រាជធានីភ្នំពេញ ៖ ការប្រកួតដែលពោរពេញដោយភាពចម្រូងចម្រាសរវាងក្រុមចំការកៅស៊ូបឹងកេត និងក្រុមណាហ្គាខប នៃពានរង្វាន់ Hun Sen-Cup លើកទី៨ ដណ្តើមចំណាត់ថ្នាក់លេខ៣ កាលពីថ្ងៃទី១២ មិនា កន្លងមក ត្រូវបានមន្ដ្រី គណៈកម្មការរៀបចំការប្រកួត និងមន្ដ្រីសហព័ន្ធកីឡាបាល់ទាត់កម្ពុជាសម្រេច កាត់សេចក្ដីឲ្យ ក្រុមបឹងកេត ជាអ្នកឈ្នះ បន្ទាប់ពីបើកកិច្ចប្រជុំរំលងបាន១ថ្ងៃ។
រាជធានីភ្នំពេញ ៖ ការប្រកួតដែលពោរពេញដោយភាពចម្រូងចម្រាសរវាងក្រុមចំការកៅស៊ូបឹងកេត និងក្រុមណាហ្គាខប នៃពានរង្វាន់ Hun Sen-Cup លើកទី៨ ដណ្តើមចំណាត់ថ្នាក់លេខ៣ កាលពីថ្ងៃទី១២ មិនា កន្លងមក ត្រូវបានមន្ដ្រី គណៈកម្មការរៀបចំការប្រកួត និងមន្ដ្រីសហព័ន្ធកីឡាបាល់ទាត់កម្ពុជាសម្រេច កាត់សេចក្ដីឲ្យ ក្រុមបឹងកេត ជាអ្នកឈ្នះ បន្ទាប់ពីបើកកិច្ចប្រជុំរំលងបាន១ថ្ងៃ។
វាជាភាពត្រឹមត្រូវ និងសមស្រប ទៅតាមលក្ខខ័ណ្ឌ និងច្បាប់ការប្រកួតរបស់សហព័ន្ធកីឡាបាល់ទាត់កម្ពុជាដែលការសម្រេចកាត់ក្ដី ឲ្យក្រុមចម្ការកៅស៊ូបឹងកេតជាអ្នក ឈ្នះក្រុមណាហ្គាខប ដោយស្វ័យប្រវត្តិតែម្ដងនោះ ។ ប៉ុន្ដែការសម្រេចបែបនេះ ត្រូវបានមហាជននិងទស្សនិកជន គាំទ្រវិស័យកីឡា ក្នុងស្រុកជាច្រើន បានលើកឡើងប្រហាក់ប្រហែលគ្នាថា ការសម្រេចបែបនេះ គឺគ្មានតម្លៃអ្វីសោះ សម្រាប់ក្រុមដែលឈ្នះ។ ម្យ៉ាងវិញទៀត កំហុស ដែលកើតឡើង មិនមែនជាកំហុស របស់កីឡាករទាំងស្រុងនោះទេ គឺដោយសារភាព មិនច្បាស់លាស់ របស់អាជ្ញាកណ្ដាល ដែលចាប់ទាំងមិនច្បាស់ខ្លួនឯង ។
ភាពមិនយល់ស្របនិងចុះសម្រុងគ្នានៅចុងតង់ទី២នោះ រហូតដល់ម៉ោងបន្ថែម១៥នាទី២ដង ដោយលទ្ធផល ៣-៣ ក្នុងរយៈពេល៩០នាទី បានកើតឡើង ក្រោយពីលោក លឹម ប៊ុនធឿន ជាអាជ្ញាកណ្ដាល បានចាប់បាល់ពិន័យ ក្រុមណាហ្គាខប ហើយឲ្យបាល់ប៉េណាល់ទី ទៅក្រុមបឹងកេត ។ ប៉ុន្ដែការផ្តល់បាល់ពិន័យ ពុំទទួលបានលទ្ធផលអ្វីឡើយ ព្រោះកីឡាករក្រុមណាហ្គាខប ទាំងអស់ មិនសុខចិត្ត ហើយក៏បានតវ៉ា រហូតដល់នាទី១១៨ ទើបទទួលបានការអន្ដរាគមន៍ពីមន្ដ្រីគណៈកម្មការរៀបចំការប្រកួត បន្ថែមទៀត គឺលោក ឈួន សុខផៃ ជាស្នងការប្រកួត ប៉ុន្ដែកីឡាករណាហ្គាខប