រាជធានីភ្នំពេញ ៖ ទោះបីប្រឡូកក្នុងអាជីព ជាកីឡាករល្បុក្កតោមិនតិចឆ្នាំក្តី ប៉ុន្តែ ឌឹប ង៉ែត ហាក់មិនសូវមានគេស្គាល់ទេ បើទោះជារូបគេធ្លាប់បានសម្ដែង និងចេញប្រកួតក្នុងព្រឹត្តិការណ៍តូចធំជាច្រើនក៏ដោយ…
រាជធានីភ្នំពេញ ៖ ទោះបីប្រឡូកក្នុងអាជីព ជាកីឡាករល្បុក្កតោមិនតិចឆ្នាំក្តី ប៉ុន្តែ ឌឹប ង៉ែត ហាក់មិនសូវមានគេស្គាល់ទេ បើទោះជារូបគេធ្លាប់បានសម្ដែង និងចេញប្រកួតក្នុងព្រឹត្តិការណ៍តូចធំជាច្រើនក៏ដោយ ។
ប៉ុន្តែពេលនេះ ឌឹប ង៉ែត កំពុងក្លាយជាអ្នកឯកទេសល្បុក្ក តោដែលមានឈ្មោះបោះសំឡេងចេញពីប្រទេស កូរ៉េខាងត្បូង បន្ទាប់ពីបានទទួលជ័យលាភីជាតា រាក្បាច់គុនមានការសម្តែងល្អជាងគេក្នុងការប្រ កួតជ្រើសរើសតារាសម្តែងក្បាច់គុនលំដាប់ពិភព លោក Audition Global Action Star នៅប្រ ទេសកូរ៉េខាងត្បូង ដែលមានតារាក្បាច់គុនមកពី៤០ប្រទេសចូលរួម ។
យោងតាមលោក អ៊ួ តារា អគ្គលេខធិការសហព័ន្ធល្បុក្កតោម្ពុជា ដែលត្រូវគេស្គាល់ថាជា តារាក្បាច់គុនរូបសង្ហាផងនោះ បានប្រាប់អ្នកសារព័ត័មានក្នុងស្រុកថា លទ្ធផលដែល ឌឹប ង៉ែត ទទួលបានគឺចាត់ទុកជាលទ្ធផលដែលនាំមកនូវ មោទនភាពជូនជាតិយ៉ាងខ្លាំងសម្រាប់ក្បាច់គុន
ល្បុក្កតោនេះ ។
នេះក៏ជាអ្វីដែលប្រទេសជាតិ ទាំងមូលទទួលបានក្នុងនាមជាកីឡាករដែលជាប់ ជាតារាសម្តែងលេចធ្លោកម្រិតអន្តរជាតិ តំណាងឲ្យកម្ពុជាទាំងមូល ។ តំណែងនេះ ក៏មានការទទួលស្គាល់ជាលក្ខណៈអន្តរជាតិ ក្នុងចំណោមតំណាងជាច្រើនដែលទៅបញ្ចេញសមត្ថភាពសម្ដែងក្បាច់ គុនតំណាងជាតិសាសន៍នីមួយៗផងដែរ ។
លោកសង្ឃឹមថា តាមរយៈលទ្ធផលនេះនឹងជួយផ្សព្វផ្សាយពីគុនល្បុក្កតោឲ្យពិភពលោកស្គាល់កាន់តែច្បាស់ ពិសេសបង្កើតទីផ្សារភាព យន្តកាន់តែច្រើនសម្រាប់កីឡាករ ។
កីឡាករ ឌឹប ង៉ែត សមាជិកតារាសម្តែង Stunt Team នៃគុនល្បុក្កតោកម្ពុជា ស្ថិតក្នុងចំណោម តារាក្បាច់គុនទាំង៥ប្រទេសដែលទទួលបានជ័យលាភីក្នុងការប្រកួតAudition Global Action Star នៅសាធារណរដ្ឋកូរ៉េ បានបង្ហាញនូវអារម្មណ៍មោទនភាពយ៉ាងខ្លាំង ជាពិសេសនៅពេលដែលមានបងប្អូនខ្មែរក្នុងស្រុករាប់មិនអស់ចាប់ អារម្មណ៍ពីជ័យជម្នះ ។
