រាជធានីភ្នំពេញ ៖ សហព័ន្ធកីឡាប្រដាល់គុនខ្មែរ នៅថ្ងៃទី២៥ ខែសីហា ឆ្នាំ២០២៥នេះ បានចេញសេចក្ដីជូនដំណឹងជាផ្លូវការ សម្រេចដាក់ពិន័យកីឡារបរទេស ចំនួន២រូប មិនឲ្យឡើងសង្វៀនប្រកួតរយៈពេល៦ខែ…
រាជធានីភ្នំពេញ ៖ សហព័ន្ធកីឡាប្រដាល់គុនខ្មែរ នៅថ្ងៃទី២៥ ខែសីហា ឆ្នាំ២០២៥នេះ បានចេញសេចក្ដីជូនដំណឹងជាផ្លូវការ សម្រេចដាក់ពិន័យកីឡារបរទេស ចំនួន២រូប មិនឲ្យឡើងសង្វៀនប្រកួតរយៈពេល៦ខែ ។
ក្នុងសេចក្ដីជូនដំណឹងរបស់សហព័ន្ធកីឡាប្រដាល់គុនខ្មែរ បានឲ្យដឹងថា ដោយពិនិត្យមើលឃើញពីភាពមិនប្រក្រតីពីការប្រកួតកីឡាប្រដាល់គុនខ្មែរ ក្នុងកម្មវិធីកំពូលអ្នកចម្បាំង អូដ្ឋ CAMEL របស់ស្ថានីយទូរទស្សន៍បាយ័ន (BTV) កាលពីថ្ងៃសៅរ៍ ទី២៣ ខែសីហា ឆ្នាំ២០២៥ វេលាម៉ោង ១៧:៣០នាទី ដែលជាគូដណ្តើមប្រាក់លាន វគ្គផ្ដាច់ព្រ័ត្ររវាងកីឡាករ GEORGE BRANUNES ជនជាតិប្រេស៊ីល ជាមួយនឹងកីឡាករ HMED EL HAMDONI ជនជាតិម៉ារ៉ុក ។ សកម្មភាពប្រកួតរបស់កីឡាករទាំងពីររូបនៅលើសង្វៀន មិនបានបង្ហាញអំពីឆន្ទៈ នៃការប្រកួតឱ្យអស់ពីសមត្ថភាពដូចមានចែងក្នុងបទបញ្ហាបច្ចេកទេសរៀបចំការប្រកួតកីឡាប្រដាល់គុនខ្មែរទុកជាមុន ក៏ដូចជាការប្រកួតមិនអស់ពីសមត្ថភាព ។
ក្នុងន័យនេះ សហព័ន្ធកីឡាប្រដាល់គុនខ្មែរ សម្រេចដាក់ពិន័យកីឡាករ GEORGE BRANUNES ជនជាតិប្រេស៊ីល និងកីឡាករ HMED EL HAMDONI ជនជាតិម៉ារ៉ុក មិនឱ្យចូលរួមប្រកួតកីឡាប្រដាល់គុនខ្មែរ រយៈពេល៦ខែ ចាប់ពីថ្ងៃទី២៤ ខែសីហា ឆ្នាំ២០២៥ រហូតដល់ថ្ងៃទី២៤ ខែកុម្ភៈ ឆ្នាំ២០២៦ នៅគ្រប់ស្ថានីយទូរទស្សន៍ និងសង្វៀននានា តាមបណ្តាខេត្ត ក្រោមការគ្រប់គ្រងរបស់សហព័ន្ធកីឡាប្រដាល់គុនខ្មែរ ដោយអនុវត្ត ចាប់ពីថ្ងៃជូនដំណឹងនេះតទៅ ៕
ចែករំលែកព័តមាននេះ