រាជធានីភ្នំពេញ ៖ លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានបញ្ជាក់នៅក្នុងបណ្តាញសង្គមរបស់លោកនៅថ្ងៃទី១១ ខែមីនា អំឡុងពេល…
រាជធានីភ្នំពេញ ៖ លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានបញ្ជាក់នៅក្នុងបណ្តាញសង្គមរបស់លោកនៅថ្ងៃទី១១ ខែមីនា អំឡុងពេល នាំគណៈប្រតិភូទៅបំពេញទស្សនកិច្ចផ្លូវការ នៅសិង្ហបុរីថា ប្រទេសទាំងពីរប្តេជ្ញាចិត្តឥតងាករេឡើងនៅក្នុងការលើកកំពស់ទំនាក់ទំនងទ្វេរភាគី ។
លោកឧបនាយករដ្ឋមន្ត្រី បានបន្តថា នៅក្នុងជំនួបពិភាក្សាទ្វេភាគីជាមួយលោក វីវៀន បាឡាគ្រីស្សណាន់ រដ្ឋមន្ត្រីការបរទេសសិង្ហបុរី ភាគីទាំងពីរ បានរក្សាទំនាក់ទំនងជាប្រចាំ តាមការផ្លាស់ប្តូរការសួរសុខទុក្ខ និងនឹករលឹកពីគ្នា ។
លោកបានបញ្ជាក់ថា “ភាគីទាំងពីរ បានបង្ហាញពីការប្តេជ្ញាចិត្តឥតងាករេ ក្នុងការពង្រឹង និងធ្វើឱ្យកាន់តែស៊ីជម្រៅ នូវចំណងមិត្តភាពទ្វេភាគីដ៏យូរអង្វែង ដែលរួមចំណែកដល់សន្តិភាព ស្ថិរភាព និងវិបុលភាពរួមក្នុងតំបន់” ។
ជំនួបខាងលើ ត្រូវបានបញ្ចប់ដោយការផ្លាស់ប្តូរទស្សនៈអំពីបញ្ហាតំបន់ និងអន្តរជាតិ ដែលជាកង្វល់រួម ក៏ដូចជាពិភាក្សាយ៉ាងស៊ីជម្រៅលើវឌ្ឍនភាពថ្មីៗ នៃស្ថានភាពព្រំដែនកម្ពុជា-ថៃ ផងដែរ ។
នៅក្នុងរយៈពេល២ខែដើមឆ្នាំ២០២៦នេះ អគ្គនាយករដ្ឋគយ និងរដ្ឋាករកម្ពុជា បានអះអាងថា សិង្ហបុរីនៅពេលនេះបានក្លាយជាប្រភពផ្គត់ផ្គង់ទំនិញបម្រើសេចក្តីត្រូវការរបស់កម្ពុជាលំដាប់ទី៣ បន្ទាប់ពី ចិន និងវៀតណាម ខណៈដែលកាលពីឆ្នាំមុន គឺថៃឈរនៅលំដាប់នេះ។
ស្ថិតិបានបង្ហាញថា នៅក្នុងរយៈពេលពីខែមករា ដល់ខែកុម្ភៈ កម្ពុជាបានបញ្ជាទិញទំនិញផ្សេងៗពីសិង្ហបុរីមានតម្លៃដល់ទៅ ៣២២,៥លានដុល្លារ កើនឡើងរហូតដល់ទៅ ២០៩,៣ភាគរយឯណោះ បើធៀបនឹងរយៈពេលដដែលកាលពីឆ្នាំ២០២៥ ៕
ចែករំលែកព័តមាននេះ