ទីក្រុងកៀវ៖ ប្រមុខដឹកនាំអ៊ុយក្រែន លោកហ្សេឡិនស្គី សម្លឹងមើលឃើញថាមានច្រកទ្វារមួយដែលអាមេរិកអាចបន្តធ្វើជាអ្នកសម្របសម្រួលដោះស្រាយបញ្ចប់សង្គ្រាមរហូតដល់ចុងរដូវក្ដៅឆ្នាំ២០២៧។ លោកបានរៀបចំសេចក្ដីព្រាងកម្រាស់មួយទំព័រដែលនិយាយអំពីមន្ត្រីរដ្ឋាភិបាលអាមេរិក និងអឺរ៉ុបមានវត្តមាននៅទីក្រុងម៉ូស្គូ។ លោកហ្សេឡិនស្គីថ្លែងថាបទឈប់បាញ់ និងសំណើរបស់អាមេរិកស្ដីពីការបង្កើតតំបន់សេដ្ឋកិច្ចសេរីនៅតំបន់ដុនបាស់ និងគ្រប់គ្រងដោយភាគីទីបី ជាអ្វីដែលដាក់បញ្ចូលនៅក្នុងសេចក្ដីព្រាងមួយទំព័រនោះ។ លោកថ្លែងប្រាប់អ្នកសារព័ត៌មានថាសំណើនេះបង្កប់នូវគោលគំនិតចម្បងមួយគឺការឆ្ពោះទៅរកបទឈប់បាញ់។ គោលគំនិតបន្ទាប់ដូចអ្វីដែលអាមេរិកបានស្នើសុំដូច្នោះដែរ។ នោះគឺការបង្កើតតំបន់សេដ្ឋកិច្ចសេរី។
វិមានក្រឹមឡាំងនៅថ្ងៃនេះបានដាក់ជាចំណោទសួរថាតើគំនិតរបស់អាមេរិកដែលចង់បង្កើតតំបន់សេដ្ឋកិច្ចសេរីនៅដុនបាស់នោះតើអាចទៅរួចដែរឬទេ។ ក្រឹមឡាំងអះអាងថាទីនេះធ្លាប់ជាទឹកដីរបស់រុស្ស៊ី។ ហេតុនេះ ភាគីទីបីទំនងជាមិនមានសិទ្ធិគ្រប់គ្រងតំបន់នេះទេ។ រុស្ស៊ីបានដាក់បញ្ចូលតំបន់ធំៗចំនួនបួនរបស់អ៊ុយក្រែនជាទឹកដីរបស់ខ្លួនទោះបីពេលនេះខ្លួនមិនទាន់វាយយកបានតំបន់ទាំងនោះមកគ្រប់គ្រង១០០%យ៉ាងណាក្ដី។ ទីក្រុងម៉ូស្គូនៅតែនិយាយម្ដងហើយម្ដងទៀតថាប្រសិនបើចង់បានសន្តិភាពពិតប្រាកដ និងយូរអង្វែងលុះត្រាតែអ៊ុយក្រែនយល់ព្រមកាត់តំបន់បួននេះទៅឱ្យខ្លួនជាមុនសិន។ រុស្ស៊ីចាត់ទុកថានេះជាប្រភពដើមនៃបញ្ហានាំឱ្យកើតសង្គ្រាម។
ហ្សេឡិនស្គីថ្លែងថាលោកសម្លឹងឃើញឱកាស ឬច្រកទ្វារមួយដើម្បីបិទបញ្ចប់សង្គ្រាមរយៈពេល៤ឆ្នាំកន្លះនេះ។ ឱកាសនោះលាតសន្ធឹងចាប់ពីកិច្ចប្រជុំជីម្ភៃនៅអាមេរិកនាខែធ្នូខាងមុខនេះរហូតដល់រដូវក្ដៅ ឆ្នាំ២០២៧។ នេះជាដំណាក់កាលសំខាន់មុននឹងឈានដល់ការឃោសនាបោះឆ្នោតប្រធានាធិបតីឆ្នាំ២០២៨។ លោកធ្លាប់ប្រកាសកាលពីដើមខែសីហាថាអ៊ុយក្រែនបានប្រគល់សំណើនៃផែនការសន្តិភាពទៅឱ្យអាមេរិកពិនិត្យមើលដើម្បីបញ្ចប់សង្គ្រាម។ ប៉ុន្តែលោកមិនបានបរិយាយលម្អិតអំពីផែនការនោះទេ។ កិច្ចខិតខំប្រឹងប្រែងរបស់អាមេរិកដើម្បីបិទបញ្ចប់សង្គ្រាមនេះត្រូវជាប់គាំងនៅឆ្នាំនេះព្រោះអ៊ុយក្រែនមិនព្រមកាត់ទឹកដីរបស់ខ្លួនទៅឱ្យរុស្ស៊ីជាថ្នូរនឹងសន្តិភាពទេ។ ម៉្យាងទៀត ការចរចាគ្នាជាប់គាំងដោយសារអាមេរិកកំពុងជាប់ដៃនៅក្នុងសង្គ្រាមអ៊ីរ៉ង់។
លោកហ្សេឡិនស្គីបញ្ជាក់ថាភាគីទីបីដូចដែលមានសរសេររៀបរាប់នៅក្នុងសេចក្ដីព្រាងនោះគឺនិយាយអំពីការដើរតួនាទីរបស់សហភាពអឺរ៉ុប និងអង្គការណាតូ។ លោកបញ្ជាក់ថាគោលគំនិតចម្បងៗទាំងបីនេះមិនមែនជាគំនិតរបស់អ៊ុយក្រែនសុទ្ធសាធនោះឡើយ។ គំនិតទាំងនេះរៀបចំរួមគ្នារវាងអ៊ុយក្រែន អាមេរិក និងអឺរ៉ុប។ គំនិតខ្លះដកស្រង់ចេញពីស្មារតីនៃការពិភាក្សាគ្នារវាងអាមេរិកជាមួយអ៊ុយក្រែន និងរុស្ស៊ី។ អ្នកការទូតជាន់ខ្ពស់រុស្ស៊ីម្នាក់បង្ហើបឱ្យដឹងថារដ្ឋាភិបាលរបស់ខ្លួនបើកចំហជានិច្ចក្នុងការស្ដាប់សំណើថ្មីៗស្ដីពីការដោះស្រាយបញ្ចប់សង្គ្រាម។ ប៉ុន្តែសំណើទាំងនោះត្រូវតែមានចរិតប្រាកដនិយមនៅក្នុងស្ថានភាពជាក់ស្ដែង។ គោលដៅធំរបស់រុស្ស៊ីគឺវាយកាន់កាប់ទឹកដីដែលនៅសេសសល់នៃតំបន់ដុនបាស់៕ ប្រភព៖ Reuters
ចែករំលែកព័តមាននេះ