រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន ប្រចាំឆ្នាំ២០១៤ (Hun Sen Cup 2014) លើកទី៨ ដែលបានធ្វើការប្រកួតតាំងពីថ្ងៃទី២២ មករា មកនោះ ពេលនេះបានរកឃើញម្ចាស់ពានរង្វាន់ហើយគឺក្រុមអគ្គស្នងការដ្ឋាននគរបាលជាតិ បន្ទាប់ពីបានលេងឈ្នះក្រុមបៀលប្រាយយូណាយធីត នៅវគ្គផ្ដាច់ព្រ័ត្រក្នុងលទ្ធផល២ទល់០ កាលពីល្ងាចថ្ងៃទី១៥ មីនា ឆ្នាំ២០១៤ នៅពហុកីឡដ្ឋានជាតិអូឡាំពិក ។
ស្ថិតក្នុងបរិយាកាសដ៏សប្បាយរីករាយលាយឡំនឹងសម្រែកគាំទ្រពីទស្សនិកជនរាប់ពាន់នាក់ដែលបានចូលរួមទស្សនា ព្រមទាំងមានវត្ដមានរបស់លោក ប៉ា សុជាតិវង្ស អភិបាលរាជធានីភ្នំពេញ លោកនាយឧត្ដមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា ព្រមទាំងដៃគូសហការឧបត្ថម្ភជាតិ និងអន្ដរជាតិជាច្រើនដែលបានត្រៀមខ្លួនប្រគល់ពានរង្វាន់ដល់ម្ចាស់ជ័យលាភីនោះ បានធ្វើឱ្យការប្រកួតរវាងក្រុមទាំងពីរកាន់តែពុះកញ្ជ្រោលឡើង ។
ជំនួបចុងក្រោយរវាងក្រុមអគ្គស្នងការដ្ឋាននគរបាលជាតិនិងក្រុមបៀលប្រាយយូណាយធីត លេងបាន១៣នាទីនៃតង់ទី១ កីឡាករនួន បូរី ពាក់អាវលេខ៩ របស់ក្រុមអគ្គស្នងការដ្ឋាននគរបាលជាតិ រកបានគ្រាប់បាល់នាំមុខឱ្យក្រុមរបស់ខ្លួនមួយគ្រាប់រហូតចប់តង់ទី១តែម្ដង ។ នៅតង់ទី២ ទោះបីក្រុមទាំងពីរលេងសម្រុកដាក់គ្នាយ៉ាងណាក៏ដោយ ក៏គ្មានក្រុមណារកបានគ្រាប់បាល់ដែរទាល់តែដល់ម៉ោងថែមបង្គ្រប់គឺនាទីទី៩០+ទើបកីឡាករពាក់អាវលេខ១០ អុល រ៉ាវី របស់ក្រុមអគ្គស្នងការដ្ឋាននគរបាលជាតិរកបាន១គ្រាប់ទៀតឱ្យក្រុមរបស់ខ្លួនដែលជាគ្រាប់បាល់ចុងក្រោយ និងជាគ្រាប់បាល់នាំសំណាងធំដល់ក្រុមឈានទៅលើកពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី៨ជាលើកដំបូងតែម្ដង ។
សម្រាប់ក្រុមម្ចាស់ជើងឯកលើកពានរដូវកាល២០១៤នេះ គឺក្រុមអគ្គស្នងការដ្ឋាននគរបាលជាតិទទួលបានទឹកប្រាក់រង្វាន់៨០លានរៀល ។ ចំណែកក្រុមបៀលប្រាយយូណាយធីត ដែលជាក្រុមរងជើងឯកនោះទទួលបានប្រាក់រង្វាន់៤០លានរៀល និងក្រុមចំណាត់ថ្នាក់លេខ៣ ចម្ការកៅស៊ូបឹងកេត ទទួលបានប្រាក់រង្វាន់២០លានរៀល ។
ចំពោះរង្វាន់ Fair-Play បានទៅក្រុមចម្ការកៅស៊ូបឹងកេត ទទួលបានទឹកប្រាក់៥លានរៀល ខណៈរង្វាន់ដែលផ្ដល់ជូនដល់កីឡាករទាត់បាល់បញ្ជូលទីបានច្រើនជាងគេបានទៅកីឡាករពាក់អាវលេខ៩ របស់ក្រុមចម្ការកៅស៊ូបឹងកេត ឃួន ឡាបូរ៉ាវី ដែលបានទាត់បាល់ចូលទីបានចំនួន១២គ្រាប់ទទួលបាន១លានរៀល ។
ឯអ្នកចាំទីល្អជាងគេបានទៅកីឡាករពាក់អាវលេខ១៨ ប្រាក់ ភារុណ របស់ក្រុមអគ្គស្នងការដ្ឋាននគរបាលជាតិទទួលបាន១លានរៀល និងកីឡាករដែលលេងបានល្អជាងគេគឺកីឡាករពាក់អាវលេខ១១ របស់ក្រុមអគ្គស្នងការដ្ឋាននគរបាលជាតិឈ្មោះ ទិត្យ ឌីណា ទទួលបានរង្វាន់ម៉ូតូ YAMAHA ១គ្រឿងពីក្រុមហ៊ុន YAMAHA ។
លោក ជួន ណារិន ប្រធានក្លិបអគ្គស្នងការដ្ឋាននគរបាលជាតិ មានប្រសាសន៍ថា ចំពោះលទ្ធផលដែលក្រុមលោកទទួលបានជ័យជម្នះថ្ងៃនេះគឺជាការខិតខំប្រឹងប្រែងសហការគ្នាយ៉ាងល្អ ហើយការប្រកួតទៀតសោតប្រៀបដូចទឹកបាក់ទំនប់ ពីព្រោះកីឡាករទាំងអស់មានចិត្ដពុះកញ្ជ្រោលយ៉ាងខ្លាំងក្នុងការស្វះស្វែងរកគ្រាប់បាល់ធ្វើយ៉ាងណាដណ្ដើមជ័យជម្នះឱ្យខាងតែបាន ។ ជាមួយនេះ លោក លាស់ សាឡាខាន់ គ្រូបង្វឹកក្រុមបៀលប្រាយយូណាយធីត បានសម្ដែងនូវការសោកស្ដាយយ៉ាងខ្លាំងដែលក្រុមលោកមិនបានលើកពានរង្វាន់សម្ដេចតេជោ ហ៊ុន សែន ប្រចាំឆ្នាំ២០១៤នេះ ដោយលោកបាននិយាយថា ដោយសារតែការប្រកួតលើកនេះក្រុមរបស់លោកមានការធ្វេសប្រហែស ធ្វើឱ្យមានចន្លោះប្រហោងខ្សែការពារច្រើន ទើបធ្វើឱ្យក្រុមអគ្គស្នងការដ្ឋាននគរបាលជាតិ អាចរកគ្រាប់បាល់នាំមុខនៅតង់ទី១ ។ តែទោះជាយ៉ាងណា លទ្ធផលចាញ់ក្រុមអគ្គស្នងការដ្ឋាននគរបាលជាតិលើកនេះ គឺក្រុមរបស់លោកចាញ់ដោយអស់ចិត្ដតែម្ដង ៕
ចែករំលែកព័តមាននេះ