រាជធានីភ្នំពេញ ៖ កម្មកររោងចក្រកាត់ដេរម្នាក់បានរងរបួសធ្ងន់ធ្ងរ ខណៈជិះម៉ូតូម៉ាកហុងដាឃ្លីក១គ្រឿងវ៉ារថយន្ត១គ្រឿងនៅខាងមុខក៏ជ្រុលចូលទៅចំណែកផ្លូវម្ខាងទៀតហើយត្រូវបានរថយន្តបែនដឹកដី១គ្រឿងទៀតទៅដល់បុក និងកិនម៉ូតូជាប់ពីក្រោមខ្ទេចទាំងស្រុងតែម្ដង និងត្រូវបានរថយន្តពេទ្យដឹកយកទៅង្គ្រោះបន្ទាន់ភ្លាមៗដែរ ។
ឧប្បត្តិហេតុគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧ព្រឹក ថ្ងៃទី០៥ ខែកញ្ញា ឆ្នាំ២០១៩ នៅលើកំណាត់ផ្លូវជាតិលេខ៣ ស្ថិតនៅក្នុងភូមិព្រៃកី សង្កាត់ភ្លើងឆេះរទេះ ខណ្ឌកំបូល ។ យុវជនរងគ្រោះខាងលើឈ្មោះ កែវ ប៊ុនធឿន អាយុ២១ឆ្នាំ មុខរបរកម្មកររោងចក្រ មានទីលំនៅក្នុងភូមិកែវឧត្តម ឃុំត្រពាំងគង ស្រុកសំរោងទង ខេត្តកំពង់ស្ពឺ ។
តាមប្រភពព័ត៌មានបានឲ្យដឹងថា នៅមុនពេលកើតហេតុយុវជនខាងលើបានជិះម៉ូតូមួយគ្រឿងម៉ាកហុងដាឃ្លីក ពណ៌ស ពាក់ផ្លាកលេខ តាកែវ 1S-5967 បើកបរធ្វើដំណើរក្នុងទិសដៅពីត្បូងទៅជើងតែម្នាក់ឯងក្នុងល្បឿនលឿន ។ លុះពេលទៅដល់ត្រង់ចំណុចកើតហេតុ បានវ៉ារថយន្ត១គ្រឿងដែលកំពុងបើកបរនៅខាងមុខក្នុងទិសដៅស្របគ្នា និងបានជ្រុលចូលទៅចំណែកផ្លូវម្ខាងទៀត ។
ប្រភពដដែលបានបន្តថា ពេលនោះបានវាក់ជាមួយរថយន្តបែនដឹកដី១គ្រឿងទៀត ពណ៌ស ពាក់ផ្លាកលេខ ចង្កូតស្តាំ KPS -0534 ដែលកំពុងបើកបរក្នុងទិសដៅបញ្ច្រាសទិសគ្នា ហើយគេចមិនទាន់ក៏ត្រូវបានរថយន្តបុក និងកិនបណ្តាលឲ្យអ្នកបើកបរម៉ូតូខាងលើខ្ទាតប្លោងបោកផ្ទប់ជាមួយក្បាលរថយន្តរងរបួសធ្ងន់ធ្ងរ ។
ចំណែកម៉ូតូត្រូវរថយន្តកិនជាប់ពីលើរងការខូចខាតទាំងស្រុងតែម្ដង បន្ទាប់មកអ្នកបើកបររថយន្តបានចុះរត់គេចខ្លួនបាត់ស្រមោល ហើយភ្លាមៗនោះជនរងគ្រោះក៏ត្រូវបានរថយន្តពេទ្យឯកជននាំយកទៅសង្គ្រោះបន្ទាន់ ហើយក្រោយមករថយន្ត និងម៉ូតូក៏ត្រូវបាននគរបាលចរាចរណ៍ចុះទៅធ្វើការវាស់វែងរួចនាំយករថយន្ត និងម៉ូតូទៅរក្សាទុករង់ចាំការដោះស្រាយនៅពេលក្រោយ ៕
កែសម្រួលដោយ ៖ សំណាង
ចែករំលែកព័តមាននេះ