នៅតែមិនយល់ព្រមនឹងការចាប់កំហុសរបស់អាជ្ញាកណ្ដាលឡើយ ។ ប៉ុន្មាននាទីក្រោយមក ទើបថ្នាក់ដឹកនាំក្រុមណាហ្គាខប យល់ព្រមឲ្យកីឡាករក្រុមខ្លួនឈរបាំងមុខទី ដើម្បីឲ្យកីឡាករក្រុមបឹងកេតស៊ុតបញ្ចូលទី ប៉ុន្ដែកីឡាករបឹងកេត មិនបានទាត់បាល់ពិន័យ ១១ម៉ែត្រ ដែលមានការឈរបាំងមុខទីនោះទេ ទីបំផុតលោក លឹម ប៊ុនធឿន ក៏សម្រេចចិត្តផ្លុំកញ្ចែបញ្ចប់ការប្រកួត ដោយមិនប្រកាសលទ្ធផលភ្លាមតែម្ដងនោះទេ ។ ប៉ុន្ដែមន្ដ្រីសហព័ន្ធមួយចំនួនបានបង្ហើបឲ្យដឹងភ្លាមៗថា «បឹងកេត គឺជាអ្នកឈ្នះ ព្រោះណាហ្គាខប ជាអ្នកដើរចេញពីការប្រកួត ដូច្នេះចំណាត់ថ្នាក់លេខ៣ ត្រូវបានទៅក្រុមបឹងកេតហើយ»។ បន្ទាប់ពីការប្រកួត ត្រូវបានបញ្ចប់ទាំងភាពចម្រូងចម្រាស ភ្លាមៗនោះ មន្ដ្រីសហព័ន្ធ និងគណៈកម្មការរៀបចំការប្រកួត បានរៀបចំកិច្ចប្រជុំសម្ងាត់មួយ ជាមួយតំណាងក្រុមទាំងសងខាង(បឹងកេត-ណាហ្គាខប) រួមទាំងលោកអាជ្ញាកណ្ដាល ដើម្បីស្វែងរកដំណោះស្រាយរួមគ្នា ប៉ុន្ដែប្រភពព័ត៌មាន ជិតស្និតពីមន្ដ្រីសហព័ន្ធ បានបង្ហើបឲ្យដឹងថា កិច្ចប្រជុំនោះ មិនទទួលបានលទ្ធផល អ្វីនោះទេ ។
លុះដល់ព្រឹកថ្ងៃទី១៣ មីនា ឆ្នាំ២០១៤នេះ ទើបអគ្គលេខាធិការសហព័ន្ធកីឡាបាល់ទាត់កម្ពុជា លោក គល់ សុផាន់ណា បានបញ្ជាក់យ៉ាងច្បាស់ថា «ការប្រកួតវគ្គផ្ដាច់ព្រ័ត្រដណ្ដើមចំណាត់ថ្នាក់លេខ៣ យប់មិញនេះ ក្រុមបឹងកេត គឺជាអ្នកឈ្នះ រីឯក្រុមណាហ្គាខប ត្រូវចាញ់ហើយ ព្រោះទង្វើដែលកីឡាករ បានធ្វើក្នុង ពេលប្រកួត ខុសនឹងលក្ខន្ដិកៈការប្រកួត របស់សហព័ន្ធកីឡាបាល់ទាត់របស់យើង» ។
សូមរំលឹកថា កីឡាករ ដែលធ្វើឲ្យក្រុមបឹងកេត និងក្រុមណាហ្គាខប ទទួលបានលទ្ធផលស្មើគ្នា ៣-៣ មុននឹងភាពចម្រូងចម្រាសកើតឡើងនោះ មានដូចជា ក្រុមបឹងកេត កីឡាករ ឃួន ឡាបូរ៉ាវី រកបាន ២គ្រាប់ម្នាក់ឯង នៅនាទី១៣ និងនាទី៧៧ រីឯ ១គ្រាប់ទៀត គឺធ្វើសម្រេចដោយកីឡាករ រស់ សំអឿន នៅនាទី៥២ ។ ចំណែក៣គ្រាប់ របស់ក្រុមណាហ្គាខប គឺធ្វើសម្រេចដោយកីឡាករ មាឃ ឆដារ៉ាវុធ នៅនាទី៥៦, កីឡាករ សាន ណារិទ្ធ នៅនាទី៧៥ និងកីឡាករ ស៊ុន សុវណ្ណរិទ្ធី ទាត់បាល់ប៉េណាល់ទី បានសម្រេចនៅ នាទី៨៧ ៕
ចែករំលែកព័តមាននេះ