រាជធានីភ្នំពេញ ៖ ការប្រកួតកីឡាប៉េតង់ជ្រើសរើសជើងឯកទូទាំងប្រទេសប្រចាំឆ្នាំ២០១៤ ដែលក្រសួងអប់រំ យុវជន និងកីឡា បានរៀបចំឡើងតាំងពីថ្ងៃទី៦ ខែមីនាមកនោះ បានបញ្ចប់ការប្រកួតជាស្ថាពរហើយនៅល្ងាចថ្ងៃសុក្រ ទី១៤ ខែមីនា ឆ្នាំ២០១៤ ក្នុងទីលានពហុកីឡដ្ឋានជាតិអូឡាំពិក ដោយមានការចូលរួមប្រគល់រង្វាន់ជ័យលាភីពីសំណាក់លោកប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា ប្រតិភូកីឡា ភ្ញៀវកិត្តិយស និងកីឡាករ-កីឡាការិនីជាច្រើននាក់ ។
ការប្រកួតកីឡាប៉េតង់ជ្រើសរើសជើងឯកឆ្នាំនេះមានសមាគម-ក្លិបចូលរួមចំនួន២៥ ដែលមានកីឡាករ-កីឡាការិនីសរុបចំនួន៣២៩នាក់ (ស្រី៤២នាក់) បើប្រៀបធៀបកាលពីឆ្នាំ២០១៣ ចំនួនក្លិប-សមាគមនៅដដែល តែចំនួនអត្តពលិកមានកំណើនច្រើន ឯវិញ្ញាសាដែលដាក់ឱ្យប្រកួតមានចំនួន១៧ ។
ចំពោះលទ្ធផលមានដូចខាងក្រោម ៖
វិញ្ញាសា៣នាក់ទល់នឹង៣នាក់ ផ្នែកបុរសក្របខ័ណ្ឌក-២ លេខ១ បានទៅក្លិបនាគរាជ ដែលមានកីឡាករញ៉ែម បូរ៉ា, ស៊ុម សំណាង និងកីឡាករគឹម វីរៈ ។
វិញ្ញាសា៣នាក់ទល់នឹង៣នាក់ ក្របខ័ណ្ឌក-១ លេខ១ បានទៅលើក្រុមក្រសួងមហាផ្ទៃ ដែលមានកីឡាករចាន់ វុទ្ធី, យ៉ា ចាន់ដារ៉ារិទ្ធិ និងខែម សុភ័ក្ត្រ។
វិញ្ញាសា៣នាក់ទល់នឹង៣នាក់ ដណ្តើមពានសមាគម លេខ១ ធ្លាក់ក្នុងកណ្តាប់ដៃក្រុមឆ្លាមបញ្ជាការដ្ឋានកងទ័ពជើងទឹក ដែលមានកីឡាករម៉ាន់ ស៊ីវណ្ណា, ប្រាក់ សំណាង និងកីឡាករគៀង គីម ។
វិញ្ញាសាវាយយកពិន្ទុឯកត្តជននារី លេខ១ បានទៅកីឡាការិនីអ៊ុក លក្ខិណា មកពីក្លិបមជ្ឈមណ្ឌលកីឡា កងយោធពលខេមរភូមិន្ទ ។
វិញ្ញាសា៣នាក់ទល់នឹង៣នាក់ ផ្នែកនារី អាយុក្រោម១៧ឆ្នាំ លេខ១ បានទៅមន្ទីរអប់រំ យុវជន និងកីឡាខេត្តកណ្តាល ដែលមានកីឡាការិនីពៅ ច័ន្ទសុភក្ដ្រា , ថន ថាវរ៉ាត់ និងថន ថាវី ។
វិញ្ញាសា៣នាក់ទល់នឹង៣នាក់ ផ្នែកយុវជនអាយុក្រោម១៧ឆ្នាំ លេខ១ បានទៅក្លិបក្រសួងមហាផ្ទៃ ដែលមានកីឡាករសំ សូរិយា, នេន នរេន្ទ្រ និងជា ហេងឡេង ។
វិញ្ញាសាវាយយកពិន្ទុឯកត្តជន នារីអាយុក្រោម១៧ឆ្នាំ លេខ១ បានទៅកីឡាការិនីអ៊ុំ ដាវីន មកពីក្លិបបូរីនាគរាជ ខណៈផ្នែកបុរស លេខ១ បានទៅកីឡាករមួង ទិត្យម៉ាណែត មកពីក្លិបកីឡាខេត្តតាកែវ ។
