រាជធានីភ្នំពេញ ៖ គណៈកម្មាធិការជាតិអូឡាំពិកកម្ពុជា(NOCC) នឹងរៀបចំការចាក់បញ្ចាំងពិធីបើកកីឡាស៊ីហ្គេមលើកទី៣២ឆ្នាំ២០២៣នៅរៀងភាពយន្តដើម្បីរម្លឹកខួបអនុស្សារីយ៍ ៣ឆ្នាំដែលកម្ពុជាធ្វើជាម្ចាស់ផ្ទះនូវមហាព្រឹត្តិការណ៍ប្រកួតកីឡាស៊ីហ្គេមដ៏អស្ចារ្យប្រកបដោយជោគជ័យ។
ដើម្បីជាភាពងាយស្រួលក៏ដូចជាការប្រកួកប្រកាសទៅដល់ស្រទាប់មហាជនខ្មែរបានចូលទស្សនាការចាក់បញ្ចាំងឡើងវិញនូវព្រឹត្តិការណ៍កីឡាស៊ីហ្គេមឆ្នាំ២០២៣ គនៈកម្មាធិការជាតិអូឡាំពិកកម្ពុជានឹងធ្វើការចែកសំបុត្រចូលទស្សនាដោយឥតគិតថ្លៃនៅថ្ងៃទី៥ខែឧសភា ឆ្នាំ២០២៦។
ចំពោះទីតាំងដែលត្រូវចែកជូនមានដូចជា៖នៅរោងភាពយន្តសប្បាយSabay Cinemaផ្សារទំនើបអីអនមានជ័យចំនួន៥០០សន្លឹក។នៅរោងភាពយន្ត Legend Cinemaនៅផ្សារទំនើបអូឡាំព្យាចំនួន២៥០សន្លឹកនៅថ្ងៃទី៥ខែឧសភា។ចំណែកកីឡាករ កីឡាការិនី គ្រូបង្វឹកជម្រើសជាតិព្រមទាំងបងប្អូន ពូមីង អាចមកទទួលសំបុត្រដោយឥតគិតថ្លៃចាប់ពីថ្ងៃទី២៣ខែមេសានេះតទៅ នៅទីស្នាក់ការគណៈកម្មាធិការជាតិអូឡាំពិកកម្ពុជាដែលមានទីតាំងនៅជាប់រង្វង់មូលវត្តសំពៅមាស។
ព្រឹត្តិការណ៍កីឡាស៊ីហ្គេមលើកទី៣២ឆ្នាំ២០២៣គឺជាប្រវត្តិសាស្ត្រ ដំបូងដែលបានកើនឡើងនៅលើទឹកដីនៃព្រះរាជាណាចក្រកម្ពុជា។ទាំងពិធីបើកនិងពិធីបិទ ត្រូវបានគេចាត់ទុក ជាការរៀបចំដ៏អស្ចារ្យបំផុតក្នុងប្រវត្តិសាស្ត្រកីឡាស៊ីហហ្គេមដែលបានបង្ហាញពីភាពរុងរឿងសម្បូរបែបប្រកបដោយសក្ដានុពលរបស់កម្ពុជា ទាំងសិល្បៈ វប្បធម៌និងប្រាងប្រាសាទនានាដ៏អស្ចារ្យ។
ក្នុងនាមជាម្ចាស់ផ្ទះរៀបចំជាលើកដំបូង កម្ពុជាទទួលបានជោគជ័យធំធេងបំផុតសម្រាប់ការរៀបចំមហាព្រឹត្តិការណ៍កីឡាតំបន់អាស៊ីអាគ្នេយ៍មួយនេះ ទាំងផ្នែកសម័យទំនើបនិងបូរាណ។ ដើម្បីសម្លឹកខួបអនុ ស្សាវរីយ៍រយៈពេល៣ឆ្នាំកន្លងផុតទៅ និងការស្វះស្វែងរកការឧបត្ថម្ភគាំទ្រដល់អត្តពលិកកម្ពុជា ឆ្ពោះទៅកីឡាអូឡាំពិកឆ្នាំ២០២៩ កម្ពុជាសម្រេចដាក់បញ្ចាំងឡើងវិនូវពិធីបើកស៊ីហ្គេម ក្នុងគោលបំណងរួមមាន៖ទី១.រម្លឹកពីជោគជ័យជាប្រវត្តិសាស្ត្រ ដែលកម្ពុជារង់ចាំអសរយៈពេល៦៤ឆ្នាំ សម្រាប់កីឡាស៊ីហ្គេមដំបូងនៅកម្ពុជា។ទី២ដើម្បីដាស់ស្មារតីចងចាំ “ខ្មែរធ្វើបាន ហើយធ្វើបានដ៏អស្ចារ្យថែមទៀត”ទី៣ចងចាំព្រឹត្តិការណ៍អន្តរជាតិដ៏អស្ចារ្យ កើតឡើងជាថ្មី នៅឆ្នាំ២០៣១។ទី៤ផ្ដល់ការឧបត្ថម្ភគាំទ្រដល់យុទ្ធនាការរកជំនួយឧបត្ថម្ភដល់អត្តពលិកកម្ពុជា សម្រាប់ឆ្ពោះទៅអូឡាំពិកនៅឆ្នាំ២០២៩និងទី៥រួមគ្នាដើម្បីក្រុមកីឡាអូឡាំពិកកម្ពុជា៕
ចែករំលែកព័តមាននេះ