ប្រទេសបាហាម៉ា ៖ ព្យុះសង្ឃរា DORIAN ដែលពេលនេះបានថមថយកម្លាំងមកជាព្យុះប្រភេទទី២ កំពុងតែបោកបក់ឆ្ពោះទៅកាន់សហរដ្ឋអាមេរិកនាថ្ងៃទី៤ ខែកញ្ញា ឆ្នាំ២០១៩ ក្រោយពីសម្លាប់មនុស្ស២០នាក់នៅបាហាម៉ា និងបង្កការបំផ្លិចបំផ្លាញដ៏សែនទារុណបំផុតនៅប្រទេសដែនកោះនោះមក។
នាយប់ថ្ងៃទី៤កញ្ញារដ្ឋមន្ត្រីសុខាភិបាលបាហាម៉ាថ្លែងតាមបណ្ដាសារព័ត៌មានក្នុងស្រុកនិងអាមេរិកថា ចំនួនអ្នកស្លាប់បានឡើងពី៧នាក់ដល់២០នាក់ ក្នុងនោះ១៧នាក់លើកោះABACOSនិង៣នាក់លើកោះGRAND BAHAMA ហើយតុល្យការអាចបន្តកើនឡើងទៀត។
បណ្ដារូបភាពថតពីលើអាកាសហើយផ្សាយតាមទូរទស្សន៍អាមេរិកCNN បង្ហាញទិដ្ឋភាពនៃការបំផ្លាញដែលមានទំហំធំធេងបំផុត ជាមួយផ្ទះទាំងឡាយរងការបំផ្លាញ និងរបើកដំបូល បណ្ដារថយន្តត្រូវទឹកលិចឬក្រឡាប់ ព្រមទាំងទឹកជំនន់ដ៏ធំនិងបណ្ដានាវាក្រឡាប់។ ការបំផ្លាញមើលទៅដាច់កន្ទុយភ្នែក។ បាហាម៉ាពិតជារងការបំផ្លាញសែនទារុណបំផុត។
ចាត់ទុកជាព្យុះសង្ឃរាខ្លាំងជាងគេបំផុតកម្រិតទី៥ ពេលវាយប្រហារលើបាហាម៉ា ព្យុះDORIANបន្ទាប់មកបានចុះថមថយកម្លាំងមកជាព្យុះកម្រិតទី២ ជាមួយល្បឿងខ្យល់ជាង១៧៥គីឡូម៉ែត្រក្នុង១ម៉ោង។ ទោះបីជាខ្យល់បោកបក់មិនសូវខ្លាំងតែព្យុះនេះនៅតែមានគ្រោះថ្នាក់។ នេះបើតាមការព្យាករណ៍ឧតុនិយម ដែលមិនទាន់អាចកំណត់ទិសដៅរបស់វាឲ្យប្រាកដ។ អភិបាលរដ្ឋផ្លរីដាបានហៅព្យុះនេះថា ជាព្យុះស្មុគស្មាញមួយ។
វារំកិលខ្លួនមកក្បែររដ្ឋផ្លរីដានាយប់ថ្ងៃទី៤កញ្ញា ហើយពង្រឹងកម្លាំងជាព្យុះប្រភេទទី៣ មុនពេលបោកបក់តាមបណ្ដោយឆ្នេរសមុទ្រភាគអាគ្នេយ៍សហរដ្ឋអាមេរិកនិងរដ្ឋចចជៀ ការ៉ូលីនខាងត្បូងនិងការ៉ូលីនខាងជើង។ រដ្ឋការ៉ូលីនទាំង២អាចមានគ្រោះថ្នាក់នៃទឹកជន់លិចជាមួយភ្លៀងធ្លាក់ខ្លាំងនិងរលកសមុទ្រធំៗ។ មនុស្សជាច្រើនពាន់នាក់ទទួលបញ្ជាឲ្យជម្លៀសចេញ ពីបណ្ដាតំបន់រងការគំរាមកំហែង៕ (កែសម្រួលដោយ ៖ បុប្ផា)
ចែករំលែកព័តមាននេះ