការអប់រំចំណេះដឹងវិជ្ជាជីវៈច្បាស់លាស់ធ្វើឲ្យងាយបង្កហានិភ័យបង្កការប៉ះពាល់ដល់អ្នកប្រើប្រាស់ និងពិសេសផ្លូវច្បាប់ថែមទៀត ។
លោកអំពាវនាវឲ្យអ្នកប្រកបលើមុខរបរនេះត្រូវមានការប្រុងប្រយ័ត្នខ្ពស់ ព្រមជាមួយគ្នា ដើម្បីជៀសវាងកំហុសឆ្គងទាំងអស់នេះពួកគេងាកមករៀនសូត្រត្រឹមត្រូវ ។ អ្វីដែលសំខាន់នោះ គឺត្រូវឆ្លងកាត់ការបណ្តុះបណ្តាល និងមានវិញ្ញាប័ណ្ណបត្របញ្ជាក់ពីជំនាញអាជីវកម្មទីផ្សារបណ្តាញ ។
ពាក់ព័ន្ធក្នុងរឿងនេះដែរ លោកបណ្ឌិត ឡី សុភាព បានបញ្ជាក់ថា «យើងឃើញថា ទីផ្សារបណ្តាញយើងបច្ចុប្បន្នមានអ្នកប្រកបមុខរបរនេះច្រើន តែពួកគាត់មិនបានយល់ដឹងពីបញ្ហាហានិភ័យនោះទេ ។ ហេតុនេះមានតែការទទួលការបណ្តុះបណ្តាលវិជ្ជាជីវៈនេះប៉ុណ្ណោះទើបអាចចៀសផុតពីរឿងធំៗក្នុងនេះដូចជា ក្រុមហ៊ុនដែលមិនមានប្រភពច្បាស់លាស់ ការចែកភាគលាភ និងប្រយោជន៍មិនសមភាពបានត្រឹមសន្យាខ្យល់ ហើយបិទទៅបាត់ទៅ ។ មួយវិញទៀតអ្នកប្រកបអាជីវកម្មទីផ្សារបណ្តាញអាចនិយាយលើស ឬចាញ់បោកតគ្នា និងបោកប្រាស់តគ្នាដោយមិនដឹងខ្លួន» ។
លោកបណ្ឌិតបានបន្តឲ្យដឹងថា ចំពោះការបានទទួលបណ្តុះបណ្តាលនេះធ្វើឲ្យយើងដឹងមិនអាចឲ្យគេ មកបោកប្រាស់បាន ហើយការនិយាយស្តីអំពីការផ្សព្វផ្សាយផលិតផល ឬសេវាកម្មដែលយើងកំពុងប្រត្តិបត្តិការនេះឃោសនាបានត្រឹមត្រូវមិនពន្លើសការពិតធ្វើឲ្យទីផ្សារកាន់តែល្អប្រសើរក្នុងការប្រកបអាជីវកម្មទីផ្សារបណ្តាញទាំងខ្នាតតូច និងមធ្យម ដោយធ្វើឲ្យអតិថិជនកាន់តែមានជំនឿ និងអាជីពមួយនេះកាន់តែរឹងមាំ ។ លោកបណ្ឌិតបានបញ្ជាក់យ៉ាងដូច្នេះថា «ក្នុងនាមប្រធានសមាគម អ្នកទីផ្សារបណ្តាញកម្ពុជាខ្ញុំចង់ឲ្យមានការអភិវឌ្ឍដែលធ្វើឲ្យយុវជន និងប្រជាពលរដ្ឋប្រកបអាជីវកម្មខ្នាតតូច និងមធ្យមនេះមានជំនាញវិជ្ជាជីវៈ ដើម្បីអភិវឌ្ឍន៍សេដ្ឋកិច្ចជាតិបានត្រឹមត្រូវស្របតាមគោលនយោបាយ របស់រាជរដ្ឋាភិបាល» ៕ កែសម្រួលដោយ ៖សុឃាក់
ចែករំលែកព័តមាននេះ