ទេសចរណ៍ខេត្តកែបមានការកើនឡើង១៦,១៨% ក្នុងពិធីបុណ្យភ្ជុំបិណ្ឌឆ្នាំ២០២៦ ក្រោមបរិយាកាសសុវត្ថិភាព និងកក់ក្តៅ
- កែប
ខេត្តកែប៖ អំឡុងពេល៣ថ្ងៃ ដែលជាថ្ងៃសម្រាកសម្រាប់ពិធីបុណ្យភ្ជុំបិណ្ឌប្រពៃណីជាតិខ្មែរ មានភ្ញៀវទេសចរជិតឆ្ងាយជាង១០ម៉ឺននាក់បានមកលំហែកម្សាន្ត និងស្នាក់អាស្រ័យនៅក្នុងខេត្តកែប ។
តាមការឲ្យដឹងពីមន្ទីរទេសចរណ៍ខេត្តបានអោយដឹងថា បរិមាណនេះ មានការកើនឡើងជាង១៦ភាគរយ បើប្រៀបធៀបអំឡុងពេលដូចគ្នានៃពិធីបុណ្យភ្ជុំបិណ្ឌកាលពីឆ្នាំកន្លងទៅ ។
តាមរបាយការណ៍ពីមន្ទីរទេសចរណ៍ខេត្តដដែលបានឲ្យដឹងថា រយៈពេល៣ថ្ងៃនៃពិធីបុណ្យភ្ជុំបិណ្ឌពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៦ ភ្ញៀវទេសចរជាតិ អន្តរជាតិសរុបចំនួន១០៥.៥៦១នាក់ បានចូលមកលំហែកម្សាន្តនៅតាមរមណីយដ្ឋាន និងគោលដៅទេសចរណ៍នានាក្នុងខេត្តកែប។ ចំនួននេះមានការកើនឡើង១៦,១៨ភាគរយ បើធៀបរយៈពេលដូចគ្នានៃពិធីបុណ្យភ្ជុំបិណ្ឌកាលពីឆ្នាំ២០២៥កន្លងទៅ ។ ក្នុងនោះ ភ្ញៀវជាតិមានចំនួន១០៥.១៤០នាក់ កើនឡើង១៤.៧៨៦នាក់ ស្មើនឹង១៦,៣៦ភាគរយនៃឆ្នាំកន្លងទៅ ។
របាយការណ៍បានបញ្ជាក់ទៀតថា ទន្ទឹមនឹងកំណើនភ្ញៀវទេសចរជាតិបែបនោះ បញ្ហាសន្តិសុខ សណ្តាប់ធ្នាប់សុវត្ថិភាព និងរបៀបរៀបរយនៅតាមគោលដៅទេសចរណ៍នានា ក៏ត្រូវបានរាយការណ៍ថា មានភាពល្អប្រសើរផងដែរ ។
ទាំងនេះជាការរួមចំណែកបង្កលក្ខណៈងាយស្រួល និងផ្តល់ភាពកក់ក្តៅជូនភ្ញៀវទេសចរ ដើម្បីបានសម្រាកលំហែកម្សាន្ត ព្រមទាំងស្នាក់អាស្រ័យក្នុងខេត្តកែបនាឱកាសនៃពិធីបុណ្យភ្ជុំបិណ្ឌប្រពៃណីជាតិខ្មែរទៀតផង៕
ចែករំលែកព័តមាននេះ