តម្បាញ​កន្ទេលក្រហម​ក្នុង​មួយ​រដូវ​អាច​រក​ប្រាក់​ចំណូល​បាន​យ៉ាង​ប្រសើរ


ខេត្តកំពង់ឆ្នាំង ៖ កន្លង​ទៅ​កោះសន្តិភាព​ធ្លាប់​ផ្សាយ​រួច​មក​ហើយពី​កសិករ​ក្នុងភូមិ​អណ្តូង​រនុក ឃុំ​ត្រងិល ស្រុក​កំពង់លែង ដែល​ឈ្លាតពេល​ក្រៅពី​ការងារ​ស្រែ​ចំការ​ពួក​គាត់​ឈ្លាតពេល​ត្បាញកន្ទេល​ក្រហម ដើម្បី​បង្កើន​ជីវភាព​គ្រួសារ ។ សម្រាប់​ថ្ងៃនេះ​កោះសន្តិភាព សូម​បង្ហាញ​ជូន​ប្រជាពលរដ្ឋ​ដែល​មានមុខរ​បរដូច​គ្នា​នេះ​ដែរ តែ​ពួក​គាត់​មាន​ទីលំនៅ​ភូមិ​ព្រែក​រាំង ឃុំ​ទឹក​ហូត​ស្រុក​រលាប្អៀរ​វិញ​ម្តង ។

ជួប​ជាមួយ​អ្នក​យក​ព័ត៌មាន​យើង អុំ​ស្រី​ម្នាក់​ក្នុង​វ័យ​ជាង​៧០​ឆ្នាំ កំពុង​រៀបចំ​ទុកដាក់​កក់​ដែល​ជ្រលក់​ថ្នាំ​ហើយ​នៅ​ក្រោមផ្ទះ​បាន​និយាយ​អោយ​ដឹង​ថា ៖ អ្នក​ភូមិ​ព្រែក​រាំង ឃុំ​ទឹក​ហូត មាន​ប្រមាណ​ជាង​២០០​គ្រួសារ បាន​ប្រកប​មុខរបរ​ត្បាញកន្ទេល​ក្រហម​ជា​រៀង​រាល់​ឆ្នាំ ដោយ​ក្នុង​មួយ​ឆ្នាំ​មាន​រយៈពេល​ពី​៣​ទៅ​៤​ខែ អាច​ត្បាញកន្ទេល​បាន​ពី​៨០​ទៅ​១០០​កន្ទេល ហើយ​អាច​រក​ប្រាក់​ចំណូល​បាន​ពី​៣​លាន​ទៅ​៥​លាន​រៀល​ក្នុង​មួយ​គ្រួសារ​ៗ តាម​ធ្វើក​ក់បាន​តិច ឬ​ច្រើន ។ អុំ​ស្រី​បាន​បន្ត​ថា រូប​គាត់​បាន​ប្រកប​មុខរបរ​តម្បាញ​កន្ទេលក្រហម​នេះ តាំងពី​អាយុ​១២​ឆ្នាំ​មក​ម្លេះ គឺ​រៀន​ចេះ​ត​គ្នា​ពី​ម៉ែឪ និង​ដូនតា​មក និង​បច្ចុប្បន្ន​កូនចៅ​គាត់​ក៏​បាន​រៀន​ក៏​ចេះ​ត្បាញកន្ទេល​ដូច​គ្នា​ដែរ ។

បច្ចុប្បន្ន​អ្នក​ភូមិ​ដែល​ចាប់​មុខរបរ​នេះ​បាន​ដាំ​ដើម​កក់ និង​ដើម​ក្រចៅ ដែល​ជា​វត្ថុធាតុដើម​សម្រាប់​ត្បាញកន្ទេល​ដោយ​ខ្លួនឯង​ទៅ​តាម​សមត្ថភាព​នៃ​ក្រុម​គ្រួសារ​ដែល​អាច​ត្បាញកន្ទេល​បាន ។ ដោយឡែក​ចំពោះ​ទឹក​ថ្នាំ​សម្រាប់​ជ្រលក់​ពណ៌​កន្ទេល​ត្រូវ​ទិញ​យក​មក​ពី​ទីផ្សារ ។ ការ​ត្បាញកន្ទេល​ក្នុង​កី​មួយ​ត្រូវ​ប្រើ​មនុស្ស​២​នាក់ ដោយ​ក្នុង​១​ថ្ងៃ អាច​ត្បាញ​បាន​កន្ទេល​តែ​១ ឬ ២​ថ្ងៃ​អាច​ត្បាញ​បាន​កន្ទេល​៣ ។ កន្ទេល​ត្បាញ​បាន​មាន​ម៉ួ​យមក​ទទួល​ទិញ​ដល់​ផ្ទះ​មិន​ដែល​នៅ​សល់​ឡើយ ហើយ​តម្លៃ​វិញ​មាន​ចាប់ពី​៤​ម៉ឺន​រៀល ទៅ​ដល់​១២​ម៉ឺន​រៀល ក្នុង​កន្ទេល​១ ទៅ​តាម​ទំហំ​កន្ទេល​តូច​ឬ​ធំ បើ​គិត​ជា​មធ្យម​ក្នុង​១​រដូវ ក្នុង​គ្រួសារ​មួយ​អ្នក​ត្បាញកន្ទេល​ក្រហម​អាច​រក​ប្រាក់​ចំណូល​បាន​ពី​៣​ទៅ​៥​លាន​រៀល ។

ដោយឡែក​បងស្រី​២​នាក់​ម្តាយ និង​កូន​កំពុង​ត្បាញកន្ទេល​នៅ​មុខ​ផ្ទះ​ក៏​បាន​និយាយ​ដែរ​ថា ៖ នៅ​ក្នុង​១​រដូវ ពួក​គាត់​២​នាក់​ម្តាយ និង​កូន​ត្បាញកន្ទេល​បាន​ពី​៧០ ទៅ​៨០​កន្ទេល ក្នុង​កន្ទេល​មាន​ទំហំ​ទទឹង​១​ម៉ែត្រ​២​តឹក មាន​តម្លៃ​៥​ម៉ឺន​រៀល ដូច្នេះ ក្នុង​១​រដូវ​គាត់​អាច​រក​ចំណូល​បាន​ពី​៣​ទៅ​៤​លាន​រៀល​ដែរ ។

អ្នក​ភូមិ​ព្រែក​រាំង ជា​អ្នក​ត្បាញកន្ទេល​ក្រហម សូម​អំពាវនាវ​ផង​ដែរ​ដល់​ប្រជាពលរដ្ឋ សូម​ជួយ​គាំទ្រ​ទិញ​ផលិតផល​កន្ទេលក្រហម របស់​អ្នក​ភូមិ​ព្រែក​រាំង ដើម្បី​ជួយ​រក្សា​ស្នាដៃ និង​មរ​ត​ក៌​ពី​ដូនតា និង​ដើម្បី​ជួយ​លើក​ស្ទួយ​ជីវភាព​ប្រជាពលរដ្ឋ​នៅ​តាម​ជនបទ​អោយ​មានការ​ងារ​ធ្វើ និង​មាន​ជីវភាព​សមរម្យ​ផង​ដែរ ៕ កែសម្រួល​ដោយ ៖ សុ​ឃា​ក់

Facebook Google Twitter Email

វប្ប​​​ធម៌

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