រាជធានីភ្នំពេញ​៖ សម្តេចក្រុមព្រះ​នរោត្តមរណប្ញទិ្ឋ ​បានផ្តើមវិលចូលធ្វើ​នយោបាយជាផ្លូវការ​នៅព្រឹកថ្ងៃទី១៦​ មីនា ២០១៤​ ដោយជួបសំណេះសំណាល​ជាមួយសកម្មជន និងអ្នកគំាទ្រ​មកពីបណ្តាខេត្ត-រាជធានី​ប្រមាណ១០០០នាក់ ​នៅសណ្ឋាគារសាន់វេ ក្នុងរាជធានីភ្នំពេញ ។

ធ្លាប់ជាអតីតនាយករដ្ឋមន្រ្តីទី១ ​ក្នុងនីតិកាលទី១នៃរដ្ឋសភា ​សម្តេចក្រុមព្រះ​បានប្រកាសវិលចូលធ្វើ​នយោបាយជាថ្មីកាលពីថ្ងៃទី២៤​ កុម្ភៈ ២០១៤ ។ ការវិលចូលធ្វើ​នយោបាយជាថ្មីនេះ​ ត្រូវបានសម្តេចក្រុម​ព្រះ​នរោត្តមរណប្ញទ្ឋិ​ ពន្យល់បា្រប់ថា ​ដោយសារស្ថានការណ៏​នយោបាយនៅកម្ពុជា​ក្រោយការបោះឆ្នោតថ្ងៃទី២៨ ​កក្កដា ​២០១៣ ​ដែលគណបក្ស​ប្រជាជនកម្ពុជា​ និង គណបក្ស​សង្គ្រោះជាតិ​មិនបាន​ដោះស្រាយ ​ហើយថាគណបក្ស​ដែលព្រះអង្គបង្កើតថ្មីនេះ​ មិនមែនជាគណបក្សហ្វ៊ុនស៊ិនប៉ិច ​តែជាគណបក្ស​ឈរនៅកណ្តាល ។

បើតាមមន្រ្តីជំនិត​នឹងព្រះអង្គ​ គណបក្សថ្មី​ដែលសម្តេចក្រុមព្រះបង្កើតនេះឈ្មោះថា ​” គណបក្សសង្គមរាស្រ្ត រាជាធិបតេយ្យ ” ​ហើយនឹងត្រូវយក​ទៅចុះបញ្ជីទទួលស្គាល់​ជាផ្លូវការពីក្រសួងមហាផ្ទៃ​នៅថ្ងៃទី១៧មីនា ស្អែកនេះ ៕