រាជធានីភ្នំពេញ ៖ ដើម្បីជួយជំរុញសក្ដានុពលសេដ្ឋកិច្ចក្នុងខេត្តស្ថិតនៅភូមិភាគឦសានឱ្យមានសម្ទុះខ្លាំងក្លា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសថា នឹងបង្កើតកំពង់ផែពហុបំណងនៅក្នុងខេត្តក្រចេះ ដែលអាចនឹងធ្វើឱ្យវិស័យពាណិជ្ជកម្មសេដ្ឋកិច្ច ក្នុងខេត្តភូមិភាគឦសានមានភាពប្រទាក់ក្រឡាគ្នា ។
ថ្លែងក្នុងឱកាសអញ្ជើញជាអធិបតី ក្នុងពិធីសម្ពោធបើកឱ្យប្រើប្រាស់ជាផ្លូវការកំណាត់ផ្លូវជាតិលេខ៧៣ ផ្លូវខេត្តលេខ៣៧៧ និងផ្លូវខេត្តលេខ៣៧៧A ក្រោមឥណទានសម្បទានពីធនាគារពិភពលោក នាព្រឹកថ្ងៃទី២៥ ខែសីហា ឆ្នាំ២០២៦ នៅខេត្តក្រចេះ សម្ដេចធិបតីនាយករដ្ឋមន្ត្រី បានឱ្យដឹងថា ខេត្តនៅភូមិភាគឦសាន ថ្វីត្បិតតែសក្ដានុពលខុសគ្នា តែការកសាងកំពង់ផែពហុបំណងនៅខេត្តក្រចេះ នឹងធ្វើឱ្យខេត្តទាំងនេះពង្រឹងសក្ដានុពលតភ្ជាប់គ្នា និងអាចវិនិយោគរួមគ្នា ។
សម្ដេចធិបតី នាយករដ្ឋមន្ត្រី បានបញ្ជាក់យ៉ងដូច្នេះថា ៖ «បន្តិចទៀតយើងធ្វើកំពង់ផែពហុបំណងនៅក្រចេះ ព្រោះក្រចេះនៅក្នុងខេត្តទាំងបួនហ្នឹង គឺយើងគិតមើលគឺខេត្តមានសក្ដានុពលច្រើន ចឹងមិនមែនខាងស្ទឹងត្រែង រតនគិរី មណ្ឌលគិរី កុំច្រណែនគេ យើងក៏មានសក្ដានុពលបស់យើងដែរ យើងសក្ដានុពលតំបន់ភ្នំ តំបន់មានធនធានធម្មជាតិមួយចំនួន ចឹងក្រចេះមានតំបន់រាបច្រើន មានផ្ទៃដីអាចធ្វើឧស្សាហកម្ម តែប្រទាក់ក្រឡាគ្នា កន្លែងខ្លះអាចផ្គុំគ្នារឿងទេសចរណ៍អីផ្សេងៗ ចឹងសុទ្ធតែសក្ដា នុពលអាចធ្វើបាន ហើយនៅកន្លែងនេះជាតំបន់តភ្ជាប់ច្រើន» ។
សូមជម្រាបថា កាលពីថ្ងៃទី១០ ខែសីហា ឆ្នាំ២០២៦ ក្រុមការងារជំរុញការវិនិយោគក្នុងភូមិភាគឦសាន «ក.វ.ឦសាន» ដឹកនាំដោយឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចមហាបវរធិបតីនាយករដ្ឋមន្ត្រី និងជាប្រធានក្រុមការងារជំរុញការវិនិយោគក្នុងភូមិភាគឦសាន បានរៀបចំកិច្ចជំនួបពិភាក្សាជាមួយធុរជនដើម្បីជំរុញការអនុវត្ត «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាននៃព្រះរាជាណាចក្រកម្ពុជា ឆ្នាំ២០២៥-២០២៨» និងផ្សព្វផ្សាយអំពីវិសាលភាពនៃកម្មវិធីពិសេស។
អង្គប្រជុំបានស្តាប់នូវបទបង្ហាញ អំពីទិដ្ឋភាពបច្ចេកទេសទាក់ទងនឹងអត្ថប្រយោជន៍នៃការលើកទឹកចិត្ត និងការសម្រួលនីតិវិធី ដែលកម្មវិធីពិសេសអាចផ្តល់ជូន តួយ៉ាងដូចជាការផ្តល់ការគាំទ្រពិសេសដល់សហគ្រាសធុនតូច និងមធ្យម ដោយបានបន្ធូរបន្ថយលក្ខខណ្ឌនៃទំហំទុនវិនិយោគអប្បបរមា ចាប់ពី ១០ម៉ឺនដុល្លារអាម៉េរិកឡើងទៅ គឺអាចស្នើសុំគោលការណ៍វិនិយោគពី ក.វ.ឦសាន ដើម្បីចុះបញ្ជីជា គ.ល.គ. បាន។
លើសពីនេះ សម្រាប់សកម្មភាពធុរកិច្ចដែលកំពុងដំណើរការក្នុងខេត្តទាំងបួន តែមិនទាន់បានចុះបញ្ជីពន្ធដារ ក៏អាចចុះបញ្ជីពន្ធដារដោយស្ម័គ្រចិត្ត រហូត ដល់ដំណាច់ឆ្នាំ២០២៦ ហើយទទួលបានការលើកលែងនូវពិន័យទោសទណ្ឌ បំណុលពន្ធ និងការផាកពិន័យជាប្រាក់ចំពោះការមិនបានបំពេញអនុលោមភាពកន្លងមកផងដែរ៕
ចែករំលែកព័តមាននេះ