ប្រទេសបាហាម៉ា ៖ ព្យុះសង្ឃរា DORIAN ពេលនេះបានថមថយកម្លាំងមកជាព្យុះប្រភេទទី២ ហើយបោកបក់ដោយយឺតៗឆ្ពោះទៅកាន់រដ្ឋផ្លរីដា សហរដ្ឋអាមេរិក នាថ្ងៃទី៣កញ្ញា ក្រោយពីបង្កការស្លាប់ និងការបំផ្លិចបំផ្លាញដ៏សែនទារុណបំផុត…
ប្រទេសបាហាម៉ា ៖ ព្យុះសង្ឃរា DORIAN ពេលនេះបានថមថយកម្លាំងមកជាព្យុះប្រភេទទី២ ហើយបោកបក់ដោយយឺតៗឆ្ពោះទៅកាន់រដ្ឋផ្លរីដា សហរដ្ឋអាមេរិក នាថ្ងៃទី៣កញ្ញា ក្រោយពីបង្កការស្លាប់ និងការបំផ្លិចបំផ្លាញដ៏សែនទារុណបំផុត នៅប្រទេសដែនកោះបាហាម៉ាដែលនៅទីនោះបណ្ដារូបភាព បង្ហាញពីទំហំធំធេងបំផុតនៃការបំផ្លាញ។
កោះABACOSនិងGRAND BAHAMA ដែលព្យុះDORIANវាយប្រហារខ្លាំងក្លាបំផុត មុនបន្ត្បោកបក់ទៅមុខទៀត ស្ថិតនៅដាច់ពីពិភពខាងក្រៅមកដល់ថ្ងៃទី៣កញ្ញា។ រូបភាពបង្ហាញដើមត្នោតទាំងឡើយដាច់ស្លឹកអស់ ផ្ទះសម្បែងនានាត្រូវបាក់បែកធ្លុះធ្លាយ ហើយរថយន្តក្រឡាប់រសាត់តាមទឹក។ ការបំផ្លាញមើលទៅដាច់់កន្ទុយភ្នែក។ បាហាម៉ាពិតជារងការបំផ្លាញសែនទារុណបំផុត។
ដោយលើកពីសោកនាដកម្មជាប្រវត្តិសាស្ត្រ នាយករដ្ឋមន្ត្រីបាហាម៉ា លោកHUBERT MINNISអះអាងពីមនុស្សស្លាប់យ៉ាងតិច៧នាក់លើកោះABACOS។ គេភ័យខ្លាចថាចំនួនអ្នកស្លាប់មានច្រើនជាងនេះទៀត។
អ.ស.បវាយតម្លៃកាលពីថ្ងៃទី៣កញ្ញាថា មនុស្សយ៉ាងតិច៦១.០០០នាក់ត្រូវការជំនួយស្បៀងនៅបាហាម៉ា។ ចំណែកកាកបាទក្រហមវាយតម្លៃនាពេលមុននេះថា ផ្ទះប្រមាណជា១៣.០០០ខ្នងអាចរងការខូចខាតឬបំផ្លាញលើកោះABACOSនិងGRAND BAHAMA។
ចាត់ទុកជាព្យុះសង្ឃរាខ្លាំងជាងគេបំផុតកម្រិតទី៥ ពេលវាយប្រហារលើប្រជុំកោះបាហាម៉ាព្យុះDORIANបន្ទាប់មកបានចុះថមថយកម្លាំងមកជាព្យុះកម្រិតទី២ ជាមួយល្បឿងខ្យល់ជាង១៧៥គីឡូម៉ែត្រក្នុង១ម៉ោង នាវេលាម៉ោង២១ម៉ោងសកល។ ព្យុះនោះស្ថិតនៅចម្ងាយជាង១៧០គីឡូម៉ែត្រខាងកើតក្រុងVERO BEAVH រដ្ឋផ្លរីដា។ ទោះបីជាខ្យល់បោកបក់មិនសូវខ្លាំងតែព្យុះនេះនៅតែមានគ្រោះថ្នាក់ខ្លាំង។ នេះបើតាមការព្យាករណ៍ឧតុនិយម ដែលមិនទាន់អាចកំណត់ទិសដៅរបស់វាឲ្យប្រាកដ។
អភិបាលរដ្ឋផ្លរីដាបានហៅព្យុះនេះថា ជាព្យុះស្មុគស្មាញមួយ។ វារំកិលខ្លួនមកក្បែររដ្ឋផ្លរីដានាយប់ថ្ងៃទី៤កញ្ញា មុនពេលបោកបក់តាមបណ្ដោយឆ្នេរសមុទ្រភាគអាគ្នេយ៍សហរដ្ឋអាមេរិកនិងរដ្ឋចចជៀ ការ៉ូលីនខាងត្បូងនិងការ៉ូលីនខាងជើង។ រដ្ឋការ៉ូលីនទាំង២អាចមានគ្រោះថ្នាក់នៃទឹកជន់លិចជាមួយភ្លៀងធ្លាក់ខ្លាំងនិងរលកសមុទ្រធំៗ។ មនុស្សជាច្រើនពាន់នាក់ទទួលបញ្ជាឲ្យជម្លៀសចេញ ពីបណ្ដាតំបន់រងការគំរាមកំហែង៕ (កែសម្រួលដោយ ៖ បុប្ផា) (ប្រភពវីដេអូ ៖ FRANCE 24)
ចែករំលែកព័តមាននេះ