រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជា យុវជនអាយុក្រោម២៣ឆ្នាំ នឹងត្រូវទទួលស្វាគមន៍ក្រុមជម្រើសជាតិអូម៉ង់ អាយុក្រោម២៣ឆ្នាំ ជំនួបបើកឆាកការប្រកួតវគ្គជម្រុះពានរង្វាន់ជើងឯកយុវជនអាយុក្រោម ២៣ឆ្នាំ ទ្វីបអាស៊ី ឆ្នាំ២០២៦…
រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជា យុវជនអាយុក្រោម២៣ឆ្នាំ នឹងត្រូវទទួលស្វាគមន៍ក្រុមជម្រើសជាតិអូម៉ង់ អាយុក្រោម២៣ឆ្នាំ ជំនួបបើកឆាកការប្រកួតវគ្គជម្រុះពានរង្វាន់ជើងឯកយុវជនអាយុក្រោម ២៣ឆ្នាំ ទ្វីបអាស៊ី ឆ្នាំ២០២៦ (AFC U23 Asian Cup Saudi Arabia 2026) ប្រចាំពូល G ដែលធ្វើឡើងនៅពហុកីឡដ្ឋានជាតិ (អូឡាំពិក) វេលាម៉ោង ៧:០០នាទីយប់នេះ។
លោក Koji Gyotoku គ្រូបង្វឹកក្រុម U23 កម្ពុជា បានថ្លែងនៅក្នុងសន្និសីទសារព័ត៌មានមុនការប្រកួត កាលពីថ្ងៃទី២ កញ្ញា ថា លោកពិតជារីករាយ ដែលអាចប្រកួតជាមួយក្រុមខ្លាំងៗ នៅវគ្គជម្រុះនេះ ហើយលោកបានរៀបចំក្រុមរួចរាល់ហើយ សម្រាប់ការប្រកួតទល់នឹងអូម៉ង់។
ទោះយ៉ាងណាក៏ដោយ គ្រូជនជាតិជប៉ុនរូបនេះ ក៏មានការបារម្ភថា ការប្រកួតជម្រុះនេះ អាចមានការរំខាន ដោយសារភ្លៀងធ្លាក់ ហើយលោកក៏មិនបានតាមដានការហ្វឹកហាត់របស់ក្រុមផ្សេងៗផងដែរ មិនដឹងថា កាយសម្បទាកីឡាករក្រុមផ្សេងធំប៉ុនណា បើធៀបនឹងក្រុមកម្ពុជា។ យ៉ាងនេះក្តី លោកបង្ហាញការជឿជាក់លើកូនក្រុមថានឹងធ្វើបានល្អក្នុងការប្រកួតនេះ ដោយមិនខ្វល់ពីកត្តាកាយសម្បទា និងល្បឿនរបស់គូប្រកួតឡើយ។
សូមជម្រាបថា កម្ពុជាបានទទួលសិទ្ធធ្វើម្ចាស់ផ្ទះការប្រកួតវគ្គជម្រុះទាំងអស់នៅពូល G រួមជាមួយក្រុម U23 អ៊ីរ៉ាក់, អូម៉ង់ និងប៉ាគីស្ថាន ដោយការប្រកួតចាប់ផ្តើមពីថ្ងៃទី១ ដល់ថ្ងៃទី៩ ខែកញ្ញា ឆ្នាំ២០២៥។ ដ្បិតការប្រកួតវគ្គជម្រុះនេះ មានសរុបចំនួន ៤៤ក្រុមចូលរួមប្រកួត ចែកចេញជា ១១ ពូល ដោយ ១ ពូលមាន ៤ ក្រុម។
ក្រុមចំណាត់ថ្នាក់លេខ១ តាមពូលនីមួយៗ និងក្រុមលេខ២ល្អ ចំនួន ៤ ក្រុម នឹងបន្តទៅកាន់ការប្រកួតជុំផ្តាច់ព្រ័ត្រ ដែលធ្វើឡើងនៅប្រទេសអារ៉ាប៊ីសាអូឌីត ចាប់ពីថ្ងៃទី៧ ដល់ថ្ងៃទី២៥ ខែមករា ឆ្នាំ២០២៥៕ រូបភាព ៖ សហព័ន្ធកីឡាបាល់ទាត់កម្ពុជា, CPL និង AFC
ចែករំលែកព័តមាននេះ