ក្រោយឆ្លងកាត់ការប្រកួត៣ដំណាក់កាលកីឡាករ ឌឹប ង៉ែត ទទួលបានជ័យលាភីតារា ក្បាច់គុនមានការសម្តែងល្អជាងគេ ខណៈតារា ក្បាច់គុនមកពី៤ប្រទេសផ្សេងទៀតទទួលបាន ជ័យលាភីរៀងៗខ្លួន ។ នេះបើតាមការបញ្ជាក់ របស់លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា ។
ការប្រកួតនេះ ធ្វើឡើងក្នុងកម្មវិធីមហោស្រពភាពយន្តក្បាច់គុនអន្តរជាតិ International Martial Art Film Festival ដែលមានតារា ក្បាច់គុនមកពី៤០ប្រទេសចូលរួម ខណៈកម្ពុជា ដាក់បេក្ខជន២រូបឲ្យចូលរួមប្រកួត តែម្នាក់ទៀតមិនទទួលបានជ័យលាភីទេ ។ បើតាមលោក អ៊ួ តារា គណៈកម្មការដាក់ពិន្ទុនិង កាត់ក្តីក្នុងការប្រកួត សុទ្ធសឹងជាតារាក្បាច់គុន ជើងចាស់ ផលិតករភាពយន្ត និងគ្រូបង្វឹក ក្បាច់គុន ។
«វាជាមោទនភាពសម្រាប់កម្ពុជាយើងដែរ ទោះបីវាគ្រាន់តែជាផ្នែកមួយនៃក្បាច់គុន ប៉ុន្តែ វាបានជួយលើកមុខមាត់ជាតិយើងតាមរយៈ គុនល្បុក្កតោ និងទេពកោសល្យកីឡាករ។ ក្រោយពីយើងឈ្នះដែលមានការទទួលស្គាល់ ជាលក្ខណៈអន្តរជាតិ ធ្វើឲ្យផលិតករភាពយន្ត ក៏ដូចជាតួសម្តែងក្បាច់គុនចាប់អារម្មណ៍ ពីក្បាច់គុនខ្មែរកាន់តែច្រើន ។ លើសពីនេះ គ្រាន់តែគេដឹងថាយើងជាខ្មែរ គឺគេស្គាល់ពីគុន ល្បុក្កតោ» ។ នេះជាការយល់ឃើញរបស់លោក អ៊ួ តារា ។
គួររំឭកថា លោក អ៊ួ តារា ត្រូវបានមហោស្រពភាពយន្តក្បាច់គុនអន្តរជាតិ International Martial Art Film Festival អញ្ជើញឲ្យធ្វើជាវាគ្មិនដើម្បីចែករំលែកពីរបៀបថតខ្សែភាពយន្ត Action ដោយប្រើគុនល្បុក្កតោ ។
តួឯក ក្នុងរឿង Jailbreak ការពារឧក្រិដ្ឋជនរូបនេះ ទទួលបានការចាប់អារម្មណ៍យ៉ាងខ្លាំង សម្រាប់ការសម្ដែង ខណៈដែលលោកក៏កាន់តែបង្ហាញភាពរីករាយនៅពេលសមាជិកក្នុងក្រុមល្បុក្កតោម្នាក់ទៀត គឺលោក ឌឹប ង៉ែត ក៏លេចធ្លោលើឆាកអន្តរជាតិនៅក្នុងពេលនេះ ៕ (កែសម្រួលដោយ ៖ បុប្ផា)
ចែករំលែកព័តមាននេះ