រាជធានីភ្នំពេញ ៖ ការប្រកួតកីឡាមហាជនជ្រើសរើសជើងឯករាជធានីភ្នំពេញប្រចាំឆ្នាំ២០១៤ ដែលបានចាប់ផ្ដើមធ្វើតាំងពីថ្ងៃទី៦ មីនាមកនោះ បានបញ្ចប់ហើយ ។ ពិធីបិទការប្រកួតត្រូវបានគេរៀបចំធ្វើកាលពីព្រឹកថ្ងៃទី១២ មីនា នៅសាលាបឋមសិក្សាទួលគោក ដោយមានការចូលរួមប្រគល់រង្វាន់ដល់កីឡាករ-កីឡាការិនីទទួលជ័យលាភីពីលោក អំ វ៉ាន់នី អនុប្រធានមន្ទីរអប់រំ យុវជន និងកីឡា រាជធានីភ្នំពេញ លោក លោកស្រីដែលជាប្រធាន អនុប្រធានការិយាល័យ នាយកសាលា លោកគ្រូអ្នកគ្រូ និងកីឡាករ-កីឡាការិនីយ៉ាងច្រើនកុះករ។
យោងតាមរបាយការណ៍របស់គណៈកម្មការរៀបចំការប្រកួតឱ្យដឹងថា វិញ្ញាសាដែលដាក់ឱ្យប្រកួតមាន៤ប្រភេទកីឡាគឺបាល់ទះ មានចំនួន៤ក្រុម ,បាល់បោះ ៤ក្រុម ,បាល់ទាត់ ៨ក្រុម និងអត្ដពលកម្ម៦ក្រុម សរុប២២ក្រុម ដោយធ្វើការប្រកួតនៅលើទីលានកីឡាវិទ្យាល័យបឹងត្របែក ,សាលាបឋមសិក្សាទួលគោក និងពហុកីឡដ្ឋានជាតិអូឡាំពិក ។ សម្រាប់ក្រុមដែលទទួលបានចំណាត់ថ្នាក់ ឬទទួលបានជ័យលាភីលេខ១ទាំង៤ក្រុមប្រភេទកីឡា ដែលតំណាងឱ្យរាជធានីភ្នំពេញនឹងបន្ដធ្វើការហ្វឹកហាត់បន្ថែមទៀតដើម្បីត្រៀមលក្ខណៈចូលរួមប្រកួតកីឡាជ្រើសរើសជើងឯកភូមិភាគ មណ្ឌលរាជធានីភ្នំពេញ ប្រចាំឆ្នាំ២០១៤ ដែលនឹងត្រូវប្រព្រឹត្ដឡើងនៅថ្ងៃទី២៣ មេសា ដល់ថ្ងៃទី៧ ឧសភា ឆ្នាំ២០១៤ ខាងមុខ ។
សម្រាប់លទ្ធផលចំណាត់ថ្នាក់មានដូចខាងក្រោម ៖
ប្រភេទកីឡាបាល់ទាត់លេខ១ បានទៅសមាគមកីឡាវត្ដវារន្ទព្រែកលៀប ,លេខ២ បានទៅសមាគមកីឡាសិស្សវិទ្យាល័យឫស្សីកែវ និងលេខ៣ បានទៅសមាគមកីឡាវិទ្យាស្ថានវ៉ាន់ដាគណនេយ្យ ។ ប្រភេទកីឡាបាល់បោះ ចំណាត់ថ្នាក់លេខ១ បានទៅសមាគមកីឡាសិស្សសាលាមេតូឌីស្ទកម្ពុជា ,លេខ២ បានទៅសមាគមកីឡាសាលាអន្ដរទ្វីបអាមេរិកាំង និងលេខ៣ បានទៅសមាគមកីឡាវិទ្យាល័យហ៊ុន សែន ផ្សារដើមថ្កូវ ។ ប្រភេទកីឡាបាល់ទះ លេខ១ បានទៅសមាគមកីឡាសិស្សវិទ្យាល័យហ៊ុន សែន ភ្នំពេញថ្មី ,លេខ២ បានទៅសមាគមកីឡាសិស្សវិទ្យាល័យជាស៊ីមសាមគ្គី និងលេខ៣ បានទៅសមាគមកីឡាសិស្សវិទ្យាល័យហ៊ុន សែនផ្សារដើមថ្កូវ ។
ប្រភេទកីឡាអត្ដពលកម្ម លេខ១ បានទៅសមាគមកីឡាសិស្សវិទ្យាល័យឥន្ទ្រទេវី ,លេខ២ បានទៅសមាគមកីឡាសិស្សសាលាអន្ដរទ្វីបអាមេរិកាំង និងលេខ៣ បានទៅសមាគមកីឡាសាលាមេតូឌីស្ទកម្ពុជា ។
នៅក្នុងឱកាសនោះ លោក អំ វ៉ាន់នី អនុប្រធានមន្ទីរអប់រំ យុវជន និងកីឡា រាជធានីភ្នំពញ បានថ្លែងថា ការប្រកួតកីឡានាពេលនេះជាការជួបជុំគ្នាមួយ ដើម្បីចាប់ដៃគ្នា ញញឹមរកគ្នា ផ្លាស់ប្ដូរបទពិសោធន៍គ្នាទៅវិញទៅមក ក្នុងន័យសាមគ្គីភាព មិត្ដភាព ចេះអធ្យាស្រ័យគ្នា ឈានដល់ការឯកភាពជាតិទាំងមូល ដើម្បីចូលរួមចំណែកអភិវឌ្ឍប្រទេសជាតិឱ្យរីកចម្រើន ស្របតាមគោលនយោបាយចតុកោណដំណាក់កាលទី៣របស់រាជរដ្ឋាភិបាលអាណត្ដិទី៥ ដែលមានសម្ដេចតេជោ ហ៊ុន សែន នាយករដ្ឋមន្ដ្រីជាប្រមុខ ។ លោកបន្ដថា នាយករដ្ឋមន្ដ្រីបច្ចុប្បន្នបានផ្ដល់អាទិភាពជាចម្បងដល់វិស័យអប់រំកាយ និងកីឡា ព្រោះផ្នែកនេះបានចូលរួមចំណែកយ៉ាងសកម្ម និងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋ និងកាត់បន្ថយអំពើអសកម្មមួយចំនួនក្នុងគ្រួសារ និងសង្គមព្រមទាំងធ្វើឱ្យមនុស្សគ្រប់រូបមានសុខភាពល្អ ប្រាជ្ញាភ្លឺថ្លា និងមានសីលធម៌រស់នៅល្អ ៕
ចែករំលែកព័តមាននេះ