បន្ទាប់ពីបរាជ័យផ្ទួនៗគ្នាអស់ចំនួន៣ដំណាក់ដំបូងរួចមក នៅទីបំផុតកីឡាករហូឡង់ Tom Jelte Slagter ដណ្តើមបានជ័យជម្នះជាលើកទី២ក្នុងដំណាក់ខណៈកាលពីថ្ងៃសៅរ៍ ទី១៥ ខែមីនា គេបានយកឈ្នះដំណាក់ទី៧ ដែលបញ្ចប់នៅទីប្រជុំជន Biot Sophia Antipolis ប្រទេសបារាំង ។
ក្នុងនាមជាអ្នកជិះកង់ឱ្យក្រុម Garmin Sharp កីឡាករវ័យ២៤ឆ្នាំរូបនេះបានបញ្ចប់ដំណាក់មានចម្ងាយផ្លូវ១៩៥,៥គីឡូម៉ែត្រចេញដំណើរពីទីប្រជុំជន Mougins ឆ្ពោះទៅកាន់ទីប្រជុំជន Biot Sophia Antipolis ប្រទេសបារាំង ដោយប្រើអស់ថិរវេលា ៥ម៉ោង និង៥វិនាទី នាំមុខកីឡាករព័រទុយហ្គាល់ Rui Alberto Faria Da Costa ជិះឱ្យក្រុម Lampre-Merida និងឈ្នះកីឡាករកូឡុំប៊ី Carlos Alberto Betancur Gomez ជិះឱ្យក្រុម AG2R La Mondiale ដែលទាំង២នាក់ប្រើថិរវេលាច្រើនជាងស្មើៗគ្នា ។
ថ្លែងបន្ទាប់ពីទទួលបានជ័យជម្នះ Slagterបានបញ្ជាក់ថា ៖ «នេះជាជ័យជម្នះដែលខ្ញុំនឹកស្មានមិនដល់ ។ នេះជាថ្ងៃដ៏ប្រសើរមួយ ពោលគឺមិនដូចជាថ្ងៃម្សិលមិញឡើយ ដែលខ្ញុំបានបាត់បង់អ្វីៗគ្រប់យ៉ាង ។ សម្រាប់ជ័យជម្នះលើកទី១កាលពីដំណាក់ទី៤ គឺបានធ្វើឱ្យខ្ញុំសប្បាយចិត្តខ្លាំងណាស់ ប៉ុន្តែ ជ័យជម្នះលើកទី២ នេះគឺរឹតតែធ្វើឱ្យខ្ញុំសប្បាយរកអ្វីផ្ទឹមគ្មាន ។ វាពិតជារឿងអស្ចារ្យខ្លាំងណាស់សម្រាប់រូបខ្ញុំដែលមិនធ្លាប់បានមកប្រណាំងនៅទីនេះពីមុនមកនោះ ។ ស្ថានភាពផ្លូវ និងចម្ងាយផ្លូវក្នុងដំណាក់នេះពិតជាសក្តិសមនឹងខ្ញុំខ្លាំងណាស់» ។
យ៉ាងណាក៏ដោយ ដូចជាលើកទី១ដែរ ជ័យជម្នះលើកទី២នេះ មិនអាចជួយឱ្យរូបគេសន្សំបានពិន្ទុគ្រប់គ្រាន់ដើម្បីនាំមុខនៅលើតារាងថិរវេលាសរុបនោះទេ ដ្បិតកីឡាករកូឡុំប៊ី Carlos Alberto Betancur Gomez ដែលបញ្ចប់ដំណាក់ក្នុងចំណាត់ថ្នាក់លេខ៣នោះ សន្សំពេលវេលាបានល្អជាងរូបគេ ។
Gomez ឆ្លងកាត់ការប្រណាំងអស់៧ដំណាក់កនេះ ប្រើថិរវេលាសរុបអស់តិចជាងគេគឺ៣២ម៉ោង ៤នាទីនិង៤៩វិនាទី នាំមុខកីឡាករ Da Costa ដែលប្រើថិរវេលាច្រើនជាង១៤វិនាទី ។ ចំណែកកីឡាករឆែក Zdenek Styba ស្ថិតនៅលំដាប់ទី៣ បន្ទាប់ពីប្រើពេលច្រើនជាង Gomez ដល់ទៅ២៦វិនាទី ។
សូមបញ្ជាក់ថា ការប្រណាំងកម្មវិធី Paris-Nice ឆ្នាំនេះចែកចេញជា៨ដំណាក់ និងមានចម្ងាយផ្លូវសរុប១៤៤៦,៥គីឡូម៉ែត្រ ។ ដោយឡែក ដំណាក់ទី៨ ដែលជាដំណាក់ផ្តាច់ព្រ័ត្រ មានចម្ងាយផ្លូវ១២៨គីឡូម៉ែត្រ ដោយការប្រណាំងធ្វើឡើងជុំវិញទីក្រុង Nice ប្រទេសបារាំង ៕
ចែករំលែកព័តមាននេះ