ប្រទេស​អេ​ស្ប៉ា​ញ ៖ ដំណឹង​នៃ​ការ​ភ្ជាប់ពាក្យ​ជា​ផ្លូវការ​របស់​កីឡាករ​បាល់ទាត់ Cristiano Ronaldo ជាមួយ​តារា​ម៉ូ​ដែល​កូនកាត់​អា​ហ្ស​ង់​ទី​ន​-​អេ​ស្ប៉ា​ញ Georgina Rodriguez ដែល​ជា​មិត្ត​ស្រី​រួមរស់​ជាមួយ​គ្នា​អស់​ពេល​៩​ឆ្នាំ កាលពី​ថ្ងៃ​ទី​១១ ខែសីហា ឆ្នាំ​២០២៥ បាន​ផ្ទុះ​កក្រើក​ប្រព័ន្ធ​ផ្សព្វផ្សាយ និង​បណ្តាល​សង្គម​នៅ​ជុំវិញ​ពិភពលោក​។ ប៉ុន្តែ​ជាមួយ​គ្នា​នោះ សារព័ត៌មាន​មួយ​ចំនួន​ក៏​គាស់​រំលើង​អតីត​មិត្ត​ស្រី​ជា​ច្រើន​រូប​របស់​ប្រធាន​ក្រុម​ជម្រើសជាតិ​ព័រ​ទុ​យ​ហ្គា​ល់ និង​ក្រុម Al Nassr រូប​នេះ ដែល​រួម​មាន តារា​ម៉ូ​ដែល តារា​សម្ដែង និង​បុគ្គល​ល្បី​លើ​បណ្តាញ​សង្គម (Influencer) ផង​ដែរ​។

យោង​តាម​ប្រភព​ពី​សារព័ត៌មាន Daily Mail ស្នេហា​ដំបូង​របស់ Ronaldo ក្នុង​នាម​ជា​កីឡាករ​បាល់ទាត់​អាជីព​កើតឡើង​នៅ​ដើម​ទស​វត្ស​ឆ្នាំ​២០០០ ជាមួយ​កញ្ញា Jordana Jardel ដែល​បច្ចុប្បន្ន​មាន​អាយុ​៤០​ឆ្នាំ​។ តារា​ម៉ូ​ដែល​ប្រេ​ស៊ី​ល​រូប​នេះ គឺជា​ប្អូនស្រី​របស់​ខ្សែប្រយុទ្ធ Mario Jardel ដែល​ជា​មិត្ត​រួម​ក្រុម Ronaldo នៅ​ក្លិប Sporting Lisbon​។ ពួក​គេ​បាន​ជួប​គ្នា​នៅ​ឆ្នាំ​២០០៣ ប៉ុន្តែ​បាន​បែក​គ្នា​ភ្លាម​ៗ បន្ទាប់​ពី Ronaldo បាន​ផ្លាស់​ទៅ​ចូលរួម​ជាមួយ Manchester United​។

បន្ទាប់​មក​ទៀត Ronaldo បាន​ណាត់ជួប​ជាមួយ​កញ្ញា Merche Romero តារា​បង្ហាញ​ម៉ូត​ជនជាតិ​ព័រ​ទុ​យ​ហ្គា​ល់ និង​ពិធី​ការិនី​ទូរទស្សន៍ ដែល​មាន​អាយុ​បង Ronaldo ៩​ឆ្នាំ​។ ពួក​គេ​ជួប​គ្នា​ក្នុង​ឆ្នាំ​២០០៥ ហើយ​ទាក់ទង​គ្នា​បាន​ជាង​១​ឆ្នាំ​មុន​ពេល​បែក​គ្នា​ឆ្នាំ​២០០៦ ដោយសារ​ទំនាក់ទំនង​អ្នក​ទាំង​ពីរ​នៅ​ឃ្លាតឆ្ងាយ​គ្នា​ខ្លាំង​ពេក ម្នាក់​នៅ​អង់គ្លេស និង​ម្នាក់​នៅ​ព័រ​ទុ​យ​ហ្គា​ល់​។

