បរទេស ៖ ស្ថិតក្នុងវ័យ៤៦ឆ្នាំ ស្តេចប្រដាល់សកលហ្វីលីពីន ម៉ានី ប៉ាក់គីអៅ (Manny Pacquiao) កាលពីពេលថ្មីៗនេះ បានបញ្ជាក់ពីចេតនាវិលឡើងសង្វៀនអាជីពសាជាថ្មីម្តងទៀត…
បរទេស ៖ ស្ថិតក្នុងវ័យ៤៦ឆ្នាំ ស្តេចប្រដាល់សកលហ្វីលីពីន ម៉ានី ប៉ាក់គីអៅ (Manny Pacquiao) កាលពីពេលថ្មីៗនេះ បានបញ្ជាក់ពីចេតនាវិលឡើងសង្វៀនអាជីពសាជាថ្មីម្តងទៀត នៅខែធ្នូ ឆ្នាំ២០២៥ ប៉ុន្តែនៅមិនទាន់បង្ហាញថា នរណាជាគូប្រកួតបន្ទាប់របស់ខ្លួននៅឡើយទេ។ ដូច្នេះហើយមកដល់ត្រឹមនេះ សារព័ត៌មាន beIN SPORTS កាលពីថ្មីៗនេះ បានចេញផ្សាយអត្ថបទមួយដោយលើកជាសំណួរថា តើពេលណាទើប ម៉ានី ប៉ាក់គីអៅ អាចឡើងសង្វៀនម្តងទៀត ហើយកីឡាកររូបណាអាចជាគូប្រកួតបន្ទាប់?
ការប្រកួតអាជីពចុងក្រោយបំផុតរបស់ ប៉ាក់គីអៅ បានធ្វើឡើងកាលពីថ្ងៃទី១៩ ខែកក្កដា ឆ្នាំ២០២៥ នៅក្នុងទីក្រុងឡាសវេហ្គាស (Las Vegas) សហរដ្ឋអាមេរិក ដោយបញ្ចប់ទៅលទ្ធផលស្មើគ្នាជាមួយកីឡាករឆ្នើមសញ្ជាតិអាមេរិក Mario Barrios ដែលជាម្ចាស់ខ្សែក្រវាត់ពិភពលោក WBC Super Welterweight។ លទ្ធផលនោះបានធ្វើឱ្យ ប៉ាក់គីអៅ បើកទ្វារទទួលយកការប្រកួតបន្ទាប់ទៀត ក៏ដូចជាបង្ហាញថា គាត់នៅតែអាចប្រកួតប្រជែងជាមួយកីឡាករកម្រិតកំពូល ទោះវ័យជ្រេយ៉ាងណាក៏ដោយ។
beIN SPORTS ប៉ុស្តិ៍ទូរទស្សន៍កីឡាដ៏ល្បីលំដាប់ពិភពលោករបស់ប្រទេសកាតា បានចុចឈ្មោះកីឡាករដែលជាគូប្រជែងបន្ទាប់ដ៏ស័ក្តិសមបំផុតរបស់ ប៉ាក់គីអៅ ដោយក្នុងនោះ មិនអាចបដិសេធបានទេ ការប្រកួតសងសឹងជាមួយ Mario Barrios ស្របពេលដែលកីឡាករសញ្ជាតិអាមេរិកវ័យ៣០ឆាំ្នរូបនេះ ក៏បានបើកភ្លើងបៃតងទទួលយកការប្រកួតលើកទី ២ ជាមួយ ប៉ាក់គីអៅ ផងដែរ។
អ្នកបន្ទាប់គឺ Rolando Romero អ្នកប្រដាល់សញ្ជាតិអាមេរិកវ័យ២៩ឆ្នាំ ម្ចាស់ខ្សែក្រវាត់ពិភពលោក WBA welterweight និង WBA super lightweight ក៏ឈរជាកីឡាករដ៏លេចធ្លោបំផុតម្នាក់ជាគូប្រជែងបន្ទាប់របស់ ប៉ាក់គីអៅ នៅចុងឆ្នាំនេះ។
អ្នកប្រដាល់អាមេរិកមិនទាន់ស្គាល់ចាញ់ Floyd Mayweather នៅតែជាការប្រកួតសងសឹក ដែលអ្នកគាំទ្រជុំវិញពិភពលោកចង់ឃើញសាជាថ្មីម្តងទៀត ចាប់តាំងពីអ្នកប្រដាល់ចាយលុយមិនសំចៃដៃវ័យ៤៨ឆ្នាំរូបនេះ បានយកឈ្នះ ប៉ាក់គីអៅ កាលពីដើមខែឧសភា ឆ្នាំ២០២៥។
អ្នកស័ក្តិសមបំផុតម្នាក់ទៀតគឺ អ្នកប្រដាល់ឆ្នើមសញ្ជាតិអាមេរិក Gervonta Davis វ័យ៣០ឆ្នាំ គឺជាការផ្គូរផ្គង់ដែលអ្នកគាំទ្រលើកមកនិយាយច្រើនជាងគេបំផុតនៅប៉ុន្មានថ្ងៃថ្មីៗនេះ ដោយបានចាត់ទុកថាជាជម្រើសការប្រកួតដ៏លំបាក និងស័ក្តិសមបំផុតសម្រាប់ ប៉ាក់គីអៅ ដែលគ្រប់គ្នាទន្ទឹងចង់ឃើញបំផុត៕
ចែករំលែកព័តមាននេះ