ខេត្តកំពង់ឆ្នាំង ៖ នៅក្នុងឱកាស អញ្ជើញពិនិត្យការជួសជុលដំបូលព្រះវិហារវត្តពោធិ៍រុក្ខារាម ហៅវត្ត កំពង់ត្រឡាចលើ និង ជួបសំណេះសំណាលជាមួយលោកតា លោកយាយ គណៈកម្មាការអាចារ្យវត្តកំពង់ត្រឡាចលើ ស្ថិតនៅក្នុងភូមិ អ្នកតាហាង ឃុំកំពង់ត្រឡាច ស្រុកកំពង់ត្រឡាច នាព្រឹកថ្ងៃទី ៤ ខែតុលា ឆ្នាំ២០២៥ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានផ្ដាំផ្ញើដល់លោកតា លោកយាយ គណៈកម្មាការ អាចារ្យ វត្តសូមចូលរួមថែរក្សាព្រះវិហារវត្ត ឲ្យបានគង់វង្សយូរអអ្វែង តទៅមុខទៀតព្រោះថាជាមរតក វប្បធម៌ដ៏មានតម្លៃមិនអាចកាត់ថ្លៃបាន។

ក្នុងពិធីនោះក៍មានការអញ្ជើញចូលរួមចូលរួពី ឯកឧត្តមបណ្ឌិត ហ៊ី វីរៈ អ្នកតំណាងរាស្ត្រមណ្ឌលកំពង់ឆ្នាំង ព្រមទាំង ឯកឧត្តម លោកជំទាវ ក្រសួងនិងក្រុមការងារជំនាញក្រសួងជាច្រើនរូបទៀត។

លោកជំទាវបណ្ឌិតសាស្ត្រាចារ្យ រដ្ឋមន្ត្រីក្រសួងវប្បធម៌និងវិចិត្រសិល្បៈបានបន្តថា ការងារជួសជុលវត្តកំពង់ត្រឡាចលើបានបញ្ចប់ដោយជោគជ័យ ក្រោយពីមានការចូលរួមដ៏ប៉ិនប្រសប់របស់ក្រុមការងារជំនាញរបស់ក្រសួង និងសហគមន៍ជាដៃគូ។មិនត្រឹមតែការជួសជុលសំណង់ឲ្យមានរូបរាងដូចដើមនោះទេប៉ុន្តែវាជាការរស់ឡើងវិញនៃវិញ្ញាណនិងតម្លៃវប្បធម៌ដែលបន្តឲ្យជំនាន់ក្រោយបានឃើញនិងបានយល់ដឹងពីប្រវត្តិសាស្ត្រ ។ អ្វីដែលនៅសេសសល់គឺអនុស្សាវរីយ៍នៃការព្យាយាមការទ្រាំទ្រ និងស្នាមញញឹម នៃសេចក្តីរីករាយដែលកើតចេញពីការងាររួមគ្នានិងមានទំនួលខុសត្រូវថែរក្សាអភិរក្ស បិតិកភណ្ឌ ដ៏សំខាន់នេះ ។ ភារកិច្ចរបស់អ្នកជំនាន់ក្រោយគឺថែរក្សា ស្គាល់តម្លៃ និងបន្តការអភិរក្សឲ្យបានរឹងមាំ។ដោយឡែកការងារជួសជុលមិនមែនបញ្ចប់ត្រឹមប៉ុណ្ណេះទេ ប៉ុន្តែវាជាការចាប់ផ្ដើមថ្មីសម្រាប់អនាគត ព្រោះភារកិច្ចនៅមានច្រើនទៀត ដូចជាត្រូវធ្វើការអភិរក្សគំនូរបុរាណ ដែលមាននៅលើជញ្ជាំងព្រះវិហារ និងការជួសជុលសាលាធម្មសភាដែលមានកាលៈលក្ខណៈ លេចធ្លោផ្នែកស្ថាបត្យកម្ម ដែលទាមទារការចូលរួមពីយើងទាំងអស់គ្នា ដែលជាអ្នកមានភារកិច្ច បន្តវេនក្នុងការថែរក្សានិងការការពារស្នាដៃដែលបានបន្សល់ទុកដោយដូនតារបស់យើង។

បើតាមការបញ្ជាក់របស់លោក ប៊ុនថន សុខាណារិទ្ឋិ ប្រធានបន្ទីរ និងវប្បធម៌និងវិចិត្រសិល្បៈខេត្តកំពង់ឆ្នាំង បានបញ្ជាក់ថាដំបូលព្រះវិហារវត្តកំពង់ត្រឡាចលើគឺត្រូវបានបើកការដ្ឋានជួសជុលនៅថ្ងៃទី១០ ខែឧសភា ឆ្នាំ២០២៥ ដោយក្រុមការងារបច្ចេកទេសរបស់ក្រសួងវប្បធម៌និងវិចិត្រសិល្បៈ ការជួសជុលដំបូលព្រះវិហារវត្តកំពង់ត្រឡាចលើ នាពេលនេះគឺជាគោលនយោបាយរបស់ក្រសួង ក្នុងការថែរក្សាអភិរក្សវប្បធម៌ជាតិដើម្បីទុកឲ្យអ្នកជំនាន់ក្រោយបានស្គាល់នូវ មរតកដូនតាដ៍មានតម្លៃរបស់យើង។

សូមរំលឹកថាវត្តកំពង់ត្រឡាចលើ ជាបូជនីយដ្ឋានពុទ្ធសាសនាដ៏ល្បី ឋិតនៅស្រុកកំពង់ត្រឡាច ខេត្តកំពង់ឆ្នាំង វត្តនេះមានឈ្មោះមួយទៀតគឺវត្តពោធិ៍រុក្ខរាម ដែលជាទូទៅគេបានស្គាល់ព្រះវិហារចាស់មួយប្រកបទៅដោយគំនូរបុរាណយ៉ាងវិចិត្រ ។ ឯកសារខ្លះថាវត្តកំពង់ត្រឡាចលើក៏កើតឡើងនៅឆ្នាំ១៦៧២ វិហារកសាងនៅឆ្នាំ១៨៤៧ និងគំនូរនៅឆ្នាំ ១៨៥០។ប៉ុន្តែផ្អែកលើលក្ខណៈសំណង់និងតឹកតាខ្លះៗព្រះវិហារកសាងនៅក្នុងដើមសតវត្សទី២០ ។ដោយឡែកបើផ្អែកតាម សិលាចារិកលើដំបូលព្រះវិហារ មានសរសេរថាៈ( ព្រះពុទ្ឋសក្ករាជបាន ២៤៦៨,មហាសក្ករាជ១៨៤៧,ចលសក្ករាជ ១២៨៨,បច្ចុប្បន្នឆ្នាំឆ្លូវ សប្តសក្ស គ្រិស្តបារាំង ១៩២៥) ។បើតាមពាក្យគ្រិស្តបារាំង មានន័យថា ព្រះវិហារបានកសាងនៅ គ.ស១៩២៥ ។ជាអកុសលក្នុងរបបកម្ពុជាប្រជាធិបតេយ្យ ព្រះវហារនេះ ត្រូវបានដាក់ធ្វើជាឃ្លាំងស្តុក អំបិល និងរក្សាថ្នាំបុរាណ ទើបបណ្ដាលឲ្យខូចខាត ផ្ទាំងគំនូរបុរាណដោយអន្លើៗ៕