ក្នុង​ឆ្នាំ​ដដែល​នោះ Ronaldo ត្រូវ​បាន​រាយការណ៍​មាន​ទំនាក់ទំនង​ជាមួយ​កញ្ញា Imogen Thomas តារា​កម្មវិធី​ទូរទស្សន៍​ដ៏​ល្បី​របស់​អង់គ្លេស «Big Brother»​។ ស្នេហា​ភ្លើងចំបើង ពួក​គេ​បាន​បង្កើត​ចំណងជើង​កក្រើក​ប្រព័ន្ធ​ផ្សព្វផ្សាយ ហើយ​បើ​ទោះបីជា​ក្រោយមក​មាន​ពាក្យ​ចចាមអារ៉ាម​ផ្ទុះ​ឡើង​ក្នុង​ឆ្នាំ​២០១១ នៃ​ការ​ចាប់ផ្តើម​ទំនាក់ទំនង​គ្នា​ឡើង​វិញ​រវាង​អ្នក​ទាំង​ពីរ​ក៏​ដោយ ក៏ Ronaldo បាន​បដិសេធ​ទាំងស្រុង​។

ក្នុង​ឆ្នាំ​២០០៦​នោះ​ដែរ Ronaldo ក៏​មាន​ពាក្យ​ចចាមអារ៉ាម​ថា​ណាត់ជួប​ជាមួយ កញ្ញា Soraia Chaves ដែល​ក្រោយមក​ក្លាយជា​តារា​ម៉ូ​ដែល​ព័រ​ទុ​យ​ហ្គា​ល់​ដែល​កំពុង​លេចធ្លោ​ខ្លាំង និង​បន្ត​វិវឌ្ឍន៍​ខ្លួន​ក្លាយជា​តារា​សម្តែង​ល្បី​ផង​ដែរ​។

ក្នុង​ឆ្នាំ​២០០៧ ទំនាក់ទំនង​របស់ Ronaldo បាន​ទាក់ទាញ​ការ​ចាប់អារម្មណ៍​កាន់តែ​ខ្លាំង​ពី​ប្រព័ន្ធ​ផ្សព្វផ្សាយ ដោយ​រូបគេ​បាន​ណាត់ជួប​កញ្ញា Gemma Atkinson តារា​សម្ដែង​រឿង​ភាគ​ទូរទស្សន៍ «Hollyoaks» ប៉ុន្តែ​មិន​បាន​យូរអង្វែង​នោះ​ទេ​។

នៅ​ឆ្នាំ​ដដែល​នោះ Ronaldo ត្រូវ​បាន​គេ​ប្រទះ​ឃើញ​ថើប​តារា​បូ​លី​វូ​ដ Bipasha Basu នៅ​ក្លិប​រាត្រី​មួយ​កន្លែង​ក្នុង​ទីក្រុង​លី​ស​បោ​ន (Lisbon) ប្រទេស​ព័រ​ទុ​យ​ហ្គា​ល់ បន្ទាប់​ពី​កម្មវិធី​ប្រគល់​ពានរង្វាន់​មួយ​។ ខណៈ​ដែល​ពាក្យ​ចចាមអារ៉ាម​ស្នេហា​ផ្ទុះ​ឡើង អ្នក​ទាំង​ពីរ​នៅ​តែ​រាប់អាន​គ្នា​ជា​មិត្ត​ស្និទ្ធស្នាល​។

នៅ​ឆ្នាំ​២០០៨ Ronaldo បាន​បង្ហាញ​វត្តមាន​ជា​សាធារណៈ​ជាមួយនឹង​កញ្ញា Nereida Gallardo តារា​ម៉ូ​ដែល​ជនជាតិ​អេ​ស្ប៉ា​ញ ដោយ​តែងតែ​ថតរូប​ជាមួយ​គ្នា​នៅ​កន្លែង​កម្សាន្ត​ប្រណីត​ៗ ប៉ុន្តែ​ទំនាក់ទំនង​អ្នក​ទាំង​ពីរ​បាន​បញ្ចប់​ក្នុង​រយៈពេល​ប៉ុន្មាន​ខែ​ក្រោយមក​។

