កីឡាករលំដាប់កំពូលពិភពលោក ណូវ៉ាក់ យ៉ូកូវិច ,រ៉ូជើ ហ្វេដឺរ័រ និងកីឡាការិនី អីុតាលី ហ្វ្លាវៀ ប៉េនីតា កំពុងតែខិតចូលកាន់តែជិតពានជើងឯកព្រឹត្តិការណ៍វាយកូនបាល់ BNP Parib-as Open ប្រចាំឆ្នាំ២០១៤ ខណៈកាលពីថ្ងៃសៅរ៍ទី១៥ មីនា ពួកគេទាំងអស់គ្នាបានឆ្លងចូលដល់វគ្គផ្តាច់ព្រ័ត្រ បន្ទាប់ពីបានបំបាក់គូប្រកួតរៀងៗខ្លួនក្នុងវគ្គពាក់កណ្តាលផ្តាច់ព្រ័ត្ររួចមក ។ កម្មវិធីប្រកួតត្រូវបានរៀបចំធ្វើក្នុងទីក្រុង Indian Wells រដ្ឋកាលីហ្វ៊័រនីញ៉ា សហរដ្ឋអាមេរិក។
យ៉ូកូវិច បានយកឈ្នះកីឡាករម្ចាស់ផ្ទះអាមេរិក ចន អីុសន័រ ក្នុងលទ្ធផល៧-៥,៦-៧ និង៦-១ ដោយប្រើអស់ថិរវេលា២ម៉ោងកន្លះ ។ សូមបញ្ជាក់ថា កីឡាករស៊ែប៊ីរូបនេះធ្លាប់ឈ្នះពានជើងឯកនៅទីនេះចំនួន២លើករួចមកហើយ ប៉ុន្តែកាលឆ្នាំកន្លងទៅ រូបគេធ្វើមិនបានល្អឡើយនិងបានធ្លាក់ចេញត្រឹមវគ្គពាក់កណ្ដាលផ្ដាច់ព្រ័ត្រ។
គេបានថ្លែងថា ៖«ខ្ញុំពិតជាភ្ញាក់ផ្អើលចំពោះបច្ចេកទេសប្រកួតរបស់ខ្ញុំក្នុងថ្ងៃនេះ ។ ទោះជាយ៉ាងណា រាល់ការប្រកួតគឺតែងតែតានតឹង តែងតែមានលទ្ធផលប្រកៀកប្រកិត និងប្រកបដោយអារម្មណ៍ភ័យផងអរផង» ។
កីឡាករស្វ៊ីសរ៉ូជើ ហ្វេដឺរ័រ ក៏បានឈានចូលដល់វគ្គផ្តាច់ព្រ័ត្រផងដែរ បន្ទាប់ពីបានយកឈ្នះកីឡាករអ៊ុយក្រែន Alexandr Dolgopolov ក្នុងលទ្ធផលពិន្ទុ ៦-៣និង៦-១ ។
ម្ចាស់ជើងឯក៤ជំនាន់រូបនេះបានថ្លែងថា ៖«ការប្រកួតនៅថ្ងៃនេះ ការវាយសឺវីសរបស់ខ្ញុំពិតជាល្អខ្លាំងណាស់ ។ នេះជាការវាយសឺវីសដែលល្អជាងគេរបស់ខ្ញុំសម្រាប់ការប្រកួតនៅទីនេះ»។ នៅវគ្គផ្តាច់ព្រ័ត្រ ហ្វេដឺរ័រនឹងប៉ះជាមួយយ៉ូកូវិចដើម្បីប្រជែងយកពាន BNP Paribas Open លើកទី៥ ។
ចំណែកការប្រកួតផ្នែកនារីវិញ កីឡាការិនី អីុតាលី ហ្វ្លាវៀ ប៉េនីតា បានធ្វើឱ្យអ្នកទស្សនាមានការភ្ញាក់ផ្អើលជាខ្លាំងបន្ទាប់ពីរូបនាងបានផ្ដួលកីឡាការិនីជើងខ្លាំងលំដាប់ពិភពលោកមកពីប្រទេសចិនលីណា ក្នុងលទ្ធផល ៧-៦ និង៦-៣ ។ ជ័យជម្នះលើកនេះ នឹងនាំឱ្យកីឡាការិនីវ័យ៣២ឆ្នាំរូបនេះឡើងទៅជួបជាមួយជើងខ្លាំងមកពីប្រទេសប៉ូឡូញ អានីយេសស្កា រែដវ៉ាន់ស្កាដែលបានបំបាក់កីឡាការិនីរូម៉ានី Simona Halep ក្នុងលទ្ធផល ៦-៣និង៦-៤ ៕
ចែករំលែកព័តមាននេះ