ចំណេះដឹង៖ យោងតាមការចុះផ្សាយពីប្រភពបរទេស ឪពុកម្តាយស្រឡាញ់កូន និងចង់ផ្តល់អ្វីល្អៗឱ្យកូន ប៉ុន្តែការតាមចិត្តគ្រប់រឿងដោយគ្មានព្រំដែន អាចបង្កើតទម្លាប់មិនល្អនៅពេលកូនធំឡើង។

ទី១ ងាយខឹង និងធ្វើអ្វីតាមអារម្មណ៍ កូនអាចយំ ស្រែក ឬប្រឆាំងនៅពេលមិនបានតាមចិត្ត។ ឪពុកម្តាយគួររក្សាភាពស្ងប់ស្ងាត់ មិនប្រញាប់ព្រមតាម ហើយពន្យល់កូនក្រោយពេលស្ងប់។

ទី២ មិនចេះធ្វើអ្វីដោយខ្លួនឯង កូនតែងរង់ចាំឪពុកម្តាយធ្វើជំនួស ដូចជា រៀបរបស់ ស្លៀកពាក់ ឬរៀបកាបូប។ គួរបណ្តុះឱ្យកូនធ្វើកិច្ចការសមនឹងវ័យដោយខ្លួនឯង ទោះធ្វើយឺតក៏ដោយ។

ទី៣ តែងទាមទាររបស់ដែលខ្លួនចង់បាន កូនអាចគិតថា ឪពុកម្តាយត្រូវតែទិញអ្វីដែលខ្លួនចង់បាន ហើយខឹងនៅពេលមិនបាន។ គួរបង្រៀនកូនឱ្យចេះបែងចែករវាងអ្វីដែលចាំបាច់ និងអ្វីដែលគ្រាន់តែចង់បាន ព្រមទាំងចេះអរគុណចំពោះអ្វីដែលទទួលបាន។

សរុបមក ស្រឡាញ់កូន មិនមែនមានន័យថាត្រូវតាមចិត្តគ្រប់រឿងទេ។ ក្តីស្រឡាញ់ដែលភ្ជាប់ជាមួយព្រំដែន និងការណែនាំត្រឹមត្រូវ អាចជួយឱ្យកូនមានទំនួលខុសត្រូវ និងចេះគោរពអ្នកដទៃ៕