នៅ​រដូវក្តៅ​ឆ្នាំ​២០០៩ Ronaldo ត្រូវ​បាន​ប្រទះ​ឃើញ​នៅ​ទីក្រុង​ឡូ​សអាន់​ជ័រ​លេស (Los Angeles) សហរដ្ឋអាមេរិក ជប់លៀង​ជាមួយ​តារា​ម៉ូ​ដែល​ល្បី​អា​មេ​រិ​ក Paris Hilton និង​ប្អូនស្រី​របស់​នាង Nicky Hilton​។ អ្នក​ជិត​ស្និទ្ធ​បាន​អះអាង​ថា Ronaldo និង Paris ចាប់ផ្តើម​ស្រលាញ់​គ្នា​នៅ​ក្លិប​រាត្រី​មួយ​កន្លែង ប៉ុន្តែ​ទំនាក់ទំនង​ផ្លេកបន្ទោរ​នេះ​មាន​រយៈពេល​ប៉ុន្មាន​យប់​ប៉ុណ្ណោះ​។

នៅ​ឆ្នាំ​២០១០ Ronaldo មាន​ពាក្យ​ចចាមអារ៉ាម​ថា​មាន​ទំនាក់ទំនង​ស្នេហា​រយៈពេល​ខ្លី​ជាមួយ​តារា​ម៉ូ​ដែល​ដ៏​ល្បី​អា​មេ​រិ​ក កញ្ញា Kim Kardashian បន្ទាប់​ពី​នាង​ត្រូវ​បាន​គេ​រាយការណ៍​ថា​បាន​ចំណាយពេល​៣​ថ្ងៃ​នៅ​ទីក្រុង​ម៉ា​ឌ្រី​ដ​។

នៅ​ក្នុង​ឆ្នាំ​ដដែល​នោះ Ronaldo បាន​ចាប់ផ្តើម​បង្កើត​ទំនាក់ទំនង​ស្នេហា​ដ៏​ល្បី​បំផុត​របស់​ខ្លួន​ជាមួយ​កំពូល​តារា​ម៉ូ​ដែល​រុ​ស្ស៊ី កញ្ញា Irina Shayk ។ អ្នក​ទាំង​ពីរ​ជួប​គ្នា​នៅ​ក្នុង​កម្មវិធី​បង្ហាញ​ម៉ូ​ដ និង​ទាក់​ទង់​គ្នា​អស់​រយៈពេល​៥​ឆ្នាំ ដោយ​បង្ហាញខ្លួន​ជា​ញឹកញាប់​ក្នុង​កម្មវិធី​ធំ​ៗ​លំដាប់​ពិភពលោក​ជា​ច្រើន នៅ​ពេល​ដែល​អាជីព​របស់ Ronaldo ឈាន​ដល់​ចំណុចកំពូល​។ ទោះ​យ៉ាងណា​ក៏​ដោយ អ្នក​ទាំង​ពីរ​បាន​ចែកផ្លូវ​គ្នា​នៅ​ដើមឆ្នាំ​២០១៥ ដោយ​ត្រូវ​បាន​រាយការណ៍​មក​ថា កើត​ចេញពី​ការ​មិន​ចុះសម្រុង​គ្នា និង​កាលវិភាគ​នៃ​អាជីព​ការងារ​ខុស​ពី​គ្នា​។

មិនយូរ​ប៉ុន្មាន បន្ទាប់​ពី​ចែកផ្លូវ​គ្នា Ronaldo ត្រូវ​បាន​រាយការណ៍​ថា​មាន​ទំនាក់ទំនង​ជាមួយ​កញ្ញា Lucia Villalon ពិធី​ការិនី​ទូរទស្សន៍​កីឡា​របស់​អេ​ស្ប៉ា​ញ បើ​ទោះបីជា​គ្រួសារ​នាង​បាន​បដិសេធ​ថា កូនស្រី​គ្មាន​ទំនាក់ទំនង​ស្នេហា​ជាមួយ Ronaldo ក៏​ដោយ​។

នៅ​ឆ្នាំ​២០១៦ Ronaldo បាន​ណាត់ជួប​ជាមួយនឹង​កញ្ញា Desiree Cordero បវរកញ្ញា​អេ​ស្ប៉ា​ញ​ឆ្នាំ​២០១៤ ប៉ុន្តែ​មិនយូរ​ប៉ុន្មាន ពួក​គេ​ក៏​បាន​បញ្ចប់​ទំនាក់ទំនង​មួយ​នេះ​។

ក្រោយមក​ក្នុង​ឆ្នាំ​ដដែល​នោះ Ronaldo បាន​ជួប​កញ្ញា Georgina Rodriguez ខណៈ​ពេល​ដែល​នាង​កំពុងធ្វើការ​នៅ​ហាង​លក់ទំនិញ​ប្រណីត Gucci ស្ថិត​ក្នុង​ទីក្រុង​ម៉ា​ឌ្រី​ដ​។ ចាប់តាំងពី​ពេល​នោះ​មក គូស្នេហ៍​១​គូ​នេះ បាន​សាង​ទំនាក់ទំនង​ដ៏​រឹង​មាំ​ជាមួយ​កូន​ចំនួន ៥ នាក់ នៅ​ក្នុង​បន្ទុក​បច្ចុប្បន្ន​។

Ronaldo និង Georgina មានកូន​៤​នាក់​ជាមួយ​គ្នា រួម​មាន កូនភ្លោះ​ស្រី​ប្រុស Eva Maria និង Mateo កើត​ក្នុង​ឆ្នាំ​២០១៧ ដោយ​ការ​ពពោះ​ជំនួស និង​កូនស្រី Alana កើត​ក្នុង​ឆ្នាំ​២០១៧ ព្រមទាំង Bella កើត​ក្នុង​ឆ្នាំ​២០២២​។ តាម​ពិត​ទៅ Bella ក៏​ជា​កូនភ្លោះ​ស្រី​ប្រុស​ផង​ដែរ ប៉ុន្តែ​គួរ​ឱ្យ​សោកស្តាយ ប្អូនប្រុស​ភ្លោះ​របស់ Bella បាន​ស្លាប់​ពេល​កើតមក​ភ្លាម​ៗ​។ Ronaldo មានកូន​ប្រុស​ម្នាក់ គឺ Cristiano Ronaldo Jr. កើត​ក្នុង​ឆ្នាំ​២០១០ នៅ​មុន​ពេល​មាន​ទំនាក់ទំនង​ជាមួយ Rodriguez​។

នៅ​ថ្ងៃ​ទី​១១ ខែសីហា ឆ្នាំ 2025 កញ្ញា Georgina Rodriguez បាន​ប្រកាស​ពី​ការ​ភ្ជាប់ពាក្យ​របស់​ពួក​គេ​នៅ​លើ​បណ្តាញ​សង្គម Instagram ដោយ​បង្ហោះ​រូបថត​របស់​នាង​ពាក់ចិញ្ចៀន​ពេជ្រ​ដ៏​ធំ​។ តាម​ទស្សនាវដ្តី Elle របស់​ចក្រភព​អង់គ្លេស​បានឱ្យ​ដឹង​ថា ចិញ្ចៀនពេជ្រ​ដ៏​ធំ​របស់ Georgina ត្រូវ​បាន​អ្នកជំនាញ​ប៉ាន់​ស្មានថា​មាន​ទំហំ​ជាង​៣០​កា​រ៉ាត់ ហើយ​តម្លៃ​ក៏​ត្រូវប៉ាន់​ស្មានថា​ជាង​៣​លាន​ដុល្លារ​អា​មេ​រិ​ក​៕ ដកស្រង់ ៖ VnExpress