ទីក្រុងតៃប៉ិ៖ ថ្ងៃនេះ តៃវ៉ាន់ថ្លែងអំណរគុណដ៏ជ្រាលជ្រៅចំពោះរដ្ឋាភិបាលរបស់លោកដូណាល់ត្រាំដែលយល់ព្រមលក់អាវុធគិតជាទឹកប្រាក់ជាង១១ពាន់លានដុល្លារ។ នេះជាការលក់អាវុធដ៏ច្រើនមិនធ្លាប់មានសម្រាប់តៃវ៉ាន់។ ការថ្លែងអំណរគុណនេះធ្វើឡើងតាមរយៈក្រសួងការពារជាតិផង និងខុទ្ទកាល័យប្រធានាធិបតីតៃវ៉ាន់ផង។
ក្រសួងការពារជាតិតៃវ៉ាន់ចេញសេចក្ដីថ្លែងការណ៍ថាអាមេរិកអនុវត្តតាម «ច្បាប់ស្ដីពីទំនាក់ទំនងជាមួយតៃវ៉ាន់» និង «នយោបាយការបរទេស៦ចំណុច» នៅតែបន្តផ្ដល់មធ្យោបាយការពារខ្លួន និងជួយឱ្យតៃវ៉ាន់កសាងកម្លាំងទប់ទល់។ ហេតុនេះ វាបានជាប្រយោជន៍សម្រាប់តៃវ៉ាន់នៅក្នុងសង្គ្រាមរវាងប្រទេសមហាអំណាច និងដែនកោះដ៏តូចមួយនេះ។
ក្រសួងយល់ថានេះជាមូលដ្ឋានគ្រឹះដើម្បីថែរក្សាសន្តិភាព និងស្ថិរភាពនៅក្នុងតំបន់។ អ្នកនាំពាក្យខុទ្ទកាល័យប្រធានាធិបតីតៃវ៉ាន់ លោកស្រីការ៉េន កួ (Karen Kuo) សរសេររៀបរាប់នៅក្នុងសេចក្ដីប្រកាសថាតៃវ៉ាន់នឹងបន្តធ្វើកំណែទម្រង់វិស័យការពារជាតិ, ពង្រឹងភាពធន់នៅក្នុងសង្គម, តាំងចិត្តការពារខ្លួន និងការពារសន្តិភាពតាមរយៈការពង្រឹងភាពខ្លាំងរបស់ខ្លួន។ ក្រសួងការពារជាតិតៃវ៉ាន់ថ្លែងថាអាវុធយុទ្ធភ័ណ្ឌដែលអាមេរិកលក់ទៅឱ្យតៃវ៉ាន់លើកនេះមាន៧មុខសំខាន់ៗ។
ក្នុងនោះមានកាំជ្រួចហ្វូងម៉ាកហាយម៉ាស់ (HIMARS) ដែលអាចបាញ់បានចម្ងាយពី១៥-១៥០គីឡូម៉ែត្រ, កាំភ្លើងធំហូវីតហ្សឺ (howitzer), មីស៊ីលបាញ់រថក្រោះ, ដ្រូន និងគ្រឿងបន្លាស់។ ប្រទេសចិនបញ្ចេញប្រតិកម្មតបខ្លាំងៗទៅនឹងការលក់អាវុធទៅឱ្យតៃវ៉ាន់។ ចិនថានេះជាការធ្វើឱ្យប៉ះពាល់ធ្ងន់ធ្ងរចំពោះសន្តិភាព និងស្ថិរភាពនៅច្រកសមុទ្រតៃវ៉ាន់។ ចិនទាមទារឱ្យអាមេរិកបិទបញ្ចប់ការលក់អាវុធទៅឱ្យតៃវ៉ាន់។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