ប្រទេសអារ៉ាប៊ីសាអូឌីត ៖ នៅក្នុងការផ្លាស់ប្តូរមួយដើម្បីកាត់បន្ថយការចំណាយ ក៏ដូចជាជំរុញការអភិវឌ្ឍន៍ប្រកបដោយប្រសិទ្ធិភាព មូលនិធិវិនិយោគសាធារណៈអារ៉ាប៊ីសាអូឌីត ហៅកាត់ថា PIF បានប្រកាសដាក់លក់ភាគហ៊ុនក្លិបបាល់ទាត់ Al Nassr…
ប្រទេសអារ៉ាប៊ីសាអូឌីត ៖ នៅក្នុងការផ្លាស់ប្តូរមួយដើម្បីកាត់បន្ថយការចំណាយ ក៏ដូចជាជំរុញការអភិវឌ្ឍន៍ប្រកបដោយប្រសិទ្ធិភាព មូលនិធិវិនិយោគសាធារណៈអារ៉ាប៊ីសាអូឌីត ហៅកាត់ថា PIF បានប្រកាសដាក់លក់ភាគហ៊ុនក្លិបបាល់ទាត់ Al Nassr និងក្លិបធំចំនួន ៣ ផ្សេងទៀត រួមមាន Al Hilal, Al Ittihad និង Al Ahli។ ការប្រកាសលក់នេះ កើតឡើងត្រឹមតែប៉ុន្មានខែប៉ុណ្ណោះ បន្ទាប់ពីខ្សែប្រយុទ្ធឆ្នើម Cristiano Ronaldo បានបន្តកុងត្រាថ្មីជាមួយ Al Nassr។
តាមរបាយការណ៍ពីប្រព័ន្ធផ្សព្វផ្សាយអារ៉ាប់ កាលពីពេលថ្មីៗនេះបានឱ្យដឹងថា មូលនិធិវិនិយោគសាធារណៈអារ៉ាប៊ីសាអូឌីត ហៅកាត់ថា PIF កំពុងស្វែងរកអ្នកវិនិយោគ ដើម្បីផ្ទេរកម្មសិទ្ធិភាពជាម្ចាស់ក្លិបធំទាំង ៤ ចំនួននៅក្នុងប្រទេសអារ៉ាប៊ីសាអូឌីត។ ចាប់តាំងពីឆ្នាំ២០២៣ PIF បានកាន់កាប់ភាគហ៊ុនរហូតដល់ ៧៥% ភាពជាម្ចាស់ក្លិបទាំង ៤ នេះ ហើយភាគហ៊ុនដែលនៅសល់ត្រូវបានគ្រប់គ្រងដោយក្រសួងកីឡាអារ៉ាប៊ីសាអូឌីត។ ការប្រកាសលក់ដ៏ភ្ញាក់ផ្អើលនេះ គឺជាការផ្លាស់ប្តូរដ៏សំខាន់មួយក្នុងវិធីសាស្ត្ររបស់ប្រទេសអារ៉ាប៊ីសាអូឌីត ចំពោះការគ្រប់គ្រងវិស័យកីឡាបាល់ទាត់របស់ខ្លួន។ ផែនការលក់របស់ PIF ក៏រួមបញ្ចូលទាំងការលក់ភាគហ៊ុន ២៥% ដែលកាន់កាប់ដោយក្រសួងកីឡានាពេលបច្ចុប្បន្នផងដែរ។
ចាប់តាំងត្រូវបានកាន់កាប់ដោយ PIF ដែលជាមូលនិធិវិនិយោគសាធារណៈដ៏ធំបំផុតមួយលើពិភពលោក ជាមួយទ្រព្យសកម្មត្រូវបានប៉ាន់ស្មានសរុបចំនួនរហូដល់ ៩៤១ពាន់លានដុល្លារនោះ បណ្តាក្លិបនៅលីគកំពូលអារ៉ាប៊ីសាអូឌីត Saudi Pro League បានចាប់ផ្តើមសម្រុកនាំចូលកីឡាករឆ្នើមល្បីលំដាប់ពិភពលោកដែលមិនធ្លាប់មានពីមុនមក រួមទាំង Cristiano Ronaldo, Neymar និង Karim Benzema ជាដើម ដោយកីឡាករទាំងនោះ សុទ្ធតែមានតម្លៃផ្ទេរ និងថ្លៃពលកម្មខ្ពស់។
គិតតែនៅក្នុងឆ្នាំ២០២៣ បណ្តាក្លិបនៅ Saudi Pro League បានចាយប្រាក់ជិត១ពាន់លានដុល្លារចាក់ចូលក្នុងទីផ្សារដោះដូរកីឡាកររដូវក្តៅ ដោយបង្ហាញពីមហិច្ឆតាក្នុងការលើកកម្ពស់លីគបាល់ទាត់ជាតិរបស់ពួកគេ ដែលស្ថិតក្នុងផ្នែកមួយនៃយុទ្ធសាស្ត្រ Vision 2030 ស្របតាមចក្ខុវិស័យរបស់ព្រះអង្គម្ចាស់ Mohammed bin Salman។
ការលក់ភាគហ៊ុនក្លិបធំៗទាំង ៤ ខាងលើ គឺជាផ្នែកមួយនៃការធ្វើឯកជនភាវូបនីយកម្មបាល់ទាត់ដ៏ទូលំទូលាយរបស់អារ៉ាប៊ីសាអូឌីត ដែលត្រូវបានបង្ហាញជាសាធារណៈកាលពីឆ្នាំមុន ហើយក៏មិនមែនជារឿងដំបូងនោះទេ ដែលក្លិបនៅអារ៉ាប៊ីសាអូឌីតត្រូវបានផ្ទេរកម្មសិទ្ធិទៅឱ្យអ្នកវិនិយោគទាំងក្នុងស្រុក និងបរទេស។
ក្រសួងកីឡាអារ៉ាប៊ីសាអូឌីត បានបញ្ជាក់កាលពីខែមុនហើយថា ក្លិបចំនួន ៣ បានបញ្ចប់ការផ្ទេរកម្មសិទ្ធិរបស់ពួកគេជាផ្លូវការ។ តួយ៉ាង Al Kholood បានក្លាយជាក្លិបក្នុងស្រុកដំបូងគេដែលត្រូវបានលក់ភាគហ៊ុនគ្រប់គ្រងទៅឱ្យអ្នកវិនិយោគបរទេស Harburg Group ដែលជាក្រុមហ៊ុនមានមូលដ្ឋាននៅសហរដ្ឋអាមេរិក។ បន្តបន្ទាប់ក្លិប Al Zulfi និង Al Ansar ត្រូវបានលក់ទៅឱ្យអ្នកវិនិយោគក្នុងស្រុក ហើយថ្មីៗនេះ ក្រសួងបានប្រកាសថា ខ្លួនកំពុងស្វែងរកការវិនិយោគសម្រាប់ក្លិបនៅ Saudi Pro League ចំនួន ២ ផ្សេងទៀតគឺ Al Najma និង Al Okhdood ផងដែរ៕ ប្រភព ៖ VnExpress
ចែករំលែកព័តមាននេះ