ខេត្តបាត់ដំបង ៖ សេចក្តីរាយការណ៍បឋមបានឲ្យដឹងថា ជនដៃដល់ចំនួន២នាក់ ត្រូវសមត្ថកិច្ចឃាត់ខ្លួនភ្លាមៗក្រោយពីប្រើប្រាស់កាំភ្លើងកែច្នៃព្រូតគ្នាវាយទៅលើបុរសម្នាក់ បណ្ដាលឲ្យរងរបួសធ្ងន់កាលពីវេលាម៉ោង១០និង៣០នាទីព្រឹក ថ្ងៃទី០៨ កញ្ញា នៅភូមិប៉ោយតាសេក ឃុំបឹងព្រីង…
ខេត្តបាត់ដំបង ៖ សេចក្តីរាយការណ៍បឋមបានឲ្យដឹងថា ជនដៃដល់ចំនួន២នាក់ ត្រូវសមត្ថកិច្ចឃាត់ខ្លួនភ្លាមៗក្រោយពីប្រើប្រាស់កាំភ្លើងកែច្នៃព្រូតគ្នាវាយទៅលើបុរសម្នាក់ បណ្ដាលឲ្យរងរបួសធ្ងន់កាលពីវេលាម៉ោង១០និង៣០នាទីព្រឹក ថ្ងៃទី០៨ កញ្ញា នៅភូមិប៉ោយតាសេក ឃុំបឹងព្រីង ស្រុកថ្មគោល ដោយសារតែរឿងគំនុំ ។
សេចក្តីរាយការណ៍បានបន្ត លោកឧត្តមសេនីយ៍ត្រី ជេត វណ្ណនី ស្នងការរងខេត្តបានឲ្យដឹងថា ជនដៃដល់ទាំង២នាក់ ម្នាក់ឈ្មោះ ចាន់ ធានី ភេទប្រុស អាយុ២៩ឆ្នាំ និងម្នាក់ទៀតឈ្មោះ សឿង សឹង ភេទប្រុស អាយុ២២ឆ្នាំ ពួកគេរស់នៅភូមិប៉ោយតាសេក ឃុំបឹងព្រីង ស្រុកថ្មគោល រីឯជនរងគ្រោះឈ្មោះ ធឿន ផល្លី ភេទប្រុស អាយុ៣១ឆ្នាំ រស់នៅភូមិ ឃុំជាមួយគ្នាដែរ ។
លោកស្នងការរងបានប្រាប់ថា ជនដៃដល់បានប្រើប្រាស់កាំភ្លើងកែច្នៃព្រូតគ្នាវាយជនរងគ្រោះបណ្ដាលឲ្យរងរបួសបាក់កែងដៃធ្វេង និងរបួសភ្លៅខាងឆ្វេងយ៉ាងធ្ងន់ធ្ងរ តែក្រោយកើតហេតុសមត្ថកិច្ចបានចុះអន្តរាគមន៍ឃាត់ខ្លួនជនដៃដល់ទាំង២នាក់ភ្លាមៗដែរ ហើយបើតាមចម្លើយសារភាពរបស់ជនសង្ស័យថា អំពើហិង្សាដោយចេតនានេះ គឺផ្ដើមចេញពីរឿងគំនុំ ។
ជនសង្ស័យឈ្មោះ ចាន់ ធានី និងសឿង សឹង បានសារភាពថា ពួកខ្លួនពិតជាបានព្រូតគ្នាវាយជនរងគ្រោះមែន ដោយសារជនរងគ្រោះជំពាក់លុយមិនសង ។ ជននេះត្រូវបានសមត្ថកិច្ចស្រង់ចម្លើយបឋមថា ដោយសារខឹងជនរងគ្រោះជំពាក់លុយមិនសងទើបទាញកាំភ្លើងកែច្នៃ(កាំភ្លើងខ្យល់) សំពងតែម្ដងទៅ ។
នៅក្នុងករណីនេះលោកឧត្តមសេនីយ៍ត្រី ជេត វណ្ណនី បានមានប្រសាសន៍ថា បើយោងលើបទល្មើសដែលពួកគេបានប្រព្រឹត្តនេះជនទាំង២នាក់អាចត្រូវចោទប្រកាន់ពីបទ«ហិង្សាដោយចេតនាមានស្ថានទម្ងន់ទោស » ។ ទោះយ៉ាងណាពេលនេះមន្ត្រីជំនាញកំពុងសួរនាំជនទាំង២នាក់ ដើម្បីកសាងសំណុំរឿងបញ្ជូនទៅតុលាការហើយ ៕ កែសម្រួលដោយ ៖ សុឃាក់
ចែករំលែកព័តមាននេះ