សហរដ្ឋអាមេរិក ៖ លោក António Guterres អគ្គលេខាធិការអង្គការសហប្រជាជាតិ (UN) បានបង្ហាញការព្រួយបារម្ភចំពោះរបាយការណ៍នៃការប៉ះទង្គិចគ្នាដោយអាវុធឡើងវិញរវាងប្រទេសកម្ពុជា និងថៃ ពិសេសរបាយការណ៍នៃការវាយប្រហារតាមអាកាស…
សហរដ្ឋអាមេរិក ៖ លោក António Guterres អគ្គលេខាធិការអង្គការសហប្រជាជាតិ (UN) បានបង្ហាញការព្រួយបារម្ភចំពោះរបាយការណ៍នៃការប៉ះទង្គិចគ្នាដោយអាវុធឡើងវិញរវាងប្រទេសកម្ពុជា និងថៃ ពិសេសរបាយការណ៍នៃការវាយប្រហារតាមអាកាស និងការចល័តអាវុធធុនធ្ងន់នៅតំបន់ព្រំដែន។ លោកជំរុញឱ្យភាគីទាំងពីរអនុវត្តការអត់ធ្មត់ និងបញ្ជៀសការបង្កើនជម្លោះ។
នៅក្នុងសេចក្តីថ្លែងការណ៍ កាលពីថ្ងៃទី៨ ខែធ្នូ ឆ្នាំ២០២៥ លោក Stéphane Dujarric អ្នកនាំពាក្យ UN បានលើកឡើងថា «ជម្លោះព្រំដែនរវាងកម្ពុជា និងថៃ បានបណ្តាលឱ្យមានអ្នកស្លាប់ និងរបួសយ៉ាងច្រើន ខូចខាតដល់ហេដ្ឋារចនាសម្ព័ន្ធស៊ីវិល និងការផ្លាស់ទីលំនៅទាំងសងខាងព្រំដែន។ ប្រមុខ UN បានសង្កត់ធ្ងន់ថា ភាគីទាំងពីរត្រូវតែការពារជនស៊ីវិល និងសម្របសម្រួលជំនួយមនុស្សធម៌ ហើយជំរុញឱ្យភាគីទាំងពីរអនុវត្តការអត់ធ្មត់ និងបញ្ជៀសការបង្កើនជម្លោះថែមទៀត»។
តាមសេចក្តីថ្លែងការណ៍ លោកអគ្គលេខាធិការបញ្ជាក់ជាថ្មី នូវការអំពាវនាវរបស់លោកដល់ភាគីនានាឱ្យត្រឡប់ទៅរកក្របខ័ណ្ឌនៃសេចក្តីប្រកាសរួម ដែលបានចុះហត្ថលេខានៅទីក្រុងគូឡាឡាំពួ កាលពីនៅថ្ងៃទី២៦ ខែតុលា ឆ្នាំ២០២៥ ប្តេជ្ញាចិត្តឡើងវិញចំពោះបទឈប់បាញ់ និងអនុវត្តវិធានការកាត់បន្ថយភាពតានតឹង និងកសាងទំនុកចិត្ត។
លោកអំពាវនាវឱ្យភាគីទាំងពីរប្រើប្រាស់យន្តការទាំងអស់សម្រាប់ការសន្ទនា ដើម្បីស្វែងរកដំណោះស្រាយយូរអង្វែងចំពោះជម្លោះ តាមរយៈមធ្យោបាយសន្តិភាព។ UN ក៏ត្រៀមខ្លួនជាស្រេចដើម្បីគាំទ្រដល់កិច្ចខិតខំប្រឹងប្រែងទាំងអស់ ដែលមានគោលបំណងលើកកម្ពស់សន្តិភាព ស្ថិរភាព និងការអភិវឌ្ឍនៅក្នុងតំបន់៕ ប្រភព ៖ UN, Reuters និង Xinhua
ចែករំលែកព័តមាននេះ