ហ្វីយ៉ាតា ឆ្លើយតបអ្នករិះគ.ន់រឿងលាក់បាំងមិនបង្ហាញមុខកូនតាមបណ្តាញសង្គម
- ភ្នំពេញ
រាជធានីភ្នំពេញ ៖ តារាសម្តែងនិងជាបេក្ខភាពបវរកញ្ញា អ្នកនាង ថៃ នារីសុជាតា ហៅ ហ្វីយ៉ាតា បានធ្វើការឆ្លើយតបទៅកាន់មហាជនមួយចំនួនដែលបានរិះគន់ និងចោទប្រកាន់មកលើរូបនាងថា ព្យាយាមលាក់បាំងរឿងកូន ដោយមិនបង្ហាញតាមបណ្តាញសង្គម ក្នុងពេលដែលនាងបានវិលមកប្រឡូកក្នុងវិស័យសិល្បៈជាថ្មីឡើងវិញនាពេលនេះ ។
ហ្វីយ៉ាតា បានបញ្ជាក់ថា រឿងឯកជនរបស់នាងគឺនាងមិនចាំបាច់អ្វីបង្ហាញគ្រប់បែបយ៉ាងនោះឡើយ ហើយអ្វីដែលនាងមិនបានបង្ហាញនោះគឺមិនមានន័យថា នាងមិនបានធ្វើអ្វីដើម្បីកូននោះឡើយ ពោលកូនរបស់នាងបានដឹងច្បាស់ពីការស្រឡាញ់របស់នាងចំពោះគេ ។
ហ្វីយ៉ាតា បានលើកឡើងថា ខ្ញុំមិនចាំបាច់បង្ហាញគ្រប់យ៉ាង ដើម្បីបញ្ជាក់ថាខ្ញុំជាម្ដាយល្អទេ មនុស្សមួយចំនួនយល់ថា អ្វីដែលគេមិនបានឃើញនៅលើ Social Media គឺមានន័យថា (យើងមិនមាន, ឬយើងមិនបានធ្វើ) តែសុំរំលឹកបន្តិច Social Media មិនមែនជាជីវិតពិតទាំងមូលរបស់យើងទេ។
នាងថា ការដែលខ្ញុំមិនបង្ហាញកូនខ្ញុំលើបណ្ដាញសង្គម មិនមានន័យថាខ្ញុំជាម្ដាយមិនល្អទេ។ ការដែលខ្ញុំមិនយករឿងផ្ទាល់ខ្លួនមកបង្ហាញ ក៏មិនមានន័យថាខ្ញុំមិនបានធ្វើអ្វីសម្រាប់កូនខ្ញុំដែរ។
នាងបញ្ជាក់ថា មនុស្សម្នាក់ៗមានសិទ្ធិជ្រើសរើសថា “តើអ្វីគួរបង្ហាញ និងអ្វីគួររក្សាទុកជារឿងឯកជន ជាពិសេស ក្នុងនាមជាម្ដាយ ខ្ញុំមានសិទ្ធិការពារកូនខ្ញុំ និងជ្រើសរើសរបៀបរក្សាឯកជនភាពរបស់គ្រួសារខ្ញុំព្រោះតែខ្ញុំដឹងច្បាស់ពីសង្គម online មួយនេះ ថាវាគួរឲ្យខ្លាចកម្រិតណា។
បើតាម ហ្វីយ៉ាតា ខ្ញុំដើរមុនកូន ទើបមិនចង់ឱ្យកូនគេពាក់ព័ន្ធនឹង បណ្ដាញសង្គម online នោះទេ។
នាងបន្តថា អ្នកខ្លះដែលចូលចិត្តវិភាគ ដៀលគេ អ្នកជាអ្នកក្រៅ មិនអាចដឹងថាជីវិតរបស់គេនៅពីក្រោយកាមេរ៉ាថាយ៉ាងមិចទេ មានអ្វីខ្លះទេ ដូច្នេះកុំយកអ្វីដែលអ្នកឃើញលើ Internet មកកាត់សេចក្ដីជីវិតរបស់អ្នកដទៃ។
នាងថា កូនខ្ញុំដឹងថា ម៉ាក់ស្រឡាញ់គេ ខ្ញុំដឹងថា ខ្ញុំធ្វើអ្វីខ្លះសម្រាប់កូនខ្ញុំ ហើយសម្រាប់ខ្ញុំ វាគ្រប់គ្រាន់ហើយ ហើយសម្រាប់អ្នកដែលខំសន្និដ្ឋានថា ខ្ញុំទៅដើរលេងដោយគ្មានកូន ហើយទុកកូនឲ្យយាយមើលបើមែន…ហើយម៉េច? ឈប់យករឿងគ្រួសារធម្មតាៗ មកធ្វើដូចជារឿងគ្រោះធម្មជាតិទៀតទៅ ។
ជាការកត់សម្គាល់ ពាក់ព័ន្ធបញ្ហខាងលើនេះ កន្លងមក ថៃ នារីសុជាតា ឬហ្វីយ៉ាតា ហាក់មិនបានលាក់លៀម ឬមិនទទួលស្គាល់ថា នាងមិនធ្លាប់មានគ្រួសារឬមានកូននោះឡើយ គ្រាន់តែកន្លងមកនាងមិនសូវជាបង្ហាញសកម្មភាពរួមគ្នាជាមួយកូនច្រើនជាសាធារណៈឬតាមបណ្តាញសង្គម ។
តារាស្រីរូបនេះធ្លាប់បានទទួលស្គាល់ថា នាងបានរស់នៅក្នុងភាពជាស្ត្រីមេម៉ាយ (Single Mom) តាំងពីវ័យ២០ឆ្នាំ ដោយនាងតស៊ូព្យាយាមដើម្បីបីបាច់ថែរក្សាកូនប្រុសរបស់នាងឲ្យបានល្អបំផុត ដោយឲ្យកូនរបស់នាងធំឡើងទៅជាមនុស្សប្រុសរឹងមាំ ឆ្លាតល្អនឹងមិនធ្វើបាបអ្នកដទៃ ដើម្បីតែសេចក្តីសុខខ្លួនឯង ហើយកូនរបស់នាងនឹងត្រូវដើរតាមផ្លូវដែលនាងត្រួសត្រាយឲ្យ ៕
ចែករំលែកព័តមាននេះ