ប្រទេស​ប្រេ​ស៊ី​ល ៖ យោង​តាម​ប្រភព​ពី​សារព័ត៌មាន​ធំ​ៗ​ជា​ច្រើន រួម​ទាំង goal.com Daily Mail និង The Sun កាលពី​ថ្ងៃ​ទី​៤ ខែកញ្ញា ឆ្នាំ​២០២៥ បាន​រាយការណ៍​ថា មហាសេដ្ឋី​ប្រេ​ស៊ី​ល​មិន​ស្គាល់​អត្តសញ្ញាណ​ម្នាក់ បាន​ដាក់​ឈ្មោះ Neymar ជា​អ្នក​ស្នង​មរតក​នៃ​ទ្រព្យសម្បត្តិ​ទាំងអស់​របស់​ខ្លួន បើ​ទោះបីជា​អ្នក​ទាំង​ពីរ​មិន​ដែល​បាន​ជួប ឬ​ស្គាល់គ្នា​យ៉ាងណា​ក៏​ដោយ​។

Neymar ខ្សែប្រយុទ្ធ​ឆ្នើម​ក្រុម​ជម្រើសជាតិ​ប្រេ​ស៊ី​ល និង​ក្លិប Santos វ័យ​៣៣​ឆ្នាំ កាលពី​ពេល​ថ្មី​ៗ​នេះ ត្រូវ​បាន​រាយការណ៍​ថា ជា​អ្នក​ទទួល​មរកត​ដ៏​មហាសាល​ចំនួន ៨៤៦​លាន​ផោន ឬ​ជាង ១,១៣​ពាន់​លាន​ដុល្លារ​អា​មេ​រិ​ក​ពី​មហាសេដ្ឋី​ប្រេ​ស៊ី​លវ័យ​៣១​ឆ្នាំ ដែល​បាន​ទទួលមរណៈភាព និង​មិន​ត្រូវ​បាន​ស្គាល់​អត្តសញ្ញាណ​ម្នាក់ ខណៈ​ដែល​មរតក​ត​នោះ រួម​មាន ទ្រព្យ​សុទ្ធ អចលនទ្រព្យ ការ​វិនិយោគ និង​ភាគហ៊ុន​ក្នុង​ក្រុមហ៊ុន​ធំ​ៗ​ផង​ដែរ​។

ប្រភព​ពី​សារព័ត៌មាន​ប្រេ​ស៊ី​ល RIC បាន​ចេញផ្សាយ​ថា ការ​លះបង់​ទ្រព្យសម្បត្តិ​នេះ ត្រូវ​បាន​ធ្វើ​ឡើងជា​ផ្លូវការ​នៅ​ការិយាល័យ​ផ្លូវច្បាប់​មួយ​ក្នុង​ទីក្រុង Porto Alegre នៃ​រដ្ឋ Rio Grande do Sul ហើយ​ត្រូវ​បាន​ផ្ទៀងផ្ទាត់ នៅ​ថ្ងៃ​ទី​១២ ខែមិថុនា ឆ្នាំ​២០២៥ ជាមួយ​សាក្សី​២​នាក់​ដែល​បង្ហាញ​វត្តមាន​ដោយ​ផ្ទាល់​។ បញ្ហា​នេះ នឹង​ត្រូវ​ឆ្លងកាត់​ការ​ជំនុំជម្រះ​ពី​តុលាការ​ប្រេ​ស៊ី​ល​ជា​មុន​សិន ប្រសិនបើ Neymar ពិតជា​ត្រូវ​បាន​ដាក់​ឈ្មោះ​ជា​អ្នក​ស្នង​មរតក​ដ៏​មហាសាល​នេះ ដោយសារ​តែ​មហាសេដ្ឋី​រូប​នេះ ត្រូវ​បាន​រាយការណ៍​ថា គ្មាន​កូន និង​នៅ​លីវ​។

ពាក់ព័ន្ធ​នឹង​រឿង​នេះ Neymar មិន​បាន​ធ្វើ​អត្ថាធិប្បាយ​ជា​សាធារណៈ​លើ​របាយការណ៍​ជុំវិញ​ការ​ទទួល​មរតក​នោះ​នៅឡើយ​ទេ​។ ការ​លះបង់​ទ្រព្យសម្បត្តិ​របស់​មហាសេដ្ឋី​រូប​នោះ អាច​ប្រឈម​នឹង​ផលវិបាក​ផ្លូវច្បាប់​ជា​ច្រើន បើ​ទោះជា​វា​នឹង​ត្រូវ​បាន​អនុម័ត​ក៏​ដោយ​។

នៅ​ក្នុង​ឯកសារ​ផ្លូវច្បាប់ មហាសេដ្ឋី​មិន​ស្គាល់​អត្តសញ្ញាណ​រូប​នោះ​បាន​អះអាង​ថា លោក​ជ្រើសរើស Neymar ជា​អ្នក​ទទួល​មរកត​ក្នុង​ការ​វិនិច្ឆ័យ​ពេញលេញ ដោយ​គ្មាន​ការ​បង្ខិតបង្ខំ ឬ​ការ​លើកទឹកចិត្ត​ណាមួយ​ឡើយ ហើយ​ថា ការ​សម្រេចចិត្ត​នេះ ត្រូវ​បាន​ធ្វើ​ឡើង​ដោយសារ​តែ​អ្នកជំនួញ​រូប​នោះ និង Neymar គឺជា​មនុ​ស្សមានភាព​ដូច​គ្នា​ច្រើន​។

ឯកសារ​នោះ​បាន​សរសេរ​ថា «​ខ្ញុំ​ចូល​ចិត្ត Neymar ខ្ញុំ​មាន​ភាព​ដូច​គេ​ច្រើន​។ មហាសេដ្ឋី​រូប​នេះ បាន​ពន្យល់​អំពី​ការ​សម្រេចចិត្ត​នៅ​ក្នុង​ឆ្នាំ ២០២៣ របស់​ខ្លួន ដោយ​បញ្ជាក់​ថា ខ្លួន​ប្រឈម​នឹង​បញ្ហា​សុខភាព​ធ្ងន់ធ្ងរ ហើយ​ក៏​បាន​រំលេច និង​កោតសរសើរ​អំពី​ទំនាក់ទំនង​របស់ Neymar ជាមួយ​ឪពុក​របស់​គេ ដែល​បាន​រំឭក​មហាសេដ្ឋី​រូប​នោះ​អំពី​ឪពុក​របស់​ខ្លួន ដែល​បាន​ទទួលមរណភាព​។

បច្ចុប្បន្ន ឯកសារ​ផ្លូវច្បាប់​របស់​មហាសេដ្ឋី​មិន​ស្គាល់​អត្តសញ្ញាណ​រូប​នោះ ស្ថិត​នៅ​ក្នុង​ដៃ​តុលាការ​ប្រេ​ស៊ី​ល ដើម្បី​បញ្ជាក់​ពី​បំណងប្រាថ្នា​ក្នុង​ការ​ដាក់​ឈ្មោះ​ជា​ផ្លូវការ​ថា Neymar គឺជា​អ្នក​ស្នង​មរតក​ដ៏​មហាសាល​នោះ​៕