រាជធានីភ្នំពេញ ៖ ដូចតាមការសន្យា រាជរដ្ឋាភិបាលកម្ពុជា នឹងចំណាយថវិកាប្រមាណជាជាង៨០ម៉ឺនដុល្លារអាមេរិកសម្រាប់ប្រគល់ជូនដល់គ្រូបង្វឹក-គ្រូជំនួយ និងកីឡាករ-កីឡាការិនី ដែលខិតខំប្រឹងប្រែងប្រកួតដណ្តើមបានជ័យលាភីមេដាយក្នុងព្រឹត្តិការណ៍ប្រកួតកីឡាស៊ីហ្គេមលើកទី២៧ នៅប្រទេសមីយ៉ាន់ម៉ា កាលពីចុងឆ្នាំ២០១៣ កន្លងមកនេះ ។
រាជធានីភ្នំពេញ ៖ ដូចតាមការសន្យា រាជរដ្ឋាភិបាលកម្ពុជា នឹងចំណាយថវិកាប្រមាណជាជាង៨០ម៉ឺនដុល្លារអាមេរិកសម្រាប់ប្រគល់ជូនដល់គ្រូបង្វឹក-គ្រូជំនួយ និងកីឡាករ-កីឡាការិនី ដែលខិតខំប្រឹងប្រែងប្រកួតដណ្តើមបានជ័យលាភីមេដាយក្នុងព្រឹត្តិការណ៍ប្រកួតកីឡាស៊ីហ្គេមលើកទី២៧ នៅប្រទេសមីយ៉ាន់ម៉ា កាលពីចុងឆ្នាំ២០១៣ កន្លងមកនេះ ។
លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) បានប្រាប់ឱ្យដឹងកាលពីព្រឹកថ្ងៃទី១៤ មីនាថា នៅថ្ងៃទី២៥ ខែមីនាខាងមុខនេះ រាជរដ្ឋាភិបាលកម្ពុជានឹងរៀបចំកម្មវិធីប្រគល់ប្រាក់រង្វាន់លើកទឹកចិត្តជូនដល់អត្តពលិកដែលដណ្តើមបានមេដាយពីការប្រកួតកីឡាស៊ីហ្គេមលើកទី២៧ នៅប្រទេសមីយ៉ាន់ម៉ា នៅទីស្នាក់ការ NOCC ក្រោមអធិបតីភាពលោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រួមទាំងថ្នាក់ដឹកនាំគណៈកម្មាធិការជាតិអូឡាំពិកកម្ពុជាផងដែរ ។ យោងតាមអនុក្រឹត្យចុះថ្ងៃទី២៥ ខែវិច្ឆិកា ឆ្នាំ២០១៣ រាជរដ្ឋាភិបាលបានសន្យាថា ចំពោះអត្តពលិកដែលដណ្តើមបានមេដាយពីស៊ីហ្គេមលើកទី២៧ នោះ នឹងត្រូវទទួលបានប្រាក់រង្វាន់លើកទឹកចិត្តដូចជា មេដាយមាស ៤០លានរៀល, មេដាយប្រាក់ ៣០លានរៀល និងមេដាយសំរឹទ្ធ ១៦លានរៀល ។
រីឯគ្រូបង្វឹកគឺទទួលបានប្រាក់រង្វាន់លើកទឹកចិត្តស្មើនឹងអត្តពលិកដែលដណ្តើមបានជ័យលាភីខ្ពស់ជាងគេ ខណៈគ្រូជំនួយទទួលបានប្រាក់រង្វាន់ ៧០ភាគរយនៃគ្រូបង្វឹក ។ លោកវ៉ាត់ ចំរើន បានបញ្ជាក់ថា ដោយយោងតាមអនុក្រឹត្យខាងលើនេះ រាជរដ្ឋាភិបាលនឹងចំណាយថវិកាប្រហែលជា៣.៤២៩.៨០០.០០០រៀល ពោលគឺប្រហែល៨៥៧.