រាជធានីភ្នំពេញ ៖ ក្រសួងទេសចរណ៍ បានអះអាងថា អ្នកផលិតភាពយន្តចិន បានសម្រេចជ្រើសរើសកម្ពុជា ជាទីតាំងថត និងផលិតវីដេអូ AI ផ្សព្វផ្សាយពីសម្រស់ពិតរបស់កម្ពុជា ចែករំលែកទៅកាន់ពិភពលោក ។
ការអះអាងនេះ គឺធ្វើឡើងក្រោយពេលដែលលោក ហួត ហាក់ រដ្ឋមន្ត្រីក្រសួងទេសចរណ៍ បានជួបគណប្រតិភូមួយក្រុម ដោយប្រធានបទផ្តោតលើការផលិតភាពយន្តភាគខ្លី ផ្សព្វផ្សាយទេសចរណ៍ឌីជីថល និងការប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីនាំយកសក្តានុពលទេសចរណ៍ និង «សម្រស់ពិតរបស់កម្ពុជា» ទៅកាន់ទីផ្សារអន្តរជាតិ ។
តាមការគ្រោងទុនវីដេអូ AI នេះ នឹងផលិតដោយក្រុមហ៊ុន VINCIS ដោយបង្ហាញពីតំបន់អង្គរ នៅក្រោមនិទានកថា ដែលគេបញ្ជូលបច្ចេកវិទ្យាទំនើបជាមួយវប្បធម៌ ប្រវត្តិសាស្ត្រ ធម្មជាតិ ម្ហូបអាហារ និងជីវភាពរស់នៅរបស់ប្រជាជនកម្ពុជា ដើម្បីនាំយក «សម្រស់ពិតរបស់កម្ពុជា» ទៅឱ្យពិភពលោកបានឃើញ និងស្គាល់កាន់តែច្បាស់ ៕
ចែករំលែកព័តមាននេះ