រាជធានីភ្នំពេញ ៖ នាល្ងាច និងរាត្រីថ្ងៃទី១៩ មេសា ដែលជាថ្ងៃបញ្ចប់ព្រឹត្តិការណ៍«នគរសង្ក្រាន្ត» នៅរាជធានីភ្នំពេញ ឯកឧត្តម ឃួងស្រេង អភិបាលរាជធានីភ្នំពេញ,…
រាជធានីភ្នំពេញ ៖ នាល្ងាច និងរាត្រីថ្ងៃទី១៩ មេសា ដែលជាថ្ងៃបញ្ចប់ព្រឹត្តិការណ៍«នគរសង្ក្រាន្ត» នៅរាជធានីភ្នំពេញ ឯកឧត្តម ឃួងស្រេង អភិបាលរាជធានីភ្នំពេញ, ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា,ឯកឧត្តមថោង ខុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈកម្មាធិការជាតិអូឡាំពិកកម្ពុជា, ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ ដាំ ដារ៉ានី រដ្ឋលេខាធិការក្រសួងការពារជាតិ និងជាអនុប្រធានសហភាពសហព័ន្ធយុវជនកម្ពុជា (ស.ស.យ.ក.) បានអញ្ជើញជាអធិបតីភាពក្នុងកម្មវិធីប្រកួតផ្ដាច់ព្រ័ត្រកីឡាអុកចត្រង្គ យកចំណាត់ថ្នាក់លេខ១និងលេខ២ នៅភូមិវប្បធម៌ដណ្ដើមយកពានរង្វាន់សម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា។
កម្មវិធីប្រកួតកីឡាអុកចត្រង្គផ្ដួចផ្ដើមគំនិតប្រកបដោយចក្ខុវិស័យរបស់ឯកឧត្ដមឧបនាយក
រដ្ឋមន្ត្រីហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) ដើម្បីលើកទឹកចិត្ត និងលើកកម្ពស់កីឡាអុកចត្រង្គជាកីឡាយុទ្ធសាស្ដ្ររបស់ខ្មែរ។ សម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន និងសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិតពេជ ច័ន្ទមុនី ហ៊ុន ម៉ាណែត បានជួយឧបត្ថម្ភក្នុងកម្មវិធីនេះ។
សម្រាប់ការប្រកួតនេះ ធ្វើឡើងរវាងលោកសុខ លឹមហេង អាយុ២៤ឆ្នាំ និងលោកជា ស៊ីដេត អាយុ៤១ឆ្នាំ ដើម្បីដណ្តើមយកពានរង្វាន់សម្តេចតេជោ លេខ១និងលេខ២ ។ ជាលទ្ធផល ចំណាត់ថ្នាក់លេខ១បានទៅលើ លោកសុខ លឹមហេង ជាស្ដេចអុកប្រចាំឆ្នាំ២០២៦។ ចំណែកការប្រកួតកាលពីម្សិលម៉ិញ ជាកម្មវិធីប្រកួតកីឡាអុកចត្រង្គ វ័យកុមារ យកចំណាត់ថ្នាក់លេខ១និងលេខ២ ហើយចំណាត់ថ្នាក់លេខ១ បានទៅលើ កុមារា ឈ្មោះ សេង វុត្រា អាយុ១២ឆ្នាំជាស្ដេចអុកប្រចាំឆ្នាំ២០២៦។
សូមបញ្ជាក់ថា ពិធីអបអរសាទរបុណ្យចូលឆ្នាំថ្មីប្រពៃណីខ្មែរ ឆ្នាំមមី ឆ្នាំ២០២៦នេះ ក្រោមកិច្ចសហការរវាងសហភាពសហព័ន្ធយុវជនកម្ពុជា ជាមួយរដ្ឋបាលរាជធានីភ្នំពេញ បានរៀបចំព្រឹត្តិការណ៍នគរសង្ក្រាន្ត រយៈពេល៦ថ្ងៃ ចាប់ពីថ្ងៃទី១៤ ដល់ថ្ងៃទី១៩ ខែមេសា ។ ព្រឹត្តិការណ៍ «នគរសង្ក្រាន្ត»រៀបចំឡើងនៅតាមទីតាំងទាំង៦ដូចជានៅរមណីយដ្ឋានវប្បធម៌ប្រវត្តិសាស្ត្រវត្តភ្នំ តំបន់ជុំវិញវត្តភ្នំ បរិវេណសួនច្បារវឌ្ឍនៈ សួនច្បារអតីតទីលានប្រជាធិបតេយ្យ ស្ពាននាគភ្លោះរមណីយដ្ឋានវត្តភ្នំ រហូតដល់ផ្សាររាត្រី ផ្លូវថ្មើរជើងចតុមុខរាជធានីភ្នំពេញ(Walk Street)និងកម្មវិធីអមនៅបរិវេណបាសាក់លែន(Bassac Lane) និងបរិវេណផ្សារទួលទំពូង ៕
ចែករំលែកព័តមាននេះ