រដ្ឋមន្ត្រីដឹកជញ្ជូនម៉ាឡេស៊ី លោកហុីសាមមូដឌីន ហ៊ូសេន កាលពីថ្ងៃទី១៣ មីនា បានបដិសេធព័ត៌មាននានាដែលថា យន្តហោះបាត់ដានបន្តការហោះហើររយៈពេល៤ម៉ោងទៀតក្រោយបាត់ការទាក់ទង ដោយលោកចាត់ទុកព័ត៌មានទាំងនេះថា មិនត្រឹមត្រូវ ។
រដ្ឋមន្ត្រីរូបនេះក៏គូសបញ្ជាក់ផងដែរថា ពុំបានរកឃើញអ្វីនៅកន្លែងដែលបណ្តាផ្កាយរណបចិនចាប់ឃើញរបស់អណ្តែត៣ ក្នុងក្របខណ្ឌនៃប្រតិបត្តិការតាមរុករកយន្តហោះជើងហោះហើរ MH 370 របស់ក្រុមហ៊ុន MALAYSIA AIRLINES ឡើយ ។
យន្តហោះស៊ើបការណ៍ម៉ាឡេស៊ីមួយគ្រឿង កាលពីព្រឹកថ្ងៃទី១៣ មីនា បានធ្វើប្រតិបត្តិការតាមរករបស់ដែលរូបភាពផ្កាយរណបចិនសង្ស័យថា ចេញមកពីយន្តហោះបាត់ដាន ។ ចំណែកសេតវិមានវិញគូសបញ្ជាក់នាថ្ងៃទី១៣ មីនា ថា ការរុករកយន្តហោះបាត់ដានពេលនេះនឹងអាចពង្រីកដល់មហាសមុទ្រឥណ្ឌា ដោយផ្អែកលើព័ត៌មានថ្មីៗ ក៏បុ៉ន្តែនៅតែមិនច្បាស់លាស់ពីរឿងយន្តហោះនេះ ។
សហរដ្ឋអាមេរិក និងសហគមន៍អន្តរជាតិតាមដានគ្រប់ផ្នែកដើម្បីតាមរកយន្តហោះនេះ ដែលបាត់ដានដោយអាថ៌កំបាំងបំផុត ។ អ្នកនាំពាក្យរបស់សេតវិមានលោក JAY CARNEY គូសបញ្ជាក់ក្នុងសន្និសីទសារព័ត៌មានមួយថា យោងតាមព័ត៌មាននានា តំបន់តាមរកគួរពង្រីកដល់មហាសមុទ្រឥណ្ឌា ។ ទោះបីយ៉ាងណា យើងពុំមានព័ត៌មានលម្អិតណាមួយឡើយ ។
បណ្តាតំណាងខាងសន្តិសុខអាកាសរបស់អាមេរិកបានមកកាន់ទីក្រុងគូឡាឡាំពួរ ដើម្បីធ្វើការរួមគ្នាយ៉ាងជិតស្និទ្ធជាមួយរដ្ឋាភិបាលម៉ាឡេស៊ីលើការសើុបអង្កេត ។ អ្នកនាំពាក្យសេតវិមាននិយាយថា មានសេណារីយូ៉មួយចំនួនចំពោះការស៊ើបអង្កេតលើការបាត់ដានយន្តហោះនេះហើយ សម្រាប់ពេលនេះយើងនៅមិនទាន់អាចធ្វើការសន្និដ្ឋានលើអ្វីដែលកើតមាននៅឡើយ ៕
ចែករំលែកព័តមាននេះ