វិញ្ញាសា២នាក់ទល់នឹង២នាក់ ផ្នែកនារីអាយុក្រោម១៧ឆ្នាំ លេខ១ បានទៅមន្ទីរអប់រំ យុវជន និងកីឡាខេត្តកណ្តាល ដែលមានកីឡាការិនីអៀន ស្រីលីន និងកីឡាការិនីកែវ សុវណ្ណា រីឯផ្នែកបុរស លេខ១ បានទៅអង្គការភាពញញឹមនៃកុមារ ដែលមានកីឡាករមាន ចិត្រា និងប៊ូ រ៉ាយុ ។
វិញ្ញាសា២នាក់ទល់នឹង២នាក់ ផ្នែកនារី លេខ១ បានទៅយោធភូមិភាគពិសេស ដែលមានកីឡាការិនីដួង ឌីណា និងកីឡាការិនីពៅ ឈូករ័ត្ន ខណៈផ្នែកបុរស លេខ១ បានទៅក្លិបអគ្គភស្តុភារហិរញ្ញវត្ថុ ក្រសួងមហាផ្ទៃ ដែលមានកីឡាករជា ហេងលី និងកីឡាករសូ សំណាង ។
វិញ្ញាសាម្នាក់ទល់នឹងម្នាក់ ផ្នែកនារីអាយុក្រោម១៧ឆ្នាំ លេខ១ បានទៅកីឡាការិនីអ៊ុំ ដាវីន មកពីក្លិបនាគរាជ ខណៈផ្នែកបុរស លេខ១ បានទៅកីឡាករមួង ទិត្យដាណែត មកពីមន្ទីរអប់រំ យុវជន និងកីឡាខេត្តតាកែវ ។
វិញ្ញាសាម្នាក់ទល់នឹងម្នាក់ ផ្នែកនារី លេខ១ បានទៅកីឡាការិនីអ៊ុន ស្រីយ៉ា មកពីក្លិបយោធភូមិភាគពិសេស ឯផ្នែកបុរស លេខ១ បានទៅកីឡាករគង់ ដាវីត មកពីមន្ទីរអប់រំ យុវជន និងកីឡាខេត្តតាកែវ ។
លោកប៊ូ ជុំសេរី មានប្រសាសន៍នៅក្នុងឱកាសនោះថា កំណែទម្រង់វិស័យអប់រំកាយ និងកីឡា គឺជាទស្សនវិស័យថ្មីមួយដែលតម្រង់ទិសវិស័យកីឡាជាតិឈានទៅរកការធ្វើទំនើបកម្មដើម្បីសុខុមាលភាពរបស់ប្រជាជនគ្រប់រូប និងដើម្បីលើកកម្ពស់សេដ្ឋកិច្ចគ្រួសារ និងសេដ្ឋកិច្ចជាតិទាំងមូល ។ លោកបន្តថា ពាក់ព័ន្ធទៅនឹងវិស័យអប់រំកាយ និងកីឡា រាជរដ្ឋាភិបាលនៃព្រះរាជាណាចក្រកម្ពុជា មានការប្តេជ្ញាខ្ពស់ក្នុងការបន្តអភិវឌ្ឍន៍ពហុកីឡដ្ឋានជាតិ និងហេដ្ឋារចនាសម្ព័ន្ធកីឡាគ្រប់ប្រភេទ និងគាំទ្រគ្រប់សហព័ន្ធកីឡាជាតិក្នុងការរៀបចំបណ្តុះបណ្តាលថ្នាលកីឡាករ-កីឡាការិនី អាជ្ញាកណ្តាល គ្រូបង្វឹក មន្ត្រីគ្រប់គ្រងកីឡា មន្ត្រីរៀបចំ ដែលកម្ពុជាមានសក្តានុពលដើម្បីត្រៀមខ្លួនក្នុងការធ្វើជាម្ចាស់ផ្ទះនៃការប្រកួតកីឡាស៊ីហ្គេមនៅឆ្នាំ២០២៣ ខាងមុខ ៕
ចែករំលែកព័តមាននេះ