រាជធានីភ្នំពេញ ៖ មិនមែនគ្រាន់តែចូលប្រកួតលេងៗដើម្បីសុខភាពដូចមុននោះទេ ប៉ុន្តែគេកត់សម្គាល់ថា តារាចម្រៀងនិងតារាល្បីៗមួយចំនួនកំពុងក្លាយជាកីឡាករបាល់ទាត់អាជីពតែម្ដង ហើយតារាទាំងនោះទទួលបានការគាំទ្រក្នុងអាជីពថ្មីនោះទៀតផង ។ កន្លងមក គេកត់សម្គាល់តែកីឡាកររូបសង្ហាៗក្នុងពិភពបាល់ទាត់ បានក្លាយជាតារាសម្ដែង…
រាជធានីភ្នំពេញ ៖ មិនមែនគ្រាន់តែចូលប្រកួតលេងៗដើម្បីសុខភាពដូចមុននោះទេ ប៉ុន្តែគេកត់សម្គាល់ថា តារាចម្រៀងនិងតារាល្បីៗមួយចំនួនកំពុងក្លាយជាកីឡាករបាល់ទាត់អាជីពតែម្ដង ហើយតារាទាំងនោះទទួលបានការគាំទ្រក្នុងអាជីពថ្មីនោះទៀតផង ។
កន្លងមក គេកត់សម្គាល់តែកីឡាកររូបសង្ហាៗក្នុងពិភពបាល់ទាត់ បានក្លាយជាតារាសម្ដែង ដូច
ជា លោក លី វ៉ាហេទ និងកីឡាករ ចាន់ វឌ្ឍ នាកាជាដើម ប៉ុន្តែសម្រាប់តារាអាជីពល្បីៗ ដែលបានក្លាយជាកីឡាករបាល់ទាត់ខ្លាំងៗវិញ គ ហាក់មិនសូវចាប់អារម្មណ៍ទេ ។ អ៊ីចឹងហើយ ទើបកោះសន្តិភាពសូមបង្ហាញជូននូវសមាសភាពកីឡាករមួយចំនួន ដែលសុទ្ធសឹងតែជាតារាល្បីៗ។
តារាចម្រៀង ខេម ថ្វីដ្បិតជាតារាចម្រៀងក៏ពិតមែន តែបានវិវត្តន៍ខ្លួនក្លាយជាអ្នកទាត់បាល់អាជីពមួយរយៈមកហើយ ដោយស្ថិតក្នុងក្រុម Cambodia Super Star និងបានបង្ហាញវត្តមានលេងជាមួយក្រុមថៃកាលពីថ្ងៃទី២៩ ខែសីហា កន្លងទៅ ជួយឲ្យក្រុមទាំងមូលបានឈ្នះក្រុមថៃក្នុងលទ្ធផល៥ទល់៤ កក្រើកពហុកីឡដ្ឋានជាតិអូឡាំពិកទៀតផង ។
សេង មង្គល អតីតហ្វ្រេសស៊ីប៊យ និងជាតារាសម្ដែងល្បីឈ្មោះរូបនេះ បានក្លាយជាកីឡាករបាល់ទាត់អាជីពប្រមាណ១ឆ្នាំមកហើយ ក្នុងក្រុមបាល់ទាត់មហាហង្ស និងក្នុងក្រុម Cambodia Super Star ។ រូបគេគឺជាសមាជិកក្រុមដែលមានថ្វីជើង និងមានស្នាដៃទាត់បាល់ចូលទី ធ្វើឲ្យក្រុមរបស់គេមានគ្រាប់បាល់ជាប្រចាំ ។
សេង មង្គល ត្រូវបានក្រុមចាត់ទុកថាជាសមាជិកឆ្នើមក្នុងក្រុមទៀតផង ដែលការប្រកួតបាល់បានល្អ ទាំងកម្លាំងរត់ ទាំងបច្ចេកទេសស៑ុតបាល់ បានល្អមិនចាញ់កីឡាករបាល់ទាត់អាជីពឡើយ។
ភឹម តារាវិបុល តារាសម្ដែងរូបនេះក៏ជាកីឡាករបាល់ទាត់អាជីពដែលមានសមត្ថភាពមិន
អន់ដែរ ។ រូបគេគឺជាអ្នកចាំទីដែលសង្គ្រោះគ្រាប់បាល់បានយ៉ាងល្អ ស្ទើរតែគ្រប់ពេលក្រុមមហាហង្សមានមុខប្រកួតក្នុងក្រុមអាជីព និងពាក់កណ្ដាលអាជីព ។
ហេង នរៈកក្កដា តារាសម្ដែងរូបនេះលេងខ្សែប្រយុទ្ធឲ្យក្រុមមហាហង្ស និងក្រុម Cambodia Super Star ដោយស្វែងរកគ្រាប់បាល់ជួយក្រុមឲ្យឈ្នះស្ទើរគ្រប់លើក ។ ក្រៅពីការសម្ដែង រូបគេចំណាយច្រើនលើការហ្វឹកហាត់បាល់ទាត់ និងទទួលលេងបាល់ទាត់ជាមួយក្រុមផ្សេងជាផ្លូវការកម្របាត់មុខណាស់ ។ ហេង នរៈកក្កដា បានទាំងប្រកាសថា អាជីពបាល់ទាត់គឺអាជីពទី២របស់ខ្លួនក្រៅពីសម្ដែងនោះផង ។
ជា សុវណ្ណនរាហ៍ តារាសម្ដែងរូបនេះក៏លេងបាល់ទាត់បានល្អណាស់ដែរ បើទោះជារូបគេមិនសូវសកម្មដូចតារាប៉ុន្មាននាក់ខាងលើ ដែលស្ទើរតែចាប់បាល់ទាត់ជាអាជីពក្តី ។ ក្រៅពីតារាខាងលើ នាយពែកមី នាយចឺម វីជេដាដា នាយក្ដី និងតារាសម្ដែង តារាចម្រៀងជាច្រើននាក់ទៀត ក៏កំពុងសកម្មក្នុងកីឡាបាល់ទាត់ដែរក្នុងរយៈពេលចុងក្រោយនេះ ដោយគ្រាន់តែតារាប៉ុន្មាននាក់ខាងលើ គឺសកម្មនិងលេចធ្លោជាង ៕ (កែសម្រួលដោយ ៖ បុប្ផា)
ចែករំលែកព័តមាននេះ