ខេត្តកំពង់ធំ ៖ បច្ចុប្បន្ន​នេះបទ​ល្មើសនេសាទ​ ដោយប្រើប្រាស់ឧបករណ៏​ខុសច្បាប់​(ឆក់ត្រី)​នៅតែមានកើន​ឡើង​ទោះ​បី​ជា​​ដឹងថា​ បើគេចាប់បាន​ ត្រូវជាប់គុកក៏ដោយ​ នៅតែប្រព្រឹត្ត​ធ្វើឲ្យមានការ ព្រួយបារម្ភ​ ​ពីសំណាក់ថ្នាក់ដឹក​នាំ ​ក្នុងការ​ទប់​ស្កាត់ដើម្បី ការពារធនធានមឆ្ឆាជាតិ ។

លោក​ សៅ វណ្ណសិរីវុទ្ធ នាយសង្កាត់រដ្ឋបាលជល ផលស្ទឹងសែនបានឲ្យដឹងថានៅក្នុងការចុះ បង្ក្រាបបទ​ល្មើសនេសាទ​ខុសច្បាប់នៅរដូវប្រាំងនេះ កម្លាំងសង្កាត់រដ្ឋបាលជលផលស្ទឹងសែន សហការការជាមួយផ្នែកសឹករងក្រុងស្ទឹងសែន កាលពីព្រឹក ថ្ងៃទី ១៤ ខែមីនាឆ្នាំ២០១៤ បានចុះបង្រ្កាបជនសង្ស័យ នេសាទខុសច្បាប់(ឆក់ត្រី)បានចំនួន២នាក់ នៅ​ចំណុច​បឹងព្រះអំពឹង ស្ថិតនៅក្នុងភូមិសាស្រ្ត​ឃុំកំពង់គោ ស្រុកកំពង់ស្វាយ ខេត្តកំពង់ធំ ។ទី១.ឈ្មោះ យឹម លីម ភេទ ប្រុស ៣៨ឆ្នាំ និងទី២ ឈ្មោះ ធ្លក រេង ភេទ ប្រុស អាយុ ២៤ឆ្នាំអ្នកទាំង២រស់នៅភូមិម្នាវ សង្កាត់ស្រយ៉ូវ ក្រុងស្ទឹងសែន រួមជាមួយនិងវត្ថុតាងមាន អាគុយ១២វុល៤០អាំពែរចំនួន២ គ្រឿង ដងឆក់២គូរ ​និងដុំអាំងវិចទ័រឆក់ត្រីចំនួន២គ្រឿង នាំយកមកកាន់ សង្កាត់រដ្ឋបាលជលផលស្ទឹងសែន នៅល្ងាចថ្ងៃដដែលនេះ​។

លោក ប៉ែន វណ្ណរិទ្ធ នាយខណ្ទរដ្ឋបាលជលផលកំពង់ធំ បានមានប្រសាសន៏ថា​ លទ្ធផល​នៃការ​បង្ក្រាបបាន​បទល្មើស​នេសាទខុសច្បាប់នេះ គឺជាការខិតខំប្រឹង​ប្រែងរបស់កម្លាំង​សមត្ថកិច្ចយើង​ និងសូមបានថ្លែងអំណរគុណ​ចំពោះកម្លាំង​សឹករងក្រុងស្ទឹងសែន ដែលបានសហការគ្នាល្អ​ក្នុងការបង្រ្កាបបទល្មើស​នេសាទបានជាច្រើនករណីមកហើយ​ៗក៏សូម​អំពាវនាវយ៉ាងទទូច ដល់បងប្អូនប្រជាពលរដ្ឋទាំងអស់​កុំនាំគ្នាប្រើប្រាស់នូវឧបករនេសាទខុសច្បាប់(ឆក់ត្រី)​និងរបាំង​ស្បៃមុងដែលជាហេតុ​បណ្តាលឲ្យធនធានមច្ឆាជាតិ​ត្រូវស្លាប់បាត់បង់ជីវិត​​ គ្មានឳកាសនិងពងកូនបន្តរពូជ​!និងជាហេតុនាំ​ឲ្យមានទុក្ខទោសដល់ខ្លួនទៀតផងនៅចំពោះមុខច្បាប់។