៤៥០ដុល្លារឯណោះសម្រាប់ប្រគល់ជូនដល់កីឡាករ-កីឡាការិនី គ្រូបង្វឹក និងគ្រូជំនួយដែលដណ្តើមបានជ័យលាភីលើវិញ្ញាសាកីឡា៨ប្រភេទ ដែលកម្ពុជាបានបញ្ជូនទៅដោយបានឈ្នះមេដាយសរុបចំនួន១៣៤គ្រឿង (មាស១៤, ប្រាក់២៩ និងសំរឹទ្ធ៩១) ។ នាយបេសកកម្មដឹកនាំក្រុមប្រតិភូ និងអត្តពលិកចូលរួមប្រកួតក្នុងព្រឹត្តិការណ៍ស៊ីហ្គេមលើកទី២៧ ខាងលើនេះបានបន្តទៀតថា ការប្រគល់ប្រាក់រង្វាន់ជូនដល់អត្តពលិក គ្រូបង្វឹក និងគ្រូជំនួយ មុនពិធីបុណ្យចូលឆ្នាំខ្មែរប្រពៃណីជាតិចូលមកដល់បែបនេះ គឺជាការល្អប្រសើរណាស់ ព្រោះអត្តពលិកអាចយកប្រាក់រង្វាន់លើកទឹកចិត្តទាំងនោះទៅប្រើប្រាស់តាមតម្រូវការរបស់ពួកគេ ។
សម្រាប់ទឹកប្រាក់នេះជាប្រាក់រង្វាន់ចុងក្រោយ បន្ទាប់ពីប្រាក់រង្វាន់លើកទី១ របស់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតផ្ទាល់ផ្តល់ជូនសរុប៤០៣.៩០០ដុល្លារ ក្នុងនោះសម្រាប់ជ័យលាភីមេដាយមាសក្នុងម្នាក់ៗទទួលបានប្រាក់៥ពាន់ដុល្លារ មេដាយប្រាក់៣ពាន់ដុល្លារ និងេមដាយសំរឹទ្ធ២ពាន់ដុល្លារ ឯគ្រូបង្វឹក និងគ្រូជំនួយ ក៏ទទួលបានប្រាក់នោះផងដែរ ។ ក្រៅពីទឹកប្រាក់ខាងលើ ក៏មានទឹកប្រាក់បន្ថែមរបស់អ្នកឧកញ៉ា សុខ គង់ ១.០០០ដុល្លារ និងលោកឧកញ៉ា វេង ហួរ ២.០០០ដុល្លារ ។ ទឹកប្រាក់រង្វាន់លើកទី២ ជាប្រាក់រង្វាន់លើកទឹកចិត្តរបស់ណាហ្គាវើលប្រគល់ជូនដល់អត្តពលិកជ័យលាភីមេដាយមាសសរុបចំនួន២៨.០០០ដុល្លារ ក្នុងនោះទឹកប្រាក់ចំនួន៣.០០០ដុល្លារសម្រាប់ជ័យលាភីមេដាយមាសឯកត្តជន និង៥.០០០ដុល្លារសម្រាប់មេដាយមាសជាក្រុម ។
បន្ទាប់មកក្រុមហ៊ុន CAMREW ស្រាបៀរអង្គរ ក៏បានឧបត្ថម្ភប្រាក់លើកទឹកចិត្ត មេដាយមាស៦.០០០ដុល្លារក្នុងម្នាក់ មេដាយប្រាក់ ៣.០០០ដុល្លារក្នុងម្នាក់ និងមេដាយសំរឹទ្ធ ១.០០០ដុល្លារក្នុងម្នាក់ សរុបទាំងអស់២៦៣.០០០ដុល្លារ ។ សូមរំឭកថា កីឡាទាំង៨ប្រភេទដែលជួយដណ្តើមជ័យលាភីឱ្យប្រទេសកម្ពុជានោះមានដូចជា កីឡាចំបាប់ (មេដាយ១២គ្រឿង), សីប៉ាតាក្រ (មេដាយ១៩គ្រឿង), វ៉ូវីណាម (េមដាយ១៧គ្រឿង), ទូកប្រពៃណី (មេដាយ១៧គ្រឿង), ប៉េតង់ (មេដាយ១៨គ្រឿង), សូរិនហ្សីកាំប៉ូ (េមដាយ៦គ្រឿង), េតក្វាន់ដូ (មេដាយ៧គ្រឿង) និងកីឡាវូស៊ូ (មេដាយ១គ្រឿង) ៕
ចែករំលែកព័តមាននេះ