កីឡាករជើង​ខ្លាំង​របស់​កូឡុំ​ប៊ី ​​​Carlos Alberto Betancur Gomez ​​​​​​​​​​បាន​សម្តែង​នូវ​ក្តី​រីក​រាយ​យ៉ាង​​​ខ្លាំង​ បន្ទាប់​ពី​បាន​យក​ឈ្នះ​ដំណាក់​ទី​៥ ​​ប្រណាំង​កង់​​កម្ម​វិធី​ Paris-Nice​​​​ កាល​ពី​ថ្ងៃ​ព្រហស្បតិ៍​ ទី១៣​​​​​​​​​ ខែមី​នា​​​​កន្លង​មក​នេះ ​។ ការ​ប្រណាំង​ក្នុង​ដំណាក់​ខាង​លើ​ត្រូវ​បាន​បញ្ចប់​នៅ​​​ទីប្រជុំ​ជន​ Rive-de-Gier ប្រទេស​​បា​រាំង ​។

Gomez​​​​​​​​​​​ ដែល​ជា​អ្នក​ជិះ​កង់​ឱ្យ​​ក្រុម​ AG2R La Mondiale ​​​​បាន​យក​ឈ្នះ​ដំណាក់​មាន​ចម្ងាយ​​ផ្លូវ១៥២,៥​​​​​​​​​​​​​គីឡូ​ម៉ែត្រ​ចេញ​ដំណើរ​ពី​​​ទី​ប្រជុំ​ជន ​Crèche-sur-Saône ឆ្ពោះ​ទៅ​កាន់​ទី​ក្រុង​ Rive-de-Gier ប្រទេស​​បា​រាំង ​​ដោយ​ប្រើ​អស់​ថិរវេ​លា​​៣​ម៉ោង​៣៨នាទី​​​​និង​១៥​វិនា​ទី​យក​ឈ្នះ​កីឡាករលុចហ្សំ​បួ Bob Jungels ​​​​ជិះឱ្យ​​ក្រុម Trek Factory Racing ​​​និង​​​​​បានយក​ឈ្នះ​កីឡាករដា​ណឺ​ម៉ាក Jakob Fuglsang ជិះ​ឱ្យ​ក្រុម​ Astana Pro Team​​​​​​​ ដែល​ទាំង​ពីរ​នាក់​បាន​ប្រើ​ថិរវេលា​ច្រើន​ជាង​ស្មើៗ​គ្នា ​។​

ថ្លែងបន្ទាប់​ពី​ទទួល​បាន​ជ័យជម្នះ ​​Gomez​​​​​​​​​​​បាន​បញ្ជាក់​ថា​ ៖ «នេះ​ជា​ថ្ងៃ​មួយ​ដ៏​អស្ចារ្យ​បំ​ផុត​នៅ​ក្នុង​អា​ជីព​របស់​ខ្ញុំ​ ។ ការ​ឈ្នះ​ក្នុង​ដំ​ណាក់​ណា​មួយ​នៃ​កម្ម​វិធី Paris-Nice គឺ​ពិត​ជា​រឿង​ដ៏​ល្អ​ខ្លាំង​ណាស់​ ។ ខ្ញុំ​មាន​សុខ​ភាព​មិន​សូវ​ជា​ល្អ​ប៉ុន្មាន​ទេ​ ពេល​ចាប់​ផ្តើម​រដូវ​កាល​ប្រ​ណាំង ។ តែ២-៣​ថ្ងៃ​ចុង​ក្រោយ​នេះ​ សុខ​ភាព​របស់​ខ្ញុំ​បាន​វិល​មក​រក​ភាព​ធូរ​ស្បើយ​ច្រើន​ ។ ការ​ជិះ​ឡើង​ភ្នំ​របស់​ខ្ញុំ​បាន​ល្អ​ប្រ​សើរ​ជាង​ពេល​មុន​ ។ ខ្ញុំ​មាន​ពេល​ច្រើន​ក្នុង​ការ​ហ្វឹក​ហាត់​ជិះ​ឡើង​ភ្នំ​​»។

