ប្រទេសអង់គ្លេស ៖ សារព័ត៌មានអង់គ្លេសជាច្រើនរាយការណ៍នាថ្ងៃទី២កញ្ញាថា នាយករដ្ឋមន្ត្រីអង់គ្លេសលោកបូរីសចនសុន បានគំរាមដកបណ្ដាសមាជិកសភានៃគណបក្សអភិរក្សនិយម ណា ដែលប៉ុនប៉ងរាំងខ្ទប់ការចាកចេញរបស់ប្រទេសលោកពីសហភាពអឹរ៉ុបហៅBREXIT ដោយមិនចាំបាច់មានកិច្ចព្រមព្រៀង។
កាសែតTHE DAILY TELEGRAPH សរសេរថា នាយករដ្ឋមន្ត្រីបានព្រមានបណ្ដាសមាជិកសភាដែលចង់រាំងខ្ទប់BREXITថា លោកអ្នកគាំទ្រខ្ញុំឬមួយលោកអ្នកត្រូវដើរចេញ។ ចំណែកកាសែតTHE GUARDIANសរសេរថា លោកបូរីសចនសុនត្រៀមឲ្យដណ្ដើមបានសំឡេងភាគច្រើនក្នុងសភា។
រួចកាសែតTHE INDEPENDENTវិញបានដកស្រង់សម្ដីសមាជិកសភាមួយរូប លោកDAVID GAUKE ដែលថា នាយករដ្ឋមន្ត្រីលើកទឹកចិត្តបណ្ដាសមាជិកសភាអភិរក្សនិយមដែលប្រឆាំងBREXIT ឲ្យទៅរួបរួមជាមួយពួកប្រឆាំង ដើម្បីលោកអាចចាប់បង្ខំឲ្យមានការបោះឆ្នោតទូទៅក្នុងពេលភ្លាមៗ។ ការគំរាមនោះនាំឲ្យមានពាក្យចចាមអារ៉ាមពីការបោះឆ្នោតសភាមុនកាលកំណត់មួយ៕ (កែសម្រួលដោយ ៖ បុប្ផា)
ចែករំលែកព័តមាននេះ