រាជធានីភ្នំពេញ ៖ ជនសង្ស័យម្នាក់បានខ្ចីម៉ូតូមិត្តភក្ដិម្នាក់ដោយប្រាប់ថា ជិះទៅឌុបមិត្តភក្ដិម្នាក់ទៀត ខណៈនោះដោយសារតែជាសម្លាញ់នឹងគ្នាបើខ្ចីហើយមិនឲ្យមិនកើតនាំអាក់អន់ចិត្ត ម្យ៉ាងមិននឹកស្មានថា ពួកម៉ាករូបនេះមានគំនិតអាក្រក់ទើបយល់ព្រមឲ្យខ្ចីជិះ ។
លុះក្រោយពេលបានម៉ូតូដល់ដៃជនសង្ស័យក៏ជិះយកទៅដាក់បញ្ចាំនៅក្នុងផ្សារឃ្លាំងរំសេវត្រឹមតែ២៥០ដុល្លារប៉ុណ្ណោះ និងដើរស៊ីចាយអស់ លុះ២ថ្ងៃក្រោយមកទើបម្ចាស់តាមរកឃើញក៏ចាប់ខ្លួនប្រគល់ជូននគរបាលសាកសួរ និងចាត់ការតាមច្បាប់តែម្ដង ។
ហេតុការណ៍នេះបានកើតឡើង កាលពីវេលាព្រឹថ្ងៃទី០៧ ខែកញ្ញា ឆ្នាំ២០១៩ នៅបន្ទប់ជួល ភូមិជ្រៃកោង សង្កាត់ចោមចៅ៣ ខណ្ឌពោធិសែនជ័យ លុះ២យប់ និង២ថ្ងៃក្រោយមកគឺនៅវេលាម៉ោង១១ព្រឹកថ្ងៃទី៩ កញ្ញា ទើបម្ចាស់ម៉ូតូបានប្រទះឃើញនៅម្តុំពោធិ៍ចិនតុង ភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ ក៏ឃាត់ខ្លួននាំយកទៅប្រគល់ជូននគរបាលប៉ុស្តិ៍ចោមចៅ២ ដើម្បីសាកសួរ និងកសាងសំណុំរឿងចាត់ការតាមផ្លូវច្បាប់តែម្ដង ។
យុវជនដែលជាជនសង្ស័យខាងលើឈ្មោះ ហេន ហឿង ហៅម៉ៅ អាយុ២០ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងភូមិជ្រៃកោង សង្កាត់ចោមចៅ២ ។ ចំណែកយុវជនដែលជាម្ចាស់ម៉ូតូឈ្មោះ ឆេង សំណាង អាយុ១៩ឆ្នាំ មុខរបរកម្មករ ស្នាក់នៅផ្ទះជួល បន្ទប់ក្បែរគ្នា ហើយបាត់បង់ម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១២ ពណ៌ខ្មៅ ១គ្រឿង ។
ក្រោយពេលចាប់ខ្លួនជនសង្ស័យបានសារភាពប្រាប់នគរបាលថា ខ្លួនបានប្រើល្បិចខ្ចីម៉ូតូពីជនរងគ្រោះដោយកុហកថា ជិះទៅទទួលយកមិត្តភក្ដិម្នាក់ទៀត ប៉ុន្តែក្រោយពីខ្ចីបានហើយខ្លួនបានជិះម៉ូតូនោះយកទៅបញ្ចាំនៅផ្សារឃ្លាំងរំសេវ សង្កាត់ទឹកល្អក់៣ ខណ្ឌទួលគោក ក្នុងតម្លៃ២៥០ដុល្លារ រួចហើយបានដើរស៊ីចាយរហូតដល់អស់ ទើបត្រឡប់មកម្ដុំផ្សារពោធិ៍តុងស្រាប់តែត្រូវបានម្ចាស់ម៉ូតូរកឃើញចាប់ខ្លួនតែម្ដង ។ បន្ទាប់មកនគរបាលប៉ុស្តិ៍កាកាប១បាន បញ្ជូនជនសង្ស័យខាងលើឲ្យនគរបាលប៉ុស្តិ៍ចោមចៅ២ សាកសួរ និងកសាងសំណុំរឿងចាត់ការបន្ត ៕
កែសម្រួលដោយ ៖ សំណាង
ចែករំលែកព័តមាននេះ