ពេល​នេះ​កីឡាករ​ Gomez កំពុង​តែ​សម្លឹ​ង​មើល​អាវ​កាក់​ពណ៌​លឿង​ជា​បណ្តើ​រៗ​ហើយ​ ។ គេ​បាន​បន្ត​ថា ​៖«បាទ​ ពិត​ណាស់​ ខ្ញុំ​ប្រហែល​ជា​អាច​ធ្វើ​បាន ​។ តែ​បើ​មិន​បាន​ក៏​គ្មាន​ការ​សោក​ស្តាយ​អ្វី​ដែរ ​។ ជ័យ​ជម្នះ​ក្នុង​ដំណាក់​នៅ​ពេល​នេះ​បាន​ធ្វើ​ឱ្យ​ខ្ញុំ​សប្បាយ​ចិត្ត​​ខ្លាំងណាស់​ទៅ​ហើយ​»។

ទោះ​យ៉ាង​ណា​ ជ័យ​ជម្នះ​លើក​​​នេះ​សម្រាប់​​​កីឡាករ Gomez ​​​​​​​​​​​ពិត​ជា​មិន​អាច​ជួយ​ឱ្យ​គេ​​នាំ​មុខ​នៅ​លើ​តារាង​ពេល​វេលា​សរុប​បាន​នៅ​ឡើយ​ទេ​​ ដ្បិត​កីឡាករ​អង់​​គ្លេស​ Geraint Thomas ដែល​បាន​បញ្ចប់​ដំណាក់​នេះ​ក្នុង​លំ​ដាប់​ទី​១៦​នោះ នៅ​តែ​សន្សំ​ពេល​វេលា​បាន​យ៉ាង​ល្អ​បំ​ផុត​​បន្ត​​គ្រង​អាវ​កាក់​ពណ៌​លឿង​ក្នុង​នាម​ជា​អ្នក​នាំ​មុខ​គេ​ក្នុង​ការ​ប្រណាំង​​​​​​ដដែល​ ។

បញ្ចប់​ការ​ប្រណាំង៥ដំណាក់មក​​​នេះ​​​ Thomas​ ដែល​ជិះ​ឱ្យ​ក្រុម​ Team Sky​ បាន​ប្រើ​អស់​​ថិរវេលា​តិច​ជាង​គេ​បំផុត​គឺ​ ២១ម៉ោង​៥២នា​ទី​និង៤២​​​​​​​វិនាទី​នាំ​មុខ​កីឡាករអា​ល្លឺ​ម៉ង់ John Degenkolb ដែល​ប្រើ​អស់​ថិរវេលា​ច្រើន​ជាង៣​វិនា​ទី​។ ចំណែក​​​​កីឡា​ករ​ហូ​ឡង់ Tom Jelte Slagter ​​​ដែល​ប្រើ​ថិរ​វេ​លា​ច្រើន​ជាង៤វិនាទី​ស្ថិត​នៅ​លំ​ដាប់​ទី​៣​ ។

សូម​បញ្ជាក់​ថា​ ការ​ប្រណាំងកម្ម​វិធី​ Paris-Nice ​​ឆ្នាំ​នេះ​ចែក​ចេញ​ជា​៨​​​ដំណាក់​ និង​មាន​ចម្ងាយ​ផ្លូវ​សរុប១.៤៤៦,៥​គីឡូ​ម៉ែត្រ​ ។ ដោយ​ឡែក​ដំ​ណាក​​់​ទី​៦ ដែល​ជា​ដំ​ណាក់បន្ត​​ មាន​ចម្ងាយ​​ផ្លូវ២២១,៥​​​​​​​​​​គីឡូ​ម៉ែត្រ​​ចេញ​ដំណើរ​ពី​​​ទីប្រជុំ​ជន​ Saint-Saturnin-lès-Avignon ឆ្ពោះ​ទៅ​កាន់​ទីប្រ​ជុំ​ជន​ Fayence ប្រទេស​​បា​រាំង​​​ ៕