ទីក្រុងវ៉ាស៊ីនតោន៖ ប្រធានសហព័ន្ធកីឡាបាល់ទាត់អន្តរជាតិ (FIFA) លោក Gianni Infantino បានបង្ហើបឱ្យដឹងកាលពីថ្ងៃអង្គារថា លោកប្រធានាធិបតី ដូណាល់ ត្រាំ បានបញ្ជាក់ជំហរស្វាគមន៍ចំពោះវត្តមានរបស់ក្រុមបាល់ទាត់ជម្រើសជាតិអ៊ីរ៉ង់ ក្នុងការមកប្រកួតពានរង្វាន់បាល់ទាត់ពិភពលោក (World Cup 2026) ដែលនឹងរៀបចំឡើងនៅសហរដ្ឋអាម៉េរិក កាណាដា និងម៉ិកស៊ិក នាពេលឆាប់ៗខាងមុខ។ នេះបើយោងតាមសារព័ត៌មាន Xinhua, Aljazeera និងប្រភពផ្សេងទៀត ចុះផ្សាយនៅថ្ងៃទី១១ ខែមីនានេះ។

លោកប្រធាន​ FIFA​ បានគូសបញ្ជាក់ថា បើទោះបីជាស្ថានភាពនយោបាយ និងយោធារវាងប្រទេសទាំងពីរកំពុងមានភាពតានតឹងខ្លាំងក៏ដោយ ប៉ុន្តែលោក ត្រាំ បានរំលឹកថា កីឡាគឺជាព្រឹត្តិការណ៍ដែលជួយឱ្យមនុស្សរួបរួមគ្នា ជាពិសេសក្នុងកាលៈទេសៈដ៏លំបាកនេះ។

​ការចូលរួមរបស់អ៊ីរ៉ង់ក្នុងព្រឹត្តិការណ៍ World Cup លើកនេះ បានក្លាយជាមន្ទិលសង្ស័យយ៉ាងខ្លាំង បន្ទាប់ពីការផ្ទុះជម្លោះយោធារវាងអាម៉េរិក-អ៊ីស្រាអែល និងអ៊ីរ៉ង់ បានឈានដល់កម្រិតសង្គ្រាម។ ក្រុមជម្រើសជាតិអ៊ីរ៉ង់ដែលស្ថិតក្នុងពូល G រួមជាមួយបែលហ្ស៊ិក នូវែលសេឡង់ និងអេស៊ីប គ្រោងនឹងត្រូវប្រកួតទាំង ៣ ប្រកួតក្នុងទឹកដីសហរដ្ឋអាម៉េរិក ដែលនេះជាហេតុធ្វើឱ្យសហព័ន្ធបាល់ទាត់អ៊ីរ៉ង់បង្ហាញការបារម្ភពីសុវត្ថិភាព និងការផ្ដល់ទិដ្ឋាការ។ ទោះជាយ៉ាងណា ការប្រកាសរបស់លោក ត្រាំ មុនពេលព្រឹត្តិការណ៍ចាប់ផ្ដើមក្នុងរយៈពេល ៩៣ ថ្ងៃទៀតនេះ បានផ្ដល់ក្ដីសង្ឃឹមថ្មីដល់វិស័យកីឡា ខណៈដែលពិភពលោកកំពុងតាមដានមើលថាតើ “ការទូតបាល់ទាត់” អាចជួយសម្រាលកម្ដៅសង្គ្រាមបានកម្រិតណា​៕