ចក្រភព​អង់គ្លេស ៖ យោង​តាម​ប​របាយការណ៍​ពី​សារព័ត៌មាន BBC នៅ​ថ្ងៃ​ទី​២ ខែកញ្ញា ឆ្នាំ​២០២៥ បានឱ្យ​ដឹង​ថា បណ្តា​ក្លិប​បាល់ទាត់​ក្រប​ខណ្ឌ​លី​គ​កំពូល​អង់គ្លេស Premier League (EPL) បាន​ចាយប្រាក់​បំបែក​កំណត់​ត្រា​នៅ​ក្នុង​ទីផ្សារ​ដោះ​ដូរ​កីឡាករ ខណៈ​ការ​ចំណាយ​នៅ​ទីផ្សារ​រដូវក្តៅ​ឆ្នាំ​២០២៥ ដែល​បាន​បិទទ្វារ​កាលពី​ថ្ងៃ​ទី​១ ខែកញ្ញា កន្លង​ទៅ បាន​កើន​លើស​ពី ៣​ពាន់​លាន​ផោន ឬ​ជាង ៤​ពាន់​លាន​ដុល្លារ​អា​មេ​រិ​ក​។

ទំហំ​ទឹកប្រាក់​សរុប​ចំនួន ២,៧៣​ពាន់​លាន​ផោន ឬ​ជាង ៣,៦​ពាន់​លាន​ដុល្លារ ត្រូវ​បាន​ចំណាយ​ចាប់តាំងពី​ថ្ងៃ​ទី​១៦ ខែមិថុនា ដល់​ត្រឹម​ថ្ងៃ​ទី​៣១ ខែសីហា ប៉ុន្តែ​កិច្ចព្រមព្រៀង​តម្លៃ​ដ៏​មហាសាល​ក្នុង​ថ្ងៃ​ចុង​ក្រោយ​នៃ​ទីផ្សារ​រដូវក្តៅ​ឆ្នាំ​នេះ បាន​បង្កើន​ចំនួន​សរុប​ដល់ ៣,០៨៧​ពាន់​លាន​ផោន ឬ ៤,១៧៥​ពាន់​លាន​ដុល្លារ ដោយ​បាន​មក​ជា​ចម្បង​ពី​ការ​ផ្ទេរ​របស់​ខ្សែប្រយុទ្ធ​អន្តរជាតិ​ស៊ុ​យ​អែ​ត Alexander Isak ពី​ក្លិប Newcastle ទៅ​ចូលរួម​ជាមួយ​ក្លិប Liverpool នៅ​ក្នុង​តម្លៃ​ឯតទគ្គ​កម្ម​ថ្លៃ​បំផុត​ប្រចាំ​ចក្រភព​អង់គ្លេស ១២៥​លាន​ផោន ឬ ១៦៩​លាន​ដុល្លារ​។

ការ​ចំណាយ​ដ៏​មហាសាល​នេះ​មាន​ចំនួន​ច្រើន​ជាង​ទីផ្សារ​រដូវក្ដៅ​ពី​មុន ដែល​ការ​ចំណាយ​ត្រឹមតែ ១,៩៦​ពាន់​លាន​ផោន ឬ ២,៦៥​ពាន់​លាន​ដុល្លារ​ប៉ុណ្ណោះ​។ ដ្បិត​ចំនួន​សរុប​នៃ​ការ​ចំណាយ​របស់​បណ្តា​ក្លិប​នៅ Premier League ក្នុងឆ្នាំនេះ ច្រើន​ជាង​ការ​ចំណាយ​សរុប​ពី​បណ្តា​ក្លិប​ទាំងអស់​នៅ​ក្រប​ខណ្ឌ​កំពូល​អា​ល្លឺ​ម៉​ង់ Bundesliga, អេ​ស្ប៉ា​ញ La Liga, បារាំង Ligue 1 និង​អ៊ី​តា​លី Serie A បូក​បញ្ចូល​គ្នា​ទៅ​ទៀត​។

ថ្ងៃ​ផុតកំណត់​នៃ​ទីផ្សារ​ដោះ​ដូរ​កីឡាករ​រដូវក្តៅ​ឆាំ្ន ២០២៥ បាន​បិទទ្វារ​នៅ​ម៉ោង ៧​នាទី​យប់ (​ម៉ោង​ក្នុងស្រុក​) ប៉ុន្តែ​ទោះបីជា​យ៉ាងណា​ក៏​ដោយ ការ​ដោះ​ដូរ​ទី​នៅ​តែ​អាច​បញ្ចប់​នៅ​ពីរ​ម៉ោង​បន្ទាប់​ពី​នោះ ប្រ​សិន​លិខិត​កិច្ចព្រមព្រៀង​ត្រូវ​បាន​ដាក់​ជូន​ទាន់​ពេលវេលា​។ ជាក់ស្តែង ការ​ផ្ទេរ​របស់​ខ្សែប្រយុទ្ធ Isak ត្រូវ​បាន​បញ្ជាក់​ផ្លូវការ​នៅ​ម៉ោង ៩:៣០​នាទី​យប់ (​ម៉ោង​ក្នុងស្រុក​)​។ បន្ទាប់​ពី​បញ្ជាក់​ពី​ការ​ចាកចេញ​របស់ Isak ក្រោយមក Newcastle បាន​ប្រកាស​ពី​ចុះហត្ថលេខា​នាំ​យក​ខ្សែប្រយុទ្ធ​អន្តរជាតិ​បារាំង Yoane Wissa ពី​ក្លិប Brentford ក្នុង​តម្លៃ ៥៥​លាន​ផោន ឬ ៧៤​លាន​ដុល្លារ​។

ការ​ផ្ទេរ​គួរ​ឱ្យ​កត់សម្គាល់​ផ្សេង​ទៀត​នៅ​ថ្ងៃ​ចុង​ក្រោយ​រួម​មាន Fulham បាន​បញ្ចប់​ការ​ផ្ទេរ​ក្នុង​តម្លៃ​កំណត់​ត្រា​ក្លិប ៤៦,៧​លាន​ដុល្លារ​នាំ​យក​ខ្សែបម្រើ​ស្លាប​ប្រេ​ស៊ី​ល Kevin ពី​ក្លិប Shakhtar Donetsk​។

Manchester United បាន​នាំ​យក​អ្នកចាំទី​បែ​ល​ហ្ស៊ិ​ក Senne Lammens ពី​ក្លិប Royal Antwerp តម្លៃ ២៤,៤​លាន​ដុល្លារ ខណៈ​ខ្សែប្រយុទ្ធ​អង់គ្លេស Jadon Sancho របស់​ក្រុម​រហស្សនាម «​បិសាច​ក្រហម​» មួយ​នេះ បាន​បញ្ចប់​កិច្ចព្រមព្រៀង​ខ្ចី​ជើង​ពេញ​១​រដូវ​កាល​ជាមួយ​ក្លិប Aston Villa​។ Tottenham Hotspur បាន​នាំ​យក​ខ្សែប្រយុទ្ធ​អន្តរជាតិ Randal Kolo Muani ពី​ក្លិប PSG ក្នុង​លក្ខខណ្ឌ​ខ្ចី​ជើង​ពេញ​១​រដូវ​កាល​។ Arsenal ក៏​បាន​នាំ​យក​ខ្សែការពារ​អន្តរជាតិ​អេ​ក្វា​ឌ័​រ Piero Hincapie ពី​ក្លិប Bayer Leverkusen ក្នុង​លក្ខខណ្ឌ​ខ្ចី​ជើង​ផង​ដែរ​៕ ប្រភព ៖ BBC