សហរដ្ឋអាមេរិក ៖ អតីតម្ចាស់ខ្សែក្រវាត់កីឡាប្រដាល់សកលពិភពលោកទាំងពីរ Mike Tyson និង Floyd Mayweather គ្រោងនឹងតទល់គ្នាលើសង្វៀនប្រកួតមិនអាជីព ឬការប្រកួតតាំងពិព័រណ៍…
សហរដ្ឋអាមេរិក ៖ អតីតម្ចាស់ខ្សែក្រវាត់កីឡាប្រដាល់សកលពិភពលោកទាំងពីរ Mike Tyson និង Floyd Mayweather គ្រោងនឹងតទល់គ្នាលើសង្វៀនប្រកួតមិនអាជីព ឬការប្រកួតតាំងពិព័រណ៍ (Exhibition Match) នៅឆ្នាំក្រោយ ដែលជាដំណឹងដ៏ភ្ញាក់ផ្អើលបំផុតមួយ សម្រាប់អ្នកគាំទ្រនៅទូទាំងពិភពលោក។
ការប្រកួតដ៏កក្រើកនេះ នឹងត្រូវរៀបចំឡើងដោយក្រុមហ៊ុន CSI Sports/Fight Sports ប៉ុន្តែព័ត៌មានលម្អិតទាក់ទងនឹងកាលបរិច្ឆេទ ទីតាំង កម្មវិធីផ្សាយ និងច្បាប់នៃការប្រកួតរវាងកំពូលអ្នកប្រដាល់សកលដ៏ល្បីល្បាញរបស់សហរដ្ឋអាមេរិកទាំងពីររូប មិនទាន់ត្រូវបានប្រកាសនៅឡើយទេ។ នេះបើតាមប្រភពពីសារព័ត៌មាន BBC និង ESPN បានចេញផ្សាយ។
លោក Mike Tyson ឬ មនុស្សដែក Mike Tyson បច្ចុប្បន្នឈានដល់វ័យ៥៩ឆ្នាំ គឺជាអតីតម្ចាស់ខ្សែក្រវាត់ទម្ងន់ធ្ងន់ពិភពលោក (Undisputed Heavyweight Champion) បានចូលនិវត្តន៍កាលពីឆ្នាំ២០០៥ ខណៈពេលដែលលោក Floyd Mayweather Jr. ដែលបច្ចុប្បន្នឈានដល់វ័យ៤៨ឆ្នាំ បានចូលនិវត្តន៍កាលពីឆ្នាំ២០១៧ ជាមួយកំណត់ត្រាមិនស្គាល់ចាញ់ ឬស្មើ បន្ទាប់ពីឆ្លងកាត់ការប្រកួត៥០ដង និងឈ្នះខ្សែក្រវាត់ពិភពលោកលើប្រភេទទម្ងន់ផ្សេងគ្នាៗជាច្រើន។ អ្នកទាំងពីរត្រូវបានអ្នកគាំទ្រចាត់ទុកថាជាប្រដាល់ឆ្នើមបំផុតរបស់សហរដ្ឋអាមេរិក និងពិភពលោក ស្ថិតនៅក្នុងចំណោមកីឡាករជាច្រើនផ្សេងទៀត។
ពាក់ព័ន្ធនឹងជំនួបនេះ លោក Mike Tyson បានថ្លែងដូច្នេះថា «ការប្រកួតនេះ មិនមែនជាអ្វីដែលពិភពលោក និងខ្ញុំមិនធ្លាប់គិតថានឹងអាចកើតឡើងនោះទេ។ មនុសដែក Mike ទើបតែត្រឡប់ឡើងសង្វៀនសាជាថ្មី ដោយបញ្ចប់ការប្រកួតអាជីពកំពុងលើកដំបូងរបស់ខ្លួន ចាប់តាំងពីការចូលនិវត្តន៍អស់រយៈពេល១៩ឆ្នាំ កាលពីខែវិច្ឆិកា ឆ្នាំ២០១៩ ដោយបានបរាជ័យក្រោមស្នាដៃយុវជន Jake Paul តារាយូធូបដែលបានប្រែខ្លួនក្លាយជាអ្នកប្រដាល់អាជីព។ Mike Tyson បានចំណាយពេលពេញមួយអាជីពរបស់លោក ដោយឈ្នះ៥០ដងពីការប្រកួតសរុប៥៩ដង នៅក្នុងប្រភេទទម្ងន់ធ្ងន់ ខណៈដែលអាជីពរបស់ Mayweather ស្ថិតនៅក្នុងប្រភេទទម្ងន់មធ្យម Welterweight ។
ងាកមក Mayweather ដែលបានឈ្នះខ្សែក្រវាត់លើប្រភេទទម្ងន់ចំនួន ៥ ផ្សេងគ្នា បានឆ្លងកាត់ការប្រកួតមិនអាជីព (Exhibition) ជាច្រើនរួចមកហើយ ចាប់តាំងពីចូលនិវត្តន៍កាលពីឆ្នាំ២០១៧ ខណៈដែលការប្រកួតចុងក្រោយតទល់នឹងកីឡាករ John Gotti III កាលពីខែសីហា ឆ្នាំមុន ត្រូវបានរំសាយត្រឹមទឹក ៦ ក្រោយក្រុមអ្នកគាំទ្រចូលអុកឡុកដល់សង្វៀន៕ ប្រភព ៖ BBC និង ESPN
ចែករំលែកព័តមាននេះ