រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានធ្វើការជំរុញសហព័ន្ធកីឡាយូដូកម្ពុជា ត្រូវពង្រឹងការធ្វើការងារជាមួយសហព័ន្ធកីឡាយូដូអន្ដរជាតិនិងអាស៊ី ដើម្បីធានាការអភិវឌ្ឍន៍ និងផលិតធនធានមនុស្សប្រកបដោយសមត្ថភាព សម្រាប់ត្រៀមធ្វើម្ចាស់ផ្ទះកីឡាស៊ីហ្គេមលើកទី៣២ នាឆ្នាំ២០២៣ ។
លោកអគ្គលេខាធិការ NOCC បានថ្លែងជំរុញបែបនេះ នៅក្នុងពិធីបើកវគ្គសាមគ្គីអូឡាំពិកស្ដីពីគ្រូបង្វឹកកីឡាយូដូ ដែលរៀបចំធ្វើនៅទីស្នាក់ការ NOCC កាលពីព្រឹកថ្ងៃទី៤ ខែកញ្ញា ។ លោកថ្លែងថា សហព័ន្ធអន្ដរជាតិ គឺជាអាណាព្យាបាល ដូច្នេះពួកគេមានភារកិច្ចជួយបណ្ដាប្រទេសជាសមាជិក រួមទាំងកម្ពុជាដែរ ។
ហេតុនេះ កម្ពុជាត្រូវរៀបចំផែនការឲ្យបានច្បាស់លាល់ ដោយផ្អែកលើការត្រៀមធ្វើម្ចាស់ផ្ទះស៊ីហ្គេម ដើម្បីទទួលបានការជួយគាំទ្រពីសហព័ន្ធអន្ដរជាតិ ទាំងបច្ចេកទេស និងសម្ភារជាដើម ។
បច្ចុប្បន្ន គណៈកម្មាធិការជាតិរៀបចំការ ប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ឬCAMSOC បានត្រៀមថវិកាដើម្បីជួយដល់ សហព័ន្ធកីឡាជាតិ ដែលត្រូវបញ្ជូនគ្រូនិងកីឡា ករកីឡាការិនីទៅហ្វឹកហាត់ ឬរៀនសូត្រនៅ ក្រៅស្រុកដែរ ។ ហេតុនេះ សហព័ន្ធគ្មានអ្វីត្រូវ បារម្ភពីរឿងបញ្ហាថវិកានោះទេ សំខាន់សហព័ន្ធ ត្រូវធ្វើការជាមួយសហព័ន្ធអន្ដរជាតិ ដើម្បីទទួល បានព័ត៌មានថ្មីៗដែលអាចចូលរួម សូម្បីការបណ្ដុះបណ្ដាលអាជ្ញាកណ្ដាល ចៅក្រម ក៏ជារឿងចាំបាច់ដែរ ។
លើសពីនេះ លោកក៏បានជំរុញឲ្យបញ្ជូនគ្រូ និងកីឡាករចូលរួមប្រកួតរាល់ព្រឹត្តិការណ៍អន្ដរ ជាតិ ពិសេសព្រឹត្តិការណ៍ World Championship ព្រោះគឺជាឱកាសដ៏ល្អដើម្បីរៀនសូត្រ និងដកស្រង់បច្ចេកទេសមកអភិវឌ្ឍន៍សមត្ថភាពរបស់ខ្លួន ក៏ដូចជាការទាក់ទងកូនខ្មែរនៅក្រៅប្រទេសដែលចេះលេងកីឡាយូដូបានមកចូលរួមបង្ហាញសមត្ថភាព និងប្រកួតដណ្ដើមកិត្តិយសជូនជាតិទៀតផង ។ លោកសង្ឃឹមថា សហព័ន្ធនឹងអាចធ្វើបាន ដើម្បីសម្រួចទិសដៅស៊ីហ្គេម ឆ្នាំ២០២៣ ឲ្យកាន់តែមុតស្រួច ។
វគ្គសាមគ្គីអូឡាំពិកស្ដីពីគ្រូបង្វឹកកីឡាយូដូ ទទួលបានការឧបត្ថម្ភគាំទ្រពីអង្គការសាមគ្គីអូឡាំពិក និងគណៈកម្មាធិការជាតិអូឡាំពិកកម្ពុជា និងគ្រោងធ្វើឡើងចាប់ពីថ្ងៃទី៣ដល់១៣ ខែកញ្ញា ឆ្នាំ២០១៩ ដោយមានសិក្ខាកាមចូលរួមសរុប២៤នាក់ ហើយបង្រៀនដោយលោក Amar Meridia គ្រូឧទ្ទេសមកពីសហព័ន្ធកីឡាយូដូអន្ដរជាតិ ៕ (កែសម្រួលដោយ ៖ បុប្ផា)
ចែករំលែកព័តមាននេះ