ប្រទេសវៀតណាម៖​ ​ ទឹកទន្លេ កៅ, តិច និង ប៊ុយ បានកើនឡើងខ្លាំង បណ្តាលឱ្យតំបន់មួយចំនួននៅជាយក្រុងហាណូយរងការជន់លិច និងផ្តាច់ការធ្វើដំណើរ។ ​ប្រជាពលរដ្ឋជិត ​១,៥០០នាក់​ ត្រូវបានជាប់គាំង ខណៈទឹកក៏បានជន់លិចដីស្រែ និងដំណាំប្រមាណ ៥០ហិកតា។ នេះបើយោងតាមការចុះផ្សាយរបស់សារព័ត៌មាន VNA នៅថ្ងៃទី២៥ ខែសីហានេះ។

​អាជ្ញាធរបានប្រើកម្លាំងមនុស្សជាង​១៥០នាក់​ ព្រមទាំងត្រៀមបាវខ្សាច់ ១០,០០០បាវ និងសម្ភារៈជាង ៥០០ម៉ែត្រគុបដើម្បីពង្រឹងទំនប់នៅតំបន់រងគ្រោះ។

អាជ្ញាធរហាណូយបានដាក់កម្លាំងតាមដានស្ថានភាពទឹក ២៤ម៉ោង​ និងត្រៀមជម្លៀសប្រជាពលរដ្ឋ​ ប្រសិនបើស្ថានការណ៍កាន់តែធ្ងន់ ខណៈមជ្ឈមណ្ឌលឧតុនិយមព្យាករថា កម្ពស់ទឹកទន្លេតិច អាចបន្តកើនក្នុងរយៈពេល ១២–២៤ម៉ោង ខាងមុខ។ ទឹកជំនន់អាចប៉ះពាល់ដល់ការរស់នៅ កសិកម្ម ការធ្វើដំណើរ និងអាចបង្កហានិភ័យបាក់ដីនៅតំបន់ងាយរងគ្រោះ៕