រាជធានីភ្នំពេញ ៖ ការប្រកួតលើកទី៣ របស់កីឡាករឃីម ឌីម៉ា នៅលើរេញ MMA នាយប់ថ្ងៃទី១៤ មីនា ពិតជាសំខាន់ខ្លាំងណាស់ ដោយសារនោះគឺវគ្គកាត់សេចក្តីយ៉ាងសំខាន់ដើម្បីឈានទៅរកការសម្រេចថា នឹងត្រូវជាប់ឈ្មោះក្នុងបញ្ជីខ្មៅឬយ៉ាងណា នៅក្រោយពេលបញ្ចប់នៃការប្រកួត ។ ប្រសិនបើធ្លាក់ក្នុងបញ្ជីនោះមានន័យថា ឃីម ឌីម៉ា នឹងបាត់ឱកាសឡើងរេញទៀតហើយ បើទោះជាការប្រកួតកាលពីលើកទី១ អាចនឹងត្រូវគេមិនរាប់បញ្ចូល ។
ការប្រកួតរបស់ ឃីម ឌីម៉ា នឹងត្រូវធ្វើឡើងក្នុងកីឡដ្ឋាន Stadium Negara ក្នុងទីក្រុងកូឡាំឡាំពួ នៅវេលាម៉ោង៧យប់ថ្ងៃទី១៤ មីនា ស្អែកនេះ ដោយមានការផ្សាយផ្ទាល់តាមរយៈស្ថានីយទូរទស្សន៍ MY TV នៅក្នុងប្រទេសកម្ពុជាផងដែរ ។ ឃីម ឌីម៉ា នឹងប៉ះជាមួយកីឡាករជើងខ្លាំងម្ចាស់ស្រុក Saiful Merican ក្នុងប្រភេទទម្ងន់៥៦គីឡូក្រាមក្នុងចំណោម១០គូដែលត្រូវបានប្រកាសឡើង ដែលភាគច្រើនសុទ្ធតែជាកីឡាករបរទេសមកពីបណ្តាប្រទេស និងតំបន់ផ្សេងៗ ។ តាមច្បាប់របស់ OneFC បានប្រកាសថា រាល់កីឡាកររូបណាដែលបានឡើងរេញ MMA ៣លើកហើយគ្មានជ័យជម្នះ នឹងក្លាយជាកីឡាករជាប់ក្នុងបញ្ជីខ្មៅ មិនអាចមានឱកាសប្រកួតបន្តនោះទេ លើកលែងតែមានឈ្មោះឈ្នះជាផ្លូវការខ្លះ ទើបត្រូវស្ថាប័នប្រដាល់ដាក់ទ្រុងដ៏ល្បីឈ្មោះមួយនេះឱ្យរួចខ្លួនពីបញ្ជីខ្មៅរបស់គេ ។
រំលឹកដល់ការប្រកួតកាលពីលើកមុន ឃីម ឌីម៉ា វាយឈ្នះកីឡាករហ្វីលីពីន Rene Catalan នៅក្នុងប្រទេសសិង្ហបុរី កាលពីខែតុលា ឆ្នាំ២០១៣ បុ៉ន្តែត្រូវបានគេឆាចោល ព្រោះតែហេតុផលវាយគេត្រង់កញ្ចឹងកពីក្រោយខុសនឹងលក្ខន្តិកៈ និងលើកទី២ វាយចាញ់កីឡាករហ្វីលីពីន Ruel Catalan ជាប្អូនរបស់សត្រូវចាស់នៅក្នុងទីក្រុងម៉ានីលប្រទេសហ្វីលីពីន កាលពីខែធ្នូ ឆ្នាំ២០១៣ ក្នុងទឹកទី១ បើទោះជា Ruel Catalan ទើបតែឡើងរេញបាន៤-៥ដង ។ ថ្វីដ្បិតតែការប្រកួតលើកទី៣ នេះ បើទោះជាចាញ់ ក៏នៅមានសំណាងទទួលបានឱកាសឡើងរេញម្តងទៀត ដោយសារតែការប្រកួតលើកដំបូង ត្រូវគេចាត់ទុកជាមោឃៈ ឬមិនរាប់បញ្ចូល ក៏ការប្រកួតនាយប់ថ្ងៃទី១៤ នេះ ត្រូវគេចាត់ទុកថា សំខាន់ជាងការប្រកួតមុន ព្រោះបើឈ្នះនឹងរួចផុតពីបញ្ជីខ្មៅ បុ៉ន្តែបើចាញ់ គឺនឹងរអិលចូលក្នុងបញ្ជីនោះ បើទោះជាលោកនៅមិនទាន់ចាញ់គ្រប់៣ប្រកួតដោយសារលើកទី១ មិនរាប់បញ្ចូលក៏ដោយ ។ គណៈកម្មការរៀបចំការប្រកួតឱ្យដឹងថា កីឡាករដែលឡើងរេញជាប់គ្នា២ដង ហើយចាញ់ទាំង២លើកជាប់គ្នា និងមានម្តងបានធ្វើខុសលក្ខន្តិកៈដូច ឃីម ឌីម៉ា នោះនឹងត្រូវគេចាត់ទុកថា ជាជម្រើសដែលស្ថិតក្នុងបញ្ជីខ្មៅហើយ ។ ក្នុងនោះការវាយបំពានខុសពីអ្វីដែលបានចែងក្នុងការប្រកួត គឺជាកំហុសធំជាងការប្រកួតចាញ់ដោយបច្ចេកទេសនោះទៅទៀត។ និយាយរួម លើកលែងតែមានការប្រជុំសម្រេចពីគណៈកម្មការ OneFC បុ៉ណ្ណោះ ទើបកីឡាករដែលចាញ់២លើក និងបានបំពានច្បាប់ប្រកួតរបស់ OneFC ម្តងអាចមានឱកាសឡើងរេញជាលើកទី៤ បាន ។
ងាកមកកាន់ការប្រកួតជាមួយកីឡាករ Saiful នេះវិញ កីឡាករឃីម ឌីម៉ា ប្រាប់ថា មិនខ្លាចនោះទេ ដោយសារការប្រកួតលើកមុន គេធ្លាប់យកឈ្នះកីឡាកររូបនេះម្តងរួចទៅហើយនៅលើសង្វៀនប្រដាល់សេរី ដែលបានធ្វើឡើងនៅក្នុងប្រទេសកម្ពុជាកាលពីអំឡុងឆ្នាំ២០១១ នៅបុ៉ស្តិ៍លេខ៣ ។ សំណួរមួយកំពុងចោទឡើងថា តើ ឃីម ឌីម៉ា នឹងមានសំណាងឬយ៉ាងណាក្នុងជំនួបជាមួយដៃគូចាស់សម្រាប់ព្រឹត្តិការណ៍ប្រដាល់អន្តរជាតិមួយនេះ ? បើទោះជាការប្រកួតលើកនេះចាញ់ឬឈ្នះ តែអាចធ្វើឱ្យ ឃីម ឌីម៉ា បានឡើងរេញជាលើកទី៤ បុ៉ន្តែប្រហែលជាវត្តមានរបស់គេនឹងមិនមានការចាប់អារម្មណ៍ប្រកបដោយកិត្តិយសបែបនេះទៀតទេ បើស្រាប់តែភ្លាត់ឱ្យចាញ់ជាថ្មីម្តងទៀតក្រោមដៃរបស់កីឡាករម៉ាឡេស៊ីលើកនេះ ។ សូម្បីតែអ្នកគាំទ្រក្នុងស្រុក ក៏នឹងដកសេចក្តីទុកចិត្តផងដែរក្នុងពេលដែលគេមានឈ្មោះទៅកាន់រេញ MMA ចំនួន៣លើក ចាញ់ជាប់គ្នា២លើក និងម្តងបានទទួលលទ្ធផលមោឃៈនោះ ។ ទោះបីយ៉ាងណា សាមីខ្លួន ឃីម ឌីម៉ា នៅតែមានជំនឿចិត្តក្នុងការដណ្តើមជ័យជម្នះ ។ ឃីម ឌីម៉ា បានបួងសួង និងសុំឱ្យការប្រកួតរបស់ខ្លួន ទទួលបានជោគជ័យ បើទោះជានោះជាការប្រកួតវាយដាក់ទ្រុង ដែលមិនមែនជាការប្រកួតប្រដាល់សេរី ដែលគេធ្លាប់យកប្រៀបលើកីឡាករ Saiful ។ ឃីម ឌីម៉ា បានទាំងអះអាងថា នឹងប្រឹងឱ្យឈ្នះ ព្រោះលោកមិនចង់ជាប់ឈ្មោះក្នុងបញ្ជីខ្មៅរបស់ OneFC នោះទេ។
ជាមួយនឹងការតាំងចិត្ត លោកក៏ត្រូវគេដឹងថា បានប្រឹងប្រែងហ្វឹកហាត់ក្រោយពេលទៅដល់ប្រទេសម៉ាឡេស៊ី ដើម្បីបង្កើនថាមពលឱ្យបានច្បាស់លាស់បន្តិចមុនប៉ះជាមួយកីឡាករ Saiful នាពេលនេះផងដែរ ។ ឃីម ឌីម៉ា បញ្ជាក់ថា ខ្លួនសង្ឃឹមឈ្នះច្រើនជាងចាញ់ បុ៉ន្តែអំណះអំណាងរបស់លោក ក៏ត្រូវបណ្តាសារព័ត៌មានល្បីឈ្មោះរបស់បរទេសមួយចំនួនបានស្រង់សម្តីរបស់ Saiful ថា នឹងផ្តួល ឃីម ឌីម៉ា ឱ្យខាងតែបានដូចគ្នាផងដែរ ដោយ Saiful និយាយថា នឹងមិនធ្វើឱ្យកង់ប្រវត្តិសាស្ត្រវិលមករកចំណុចច្រំដែលដូចកាលដែលគេបានចាញ់ ឃីម ឌីម៉ា ក្នុងវេទិកាប្រដាល់សេរីនៅកម្ពុជាកាលពីលើកមុននោះទេ ៕
ចែករំលែកព័តមាននេះ