ខេត្តព្រះវិហារ ៖ អស់រយៈពេល៣ថ្ងៃហើយ ដែលក្មេងប្រុសអាយុ២ឆ្នាំម្នាក់ ត្រូវទឹកហូរកួចយកទៅបាត់រួមទាំងម៉ូតូមួយគ្រឿងផងនោះ នៅចំណុចទឹកធ្លាក់បុស្សស្បូវ លើភ្នំដងរែក ព្រំដែនកម្ពុជា-ថៃ ស្ថិតក្នុងភូមិតេជោបុស្សស្បូវ ឃុំស្រអែម ស្រុកជាំក្សាន្ត ខេត្តព្រះវិហារ ហើយត្រូវបានឪពុកប្រទះឃើញសព និងម៉ូតូមួយគ្រឿងក្បែរថ្មមួយកន្លែងចម្ងាយពីកន្លែងកើតហេតុប្រមាណជា២០០ម៉ែត្រ កាលពីថ្ងៃទី៦ ខែកញ្ញា ឆ្នាំ២០១៩ កន្លងទៅនេះ ។ គួររំលឹកថា រសាត់តាមទឹកទៅដល់ណាហើយកូនប្រុស?
លោកឧត្តមសេនីយ៍ត្រី ឆយ បូរិន នាយសេនាធិការដ្ឋាន នៃស្នងការដ្ឋាននគរបាលខេត្តព្រះវិហារ បានឲ្យដឹងថា កុមារារងគ្រោះដែលស្លាប់ឈ្មោះគង់ រតនះកាន់តា អាយុ២ឆ្នាំ មានឪពុកឈ្មោះ គង់ សុវណ្ណថារី អាយុ៣៨ឆ្នាំ ជាយោធានៅលើភ្នំដងរែក ភូមិសាស្ត្របុស្សស្បូវ ព្រំដែនកម្ពុជា-ថៃ និងម្តាយឈ្មោះ ឡៃ ថៃ អាយុ២៤ឆ្នាំ ។
លោកឧត្តមសេនីយ៍ត្រី ឆយ បូរិន បានបន្តឱ្យដឹងថា កាលពីថ្ងៃទី៣ ខែកញ្ញា ក្មេងប្រុសរងគ្រោះខាងលើដែលបានបាត់ខ្លួនដោយសារទឹកហូរកួចធ្លាក់តាមទឹកជ្រោះបុស្សស្បូវនោះ ត្រូវបានឪពុកប្រទះឃើញសពកូនស្លាប់យ៉ាងអាណាចអាធ័ម និងម៉ូតូមួយគ្រឿងទៀតក្បែរថ្មមួយកន្លែង ចម្ងាយពីកន្លែងកើតហេតុប្រមាណជា២០០ម៉ែត្រ ។
លោកឧត្តមសេនីយ៍ត្រី ឆយ បូរិន បានបន្តឱ្យដឹងថា ក្រោយកើតមានគ្រោះអកុសលខាងលើនេះ សមត្ថកិច្ចបានសហការជាមួយយោធា និងក្រុមគ្រួសារក្មេងរងគ្រោះ ដើម្បីតាមរកសពកុមារាដែលបាត់ខ្លួនដោយសារទឹកហូរកួចយកទៅបាត់ លុះរហូតមកដល់វេលាម៉ោង១រសៀលថ្ងៃទី៦ ខែកញ្ញា ឆ្នាំ២០១៩នេះ ទើបឪពុកប្រទះឃើញសព ហើយបន្ទាប់មកក៏បានយកសពកូនទៅធ្វើបុណ្យតាមប្រពៃណី ។
សូមបញ្ជាក់ថា កាលពីវេលាម៉ោង៧និង១៥នាទីយប់ថ្ងៃទី៣ ខែកញ្ញា ឆ្នាំ២០១៩ ខណៈដែលកុមារារងគ្រោះខាងលើជិះម៉ូតូជាមួយឪពុកម្តាយធ្វើដំណើរឆ្លងកាត់ទំនប់បង្ហៀទឹកតេជោបុស្សស្បូវ ក៏ជួបគ្រោះអកសុល ដោយសារទឹកហូរកួចខ្លាំងធ្វើអោយដួលម៉ូតូ បណ្តាលឱ្យស្ត្រីជាម្តាយបោកនឹងថ្មសន្លប់បាត់ស្មារតី ខណៈកំពុងអោបកូនក៏របូតដៃ ហើយក៏ត្រូវទឹកហូរកួចទាំងកូន និងម៉ូតូមួយគ្រឿងយកទៅបាត